ABMS Global Trade, Zone urbaine lts 200 lot 135 bis 1 Beni Mered Blida, Blida (2026)

Q: Quelle est l'adresse ?

Zone Urbaine Lts 200 Lot 135 Bis 1 Beni Mered Blida

11/02/2026

عندك منتج قابل للتصدير بصح ما عندكش عملاء؟....

المشكلة ماشي في السوق… المشكلة في طريقة البحث في B2B الزبائن ما يطيحوش من السماء لازم تمشي تجيبهم بطريقة ذكية ومنظمة.

أولًا لازم تفهم حاجة:
في التصدير انت ما تبحثش عن “ناس تشتري”… انت تبحث عن:

مستوردين
موزعين
سلاسل تجارية
تجار جملة
مصانع تستعمل منتجك كمادة أولية

وهنا تجي الأدوات 👇

🌍 مواقع B2B احترافية (مش Marketplace عشوائي)

🔹 Globy
https://www.globy.com

منصة قوية في المنتجات الفلاحية والغذائية تقدر تلقى طلبات شراء حقيقية من مستوردين، مشي غير ناس تدور على أرخص سعر.

🔹 Freshdi
https://www.freshdi.com

مخصصة أكثر للمنتجات الطازجة والخضر والفواكه مفيدة إذا تخدم في agro-food.

🔹 Go4WorldBusiness
https://www.go4worldbusiness.com

فيها مستوردين موثقين تقدر تتواصل مباشرة مع buyers حقيقيين.

🔹 TradeKey
https://www.tradekey.com

تسمحلك تبحث عن طلبات شراء مباشرة (RFQ).

🔹 Kompass
https://www.kompass.com

دليل شركات عالمي تقدر تلقى مستوردين حسب البلد والقطاع وتتواصل معاهم مباشرة.

🎯 الطريقة الصح (مش غير تسجيل وخلاص)

1️⃣ اختار بلد معين (ما تقولش “أي بلد”)
2️⃣ حدد نوع المشتري (موزع؟ سوبرماركت؟ مصنع؟)
3️⃣ حضر عرض احترافي (Company Profile + صور + شروط بيع واضحة)
4️⃣ تواصل برسالة قصيرة ومباشرة
5️⃣ Follow up بعد 3–5 أيام

90٪ من الناس يبعثو رسالة وحدة ويستناو… والمحترف يعرف أن البيع الدولي يحتاج متابعة.

🔥 طريقة أقوى (اللي يخدمو بها الكبار)

✔ استعمل LinkedIn وابحث عن:
Import Manager / Purchasing Manager / Category Buyer

✔ استعمل Google Maps في البلد المستهدف
ابحث عن:
“food distributor in France”
“olive oil importer UAE”

✔ شارك في معارض دولية
(حتى زيارة فقط تعطيك شبكة علاقات)

💡 أهم نصيحة

ما تبعثش:
“Hello we are export company send me your whatsapp”

هذه تموت الصفقة

ابعث:

تعريف قصير
المنتج
الكمية المتاحة
Incoterm
ميناء الشحن
شهادة الجودة إن وجدت

خليهم يحسو أنك جدي.

تحبوا المنشور الجاي يكون نموذج رسالة جاهزة للتواصل مع مستورد أجنبي؟

11/02/2026

تقدر تخسر صفقة كاملة غير بخطأ صغير في فاتورة؟

هذا موضوع مهم بزاف لأن 80٪ من مشاكل التصدير تجي من الوثائق مشي من السلعة في التصدير الوثائق أهم من الكرتون نفسه أي نقص أو خطأ في رقم، وصف، أو Incoterm يقدر يوقف الحاوية في الميناء.

خليني نرتبهم لك بطريقة بسيطة 👇

📄 1) Proforma Invoice (الفاتورة الشكلية)

هذه ماشي فاتورة نهائية.
هي عرض رسمي فيه كل تفاصيل الصفقة قبل الدفع.

تستعمل من أجل:

طلب فتح اعتماد (LC)

طلب تحويل بنكي

طلب رخصة استيراد عند المشتري

تحتوي على:
✔ اسم وعنوان البائع والمشتري
✔ وصف دقيق للمنتج
✔ الكمية
✔ السعر الوحدوي والإجمالي
✔ العملة
✔ Incoterm (مثال: FOB Algiers)
✔ مدة صلاحية العرض
✔ آجال التسليم

هي أساس الاتفاق.

