20/07/2026
السلام عليكم لبنات 🥰 أن شاء نكونو بخير وعلى خير ليكم وحشة بناءا على طلب متتبعاتي
طلبوو مني الوصفة بسبوسة بحبة بيض
#السنيوة 24/24 سم او 25/25 سم
#الشاربات
كاس وربع سكر مع كاس ونص ماء وطرونش ليمون 🍋 نخلطو بارد في بارد ونحطها فوق نار كي تبدا تغلي نحسب 10 دقائق ونطفي وندير 3مغارف مزهر ونخلوها تبرد تماما يعني شاربات لازم نخدمها بكري
#العجينة
في ٱشوار درت حبة بيض أقل من نص كاس سكر ورشة ملح ولفاني وزاست تع 🍋🟩 وزاست تع برتقال اختياري ونص كاس حليب وكاس غير ربع زيت و باطا ياغورت طبيعي او نص كاس لبن وخلطت كلشي بالاشوار مدة دقيقة او أكثر
زدت زوج مغارف نواة كوكو (جوز الهند ) كاس سميد متوسط (انا درت عمور نصف خشن نحب بسبوسة بسميد خشين يعني اختياري ) وزوج صاشيات خميرة حلويات ومغرف خل فوق خميرة وخلطت كلش باشوار فتحت لقيت خليط مزال جاري زدت نص كاس سميد وخلطت دهنت سنيوة ب زيت ورشيتها بسميد وفرغت خليط سويتو دخلتها طيب على كوشة كانت سخووونة ربع ساعة من قبل ونقصتلها كي شفتها حمارت كامل من جوانب شعلتلها من فوق وحمرتها مليح بعد ماخرجتها ديراكت سقيتها بشاربات تكون بااااردة ورشيتها من فوق بنواة كوكو وبصحتكم 🥰❤️🍋🟩🍋
السر لي يخلي بسبوسة كي تقطعيها ماتتفتتش هو انك دخليها للثلاجة بعد ماطيب وتعسليها وخليها تبرد تماما باش تقطعيها هكا تتفاداي انها تتفتت معاك واذا كنتي مزروبة دخليها للكونجيلاتور مدة 20 دقيقة وقطعي وكولي بصحتك وماراحش تتفتتلك وتبقى حبة محافظة على شكلها
دمتهم في رعاية الله وحفظه احبتي في الله ❤️🥰
