07/02/2026
كان تسناي باه يكون عندك كلشي باه تبداي مشروعك و كل يوم تقولي غدوة نقولك غير احبسي🙅♀️👌
اذا مازلتي مراكيش متابعة صفحتي تابعيها حبيبتي ✨💜
لي ماازلو ميعرفونيش انا شاما صاحبة مشروع تصميم و طباعة
و صاحبة الاكادمية الرقمية Chama Academy
و ليوم جيت نحكي معاكم م القلب القلب و نمدلكم نصائح على حسب تجربتي و خبرتي المتواضعة🥰
وصلنا ل 2026 و بزاف بنات الحمد لله ماعادوش يحبو الاتكال و الا خدمة كلاسيكية و يسناو في وظيفة لي قادرة تكون قادرة متكونش ,و طبعا لبنات لي اختارو يخدمو م الدار متخليين على وظيفة فيها اختلاط او شبهة
تحية لكن جميعا🤝
اذا جاتك هادي الفكرة و صادفتي المنشور راهي اشارة باه تبداي😅
و طبعا اي مشروع يحتاج راس مال و لو قليل او في بعض المجالات معرفة خبرة كيما بيع المنتجات الرقمية,دورات في مجالات معينة.
و في معظم الاوقات راس المال يكون هو لي يخليك تترددي
انا جيت باه نقولك ابداي حبيبتي ابداي ابداي بوش عندك و متقارنيش روحك بوحدة اخرى,عبالي وش قاعدة نحكي خاطر انا تاني عديت عليها هادي المرحلة.
صدقيني هذا شيطان و نفسك المارة بالسوء, تبقاي ديمة تقارني روحك بهاذي و هاذي و تقولي زعما نبان معاهم
لازم تصوير مليح,هاتف مليح, ركن تصوير,منتجات فخمة.
شوفي شوفي منتجات تاعهم زعما انا راح يشوفو معايا
يا اختي و يا حبيبتي حتى هي تان بدات كيفك و طورت مع الوقت انتي فقط مكنتيش تعرفيها في هذاك الوقت.
حتى حالات النجاح من الاول راهم نسبة قلييييييلة بزاف.
معليهش قارني روحك معاهم باه تتطوري و باه ديما تواكبي وش كاين و الا تاخدي فكرة ناس وش تحب و تكوني انتي متميزة و سباقة.
لكن ما تبقايش تسوفي ليوم غدوة ليوم غدوة.
و متنسايش بلي الرزق على الله انتي لازم عليك السعي و التوكل على الله و ربي يتكفل برزقك و اسباب نجاحك.
و الدعاء الدعاء و التقرب لله , و حوسي ديما على مرضاة الله في كل امورك و كل خطوة تخطيها.
عندك منتج واحد ابداي بيه غير هو صوري بللي كان و توكلي على الله و ابداي.
و فرضا انتي حابة تديري مشروع راس مالو 10 و الا 50 مليون و انتي عندك 100 الف ابداي بل100الف هاديك استثمريها ديري بيها مشروع صغير اخدمي حوايج و بيعي و ديري هدف باه تلمي المبلغ هداك.
و كنصيحة اخيرة متتوقعيش راح تولي مليونيرة م الشهر لول😅 و الا العام لول راح تشوفي ارباحك و التغيير من نهاية العام الاول.
طبعا ممكن العكس لكن في الحالة العادية ما ترفعيش سقف توقعاتك و امشي خطوة خطوة.
و التجارة خسارة ثم ربح راح تخسري على مشروعك و تستثمري فيه و مبعد باه تربحي.
هذا كان كل شيء لليوم نتمنى نكون فدتكم و لو بالقليل 🤗
رزقني الله و اياكم من واسع فضله🤲
و اذا مازلتي محتارة كيفاه تبداي مشروعك Chama Academy دايرتلكم دورة مجانية
✨راح تلقاو فيها كيفاه تحولي فكرتك الى مشروع ناجح و نحكيو فيها على بزاف حوايج يفيدوكم💜💜
اذا وصلتي هنا ابوني و خليلي كومنتار شباب و قوليلي وش هو مشروعك🥰
#شاما