🧾 2) Commercial Invoice (الفاتورة التجارية)

هذه الوثيقة الرسمية بعد تأكيد الصفقة والشحن.

تحتوي على:
✔ رقم الفاتورة وتاريخها
✔ رقم الطلب أو العقد
✔ بيانات كاملة للطرفين
✔ وصف البضاعة (HS Code إن أمكن)
✔ الوزن الصافي والإجمالي
✔ عدد الطرود
✔ السعر الإجمالي
✔ Incoterm
✔ بلد المنشأ
✔ توقيع وختم الشركة

هذه تدخل في:

الجمارك

التخليص

البنوك

حساب الرسوم

أي خطأ هنا يسبب تعطيل.

📦 3) Packing List (قائمة التعبئة)

مهمة جدًا في الجمارك والتفتيش.

توضح:
✔ عدد الكراتين / الطرود
✔ محتوى كل طرد
✔ الوزن الصافي لكل طرد
✔ الوزن الإجمالي
✔ الأبعاد إن وجدت
✔ أرقام الحاوية إن وجدت

الـ Packing List تركز على التفاصيل اللوجستية، مشي السعر.

🚢 4) Bill of Lading (B/L) أو Airway Bill

وثيقة النقل.
تصدر من شركة الشحن.

تثبت:
✔ أن البضاعة تم تحميلها
✔ ميناء الانطلاق
✔ ميناء الوصول
✔ اسم المستلم

بدونها، المشتري ما يقدرش يستلم البضاعة.

📜 5) Certificate of Origin

تثبت بلد المنشأ.
تطلبها بعض الدول للاستفادة من امتيازات جمركية.

🏦 6) Domiciliation Bancaire

لازم تدير توطين بنكي قبل التصدير.
بدونها ما تقدرش تصرّف العملية قانونيًا.

🎯 القاعدة الذهبية

Proforma = قبل الدفع
Commercial Invoice = بعد البيع
Packing List = تفاصيل الشحن
B/L = إثبات النقل
CO = إثبات المنشأ

تحبوا المنشور الجاي يكون نموذج عملي جاهز لكل وثيقة باش تستعملوه مباشرة ؟

03/02/2026

أكبر خطأ في التصدير؟ تدخل السوق الخارجي بلا استراتيجية...

التصدير ماشي عملية بيع عادية، هو مشروع كامل يمر بدورة استراتيجية واضحة: فكرة المشروع ثم تعريف مشروع التصدير ثم تصميم الاستراتيجية ثم التخطيط والتنفيذ يعني قبل ما تسأل “كيف نصدر؟” لازم تسأل: واش نبيع؟ ولمن؟ وكيفاش نتميز؟

أول خطوة حقيقية في استراتيجية التصدير هي تقسيم السوق (Segmentation) ماشي كل زبون هو زبونك لازم تحدد فئة من المشترين عندهم نفس الاحتياجات نفس عادات الاستهلاك ونفس الفوائد اللي يبحثوا عليها خاصة الحاجات اللي المنافسين ما لباوهاش مليح من بعد تجي مرحلة التموقع (Positionnement): هنا تعدل عرضك باش يناسب هاذ الفئة من حيث الجودة الكمية الآجال والتكلفة التموقع يعني ما تبيعش منتج فقط بل تقدم حل مصمم لاحتياجات محددة.

بعدها يجي صياغة بيان الاستراتيجية: لازم تكون قادر توصف بوضوح واش راك تبيع ولمن وكيفاش راك رايح توصل للقيمة لي يبحث عليها الزبون وهل هدفك تزيد المبيعات لزبائنك الحاليين ولا تخطف زبائن المنافسين ولا تدخل مستهلكين جدد مع ضمان الربحية على المدى المتوسط والطويل.

في اختيار الأسواق تقدر تمشي وفق مصفوفة Ansoff يعني:

تزيد مبيعاتك في نفس السوق

تدخل أسواق جديدة بنفس المنتج (وهذا هو التصدير)

تطور منتج جديد

أو تنوع كليًا (منتج جديد + سوق جديد)

ما ننسوش الجانب العملي: لازم ميزانية تصدير تشمل مصاريف الخدمة التصديرية (رواتب، تنقلات، تشغيل) + مصاريف التسويق الخارجي (دراسات سوق وتغليف و ترويج). ومن بعد تجي خطة تطوير التصدير: اختيار الأسواق، تحليل المنافسين، استراتيجية التسعير، التوزيع، الترويج، الشركاء، الجوانب القانونية، اللوجستيك، المخاطر، وخطة التنفيذ المالية.

