08/08/2023
‼️
: Umumenyeshamakuru wa Radio Shima FM yo mu Rumonge yarahagaritswe, ku mugoroba wo kuri uyu wa mbere, ku mutahe w’umushikirizamanza wa republika muri iyo ntara. Imvo yatumye Phénias Ndayishimiye ahagarikwa ntiramenyekana neza, kuko gushika ubu abamwegereye bavuga ko batarerekwa uwo mutahe umuhagarika.
Ariko amakuru ava mu bakurikiranira hafi iyo dosiye avuga ko yoba ariko arazira ivyo 'yanditse ku rubuga rwiwe rwa Facebook" vyoba bifise intumbero yo gusambura Radio Izere fm, yahoze akoramwo imbere y’uko aja gukorera mw’iradiyo nshasha Shima FM.
Ivyo ariko Phénias Ndayishimiye arabihakana. Asigura ko ari irementanya yakorewe n’umuntu yamwiyitiriye akoresheje urubuga rwiwe rwa Facebook (piratage) nk’uko biboneka kuri urwo rubuga. Abo bakorana muri Radio Shima FM basaba ko ubutungane bwokora ataho buhengamiye.
Mu gihe ivyo yagirizwa hoba harimwo no gutyoza uwuserukira imbere y’amategeko Radio Izere FM, Isanganiro ntiyamuronse ngo agire ico abivuzeko. Ku musase wo kuri uyu wa kabiri terefone yiwe ntiyarengana.