🔑 الخلاصة:
التصدير الناجح = منتج مناسب × سوق مناسب × تموقع ذكي × تخطيط مالي وتنفيذي واضح
اللي يصدر بلا استراتيجية راهو داخل على الزهر
اللي يصدر باستراتيجية يبني نمو حقيقي ومستدام

نكمل في المنشور الجاي ونفصّل كيف تدير Segmentation خطوة بخطوة

31/01/2026

اذا راك حاب تدخل التصدير بلا ما تدير تشخيص (Diagnostic Export) على مشروعك…راك كيما واحد حاب يسافر طريق طويل… بلا ما يفحص الطوموبيل تاعو 🚗

و أغلب الخسائر تبدأ من هنا… مش من السوق.

كل يوم تجيني رسائل من ناس تقول:

"عندي منتج مليح… بصح ما نعرفش كيفاش نبدأ"
"خايف من البنوك"
"خايف نغلط في أول صفقة"

و الحقيقة لي بزاف ما يعرفوهاش هي 👇

❌ المشكلة ماشي في البلاد
❌ المشكلة ماشي في الزبون الأجنبي
❌ المشكلة إن المشروع ما دارش تشخيص قبل ما يخرج للعالم

1️⃣ أول نقطة لازم تفهمها

مش كل مؤسسة تقدر تصدّر…
حتى لو عندها منتج ممتاز.

السؤال الحقيقي هو:
هل مشروعك جاهز للتصدير أصلًا؟

2️⃣ النقطة الثانية

الخسارة في التصدير غالبًا تجي من الداخل:

🔹 الوضعية المالية
🔹 القدرة على الإنتاج
🔹 الفريق واش يفهم في التجارة الدولية
🔹 القدرة على تمويل الطلبيات
🔹 مطابقة المنتوج للمعايير

هنا يبان الفرق بين لي ينجح و لي يتعطل.

3️⃣ التصدير ماشي عملية بسيطة

كاين ناس يفكرو التصدير غير:

📦 نلقى زبون
✈️ نبعث السلعة
💰 ندي دراهم

لكن الواقع هو:

التصدير منظومة كاملة فيها:

⚙️ تحليل نقاط القوة والضعف
🌍 دراسة الفرص والمخاطر (SWOT)
🏭 تقييم الإنتاج
💵 تقييم التمويل
🧠 تقييم الفريق
📢 تقييم التسويق

هذا كامل يسموه:

🔍 Diagnostic Export

4️⃣ أغلب المؤسسات لي تفشل… ماشي لأنها ضعيفة.

لكن لأنها:

🔸 عالجت الأعراض فقط
🔸 ما حلتش المشكل من الجذور
🔸 ما كانش عندها تكوين

و الفرق كبير بين:

ترقيع المشكلة و حلها نهائيًا بالمعرفة

5️⃣ وهنا يجي الدور الحقيقي

التشخيص يعطيك:

✔ هل تقدر تصدّر ولا لا
✔ واش لازم تصلّح قبل ما تبدأ
✔ كيف تحمي روحك ماليًا
✔ كيف تختار المنتج المناسب
✔ كيف تبني استراتيجية تصدير صح

يعني قبل ما تخاطر بدراهمك…
تكون عارف راك داخل على واش.

وفي الأخير الله يفتحها على كل واحد فيكم ويرزقنا وإياكم النجاح الحلال والرزق الواسع.

30/01/2026

تحب تصدّر من الجزائر بصح تحس الإجراءات معقدة؟

الحقيقة بلي الدولة حاطة منظومة كاملة باش تشجّع وتسهل التصدير خارج المحروقات بصح لازم تعرفها مليح التصدير ماشي عملية عشوائية بل نظام فيه قوانين وحقوق وتحفيزات وهيئات دعم تخدم باش المنتج الجزائري يخرج للأسواق العالمية بأمان وتنظيم أي شخص طبيعي أو معنوي عندو سجل تجاري فيه نشاط تصدير يقدر يصدّر سواء في الفلاحة، الصناعة، أو حتى الخدمات الرقمية بالمقابل كاين سلع ممنوعة من التصدير كيما الحيوانات والنباتات المحمية، السلع المقلدة، المواد اللي عندها قيمة تاريخية وطنية، وبعض المواد الخطرة أو الموقوفة، لذلك لازم تعرف واش مسموح قبل ما تفاوض أي زبون خارجي.

كمصدّر، عندك واجبات أساسية: لازم يكون عندك سجل تجاري وتدير domiciliation bancaire لكل عملية تصدير وترجع عائدات التصدير بالعملة الصعبة في أجل أقصاه 180 يوم (حتى 360 يوم إذا كانت العملية مؤمنة عبر CAGEX). وفي المقابل عندك حقوق مهمة، منها أنك تقدر تستعمل 20٪ من مداخيل التصدير بالعملة الصعبة في مصاريف الترويج لنشاطك في الخارج مع تقديم الإثباتات وهذا يعطيك مرونة باش تعاود تستثمر في التوسع الخارجي وكاين كذلك دعم مؤسسي مهم: هيئات كيما CACI للمرافقة وعلاقات الأعمال CAGEX للتأمين ضد عدم الدفع والمخاطر السياسية وSAFEX للمعارض والتظاهرات

من ناحية الدعم المالي الدولة توفر آليات عبر FSPE لي سبق وتكلمنا عليها تشارك معاك في التكاليف: دعم كبير للمشاركة في المعارض الدولية ودعم للنقل الدولي ومساهمة في دراسات الأسواق إضافة إلى هذا كاين امتيازات ضريبية كيما إعفاءات من TAP وTVA وIBS، وإمكانية شراء مواد موجهة للتصدير بدون TVA وأنظمة جمركية خاصة تسمح بتعليق الرسوم والحقوق على المواد المستوردة الموجهة لإنتاج سلع للتصدير.

الخلاصة أن التصدير من الجزائر ماشي مغامرة غير محسوبة، بل منظومة اللي يفهم القواعد يستفيد ويبني نشاط دولي قوي،واللي يجهلها يضيع فرص كبيرة للنمو.

قولولي تحبوا نشرح بالتفصيل كيفاش CAGEX تحميك من خطر عدم الدفع وتعاونك حتى مع البنك؟

28/01/2026

وصلتني بزاف رسائل وتعليقات بخصوص موضوع تعويضات التصدير والدعم وحبيت نوضح نقطة مهمة بصراحة بعيد على التهويل أو التهوين.

أولاً: التعويضات (كيما مصاريف النقل أو المعارض) لازم نفهموها على أنها تعويض ماشي أساس تبني عليه حساباتك يعني المصدر لازم يخدم مشروعو وكأنو ماكان حتى تعويض وإذا جا يكون إضافة مليحة وإذا تأخر ما يطيحش كامل المشروع المشكل لي صاير اليوم هو البطء وطول الآجال ماشي غياب الآليات نهائيا من اللي نسمعو في الميدان راهي الملفات تتعالج بطريقة رجعية بداو بسنوات (2025–2024) وراهم ينزلو تدريجيا بصح الإيقاع بطيء وهذا لي خلق عدم ثقة.

ثانياً: ما ننسوش بلي كاين امتيازات حقيقية للمصدر في الجزائر، بصح بزاف ناس يركزو غير على العراقيل وينساوها، منها:
✔ الإعفاء من TVA على السلع الموجهة للتصدير
✔ إمكانية الاستفادة من أنظمة جمركية خاصة (كيما admission temporaire للمواد الأولية)
✔ إعفاء من IRG/IBS على الأرباح الناتجة عن عمليات التصدير (حسب الشروط القانونية)
✔ آليات تأمين الصادرات ضد خطر عدم الدفع (CAGEX)
✔ تسهيلات بنكية مخصصة لعمليات التصدير

المشكل إذن ماشي “كاين أو ماكانش”، بل في السرعة والتطبيق والتعامل الإداري التصدير في الجزائر ما هوش ساهل بصح ما هوش مستحيل تاني لي يدخل وهو فاهم بلي الطريق فيها صبر وتنظيم يقدر يمشي أما لي يستنى كلش يكون سريع ومضمون يتصدم ويخسر.

الخلاصة:
التعويضات = مساعدة محتملة ماشي خطة عمل.
النجاح في التصدير يجي من المنتج، السوق، والتنظيم… والباقي يجي بالتدريج.

الله يفتحها على كل واحد فيكم ويرزقنا وإياكم النجاح الحلال والرزق الواسع.

28/01/2026

تخيل تخسر صفقة دولية مربحة… غير على كلمة صغيرة في العقد؟

هذا بالضبط واش يصرا للي ما يفهموش Incoterms بزاف ناس يركزو على السعر والجودة وينساو أهم نقطة شكون مسؤول على البضاعة وفي أي مرحلة التجارة الدولية ما تمشيش بالثقة برك تمشي بالقواعد وهنا يجو Incoterms اللي ينظمو عملية التسليم بين البائع والمشتري ويقطعو الشك باليقين

Incoterms يجاوبو على 3 أسئلة خطيرة في أي صفقة:
💵 شكون يخلّص النقل؟
📍 وقتاش تنتقل المسؤولية على البضاعة؟
⚠️ شكون يتحمل الخسارة إذا صرا ضرر ولا تأخير؟

أهم المصطلحات اللي لازم أي مصدر يعرفهم:

EXW (Ex Works)
أقل مسؤولية على البائع تحط البضاعة في المصنع تاعك وخلاص المشتري يتكفل بكلش: النقل، التصدير، الشحن، المخاطر.

FOB (Free On Board)
مستعمل بزاف في الشحن البحري البائع مسؤول حتى توصل البضاعة للسفينة في الميناء من تما المسؤولية تنتقل للمشتري.

CIF (Cost, Insurance & Freight)
البائع يخلص النقل البحري والتأمين حتى ميناء الوصول بصح الخطر ينتقل كي تتركب البضاعة في السفينة.

DAP (Delivered At Place)
البائع يوصل البضاعة حتى عنوان المشتري بصح الرسوم الجمركية في بلد الوصول على المشتري.

علاش لازمك تفهم Incoterms؟
لأنهم يحددو التكلفة الحقيقية، الربح، المخاطر، وحتى طريقة التسعير. اختيار خاطئ يقدر يمسحلك هامش الربح كامل.

القاعدة الذهبية:
ماكان حتى عرض سعر بلا Incoterm + اسم الميناء/المدينة.
مثال: FOB Algiers Port / CIF Jeddah

نكمل ونشرح باقي المصطلحات بطريقة مبسطة؟

27/01/2026

علابلك بلي تقدر تصدّر ومن بعد الدولة ترجّعلك جزء كبير من المصاريف اللي صرفتهم؟

بزاف مؤسسات تشوف التصدير حاجة كبيرة ومخاطرة مالية بصح الحقيقة بلي كاين نظام دعم معمول خصيصًا باش يخلي المنتج الجزائري يخرج للأسواق العالمية بثقة وهو الصندوق الخاص لترقية الصادرات (FSPE). هذا الصندوق يساهم في مصاريف دراسة الأسواق الخارجية باش تعرف وين تبيع ويدعم تكاليف البحث على زبائن وفرص جديدة وحتى الدراسات المتعلقة بتحسين جودة المنتجات والخدمات الموجهة للتصدير. الجانب الرقمي ثاني داخل في الدعم: إنشاء مواقع إلكترونية ووسائل ترويج حديثة باش تبان بصورة احترافية قدام المشترين الأجانب. المشاركة في المعارض والصالونات الدولية اللي كانت تعتبر مكلفة بزاف ولات أسهل: الدعم يوصل حتى 50% للمشاركة الفردية و80% في المشاركات الرسمية أو الخاصة يعني تقدر تعرض منتجك قدام العالم وتبني شبكة علاقات دولية بنصف التكلفة تقريبًا. المؤسسات الصغيرة والمتوسطة عندها امتيازات إضافية: دعم في إعداد Diagnostic Export وإنشاء خلايا تصدير داخل المؤسسة ومصاريف استكشاف الأسواق الخارجية وحتى فتح تمثيليات تجارية في الخارج بدعم خاص يعني الدولة ما تخليكش تمشي وحدك في أول خطوة.

والمصاريف اللوجستية؟

حتى هي ماشي عليك وحدك. الصندوق يساهم حتى 50% من تكاليف النقل الدولي و الشحن والترانزيت مع تعويض إضافي للمنتجات الفلاحية سريعة التلف وللوجهات البعيدة، اللي عادة تكون تكلفتها أكبر. كاين دعم لإنشاء العلامات التجارية حماية المنتجات في الخارج إعداد مواد الترويج وحتى التكوين المتخصص في مهن التصدير مدعّم بقوة باش ترفع مستوى فريقك.

الفكرة الأساسية هنا أن الدولة راهي تشاركك في المخاطرة وتشجعك باش تدخل للأسواق العالمية، لأن التصدير يخلق قيمة و وظائف وعملة صعبة. اللي يبقى متردد بسبب “التكاليف كبيرة” ممكن يكون يضيّع فرصة نمو حقيقية لمؤسسته، بينما منافسين آخرين يستفادو من هاذ الامتيازات ويتقدمو عليه.

قولولي نكمل نشرح كيف تدير Diagnostic Export وتعرف واش مؤسستك جاهزة للتصدير ولا لالا؟

26/01/2026

علاش شركات تنجح وتكبر… وشركات تبقى صغيرة حتى تختفي؟

الفرق غالبًا هو التصدير

اليوم العالم ولى سوق واحد واللي يبيع غير محليًا راهو يخاطر بزاف لأن المنافس الأجنبي يقدر يدخل لسوق في أي وقت وبجودة أعلى أو سعر أحسن. التصدير ماشي غير بيع للخارج هو طريقة باش تكبر المبيعات و تدخل عملة صعبة و ترفع الأرباح وتستغل طاقة الإنتاج تاعك كامل بلا ما يبقى المصنع يخدم غير بالنص. وفوق هذا التصدير يجبر المؤسسة تطوّر روحها: جودة أحسن، تنظيم أقوى، احترام المعايير، وتسويق احترافي يعني يطلع مستوى الشركة كامل حتى داخل الجزائر.

بزاف منتجات يقدر الطلب عليهم يهبط محليًا، بصح يلقاو سوق قوي في دول أخرى ويعيشو سنوات إضافية واللي ما يخرجش للخارج اليوم يقدر غدوة يلقى روحو خسر حتى سوقو الداخلي علابيها التصدير ولى حاجة لازمة للنمو والاستمرار ماشي رفاهية.

التصدير ولى ضرورة لكل مؤسسة جزائرية حابة تكبر وتضمن الاستمرارية تاعها لأنه يفتح لها أسواق جديدة ويتجاوز بها حدود الطلب المحلي، خاصة وأن العولمة سهّلت المبادلات وخلّت السوق العالمية مفتوحة 24/24 والمنافسة ما بقاتش غير داخلية بل ولات عالمية والعالم كامل يتحرك بسرعة بفضل التكنولوجيا الجديدة وين المعلومات والسلع والخدمات والناس يدورو في وقت قصير والأذواق وطرق الاستهلاك تقاربو والمعايير العالمية للجودة والسعر ولاّت المقياس وهنا يبان دور المنتوج الجزائري اللي يقدر يلقى بلاصتو برا عند الجالية الجزائرية و المسلملة وعند مستهلكين أجانب يقدّرو خصائصو.

وفي نفس الوقت التصدير يعاون المؤسسة تزدهر وتطوّل عمر نشاطها ويزيد رقم معاملاتها وأرباحها ويخليها تستغل قدرات الإنتاج أحسن وتحقق اقتصاديات الحجم تاني يخلق مناصب شغل ويحسّن التنافسية ويرفع الشهرة ويوسّع شبكة العلاقات بصح لازم اختيار الأسواق يكون بذكاء بداية بالأسواق القريبة جغرافياً وثقافياً واللي كاين معاها اتفاقيات واختيار الوقت المناسب اللي تكون فيه المؤسسة مالية مستقرة وقادرة تغطي السوق الوطنية ومستعدة تستثمر في التوسع وبذلك التصدير ما يخدمش غير مصلحة المؤسسة بل كذلك يساهم في تحسين الميزان التجاري جلب العملة الصعبة خلق الثروة ومناصب الشغل وتقوية مكانة الجزائر الاقتصادية والسياسية.

دركا نتوما قولولي نكمل في الجزء 2 ونشرح وين وكيفاش تختار السوق المناسب للتصدير؟

04/01/2026

From Algeria to global markets 🌍

ABMS Global Trade
Your trusted partner in exporting quality Algerian products worldwide.

ABMS Global Trade

11/02/2026

11/02/2026

03/02/2026

31/01/2026

30/01/2026

28/01/2026

28/01/2026

27/01/2026

26/01/2026

04/01/2026

Adresse

Site Web

Notifications

Raccourcis

Partager

Type