05/04/2026
اكتر نوعين من الناس قابلتهم على مدار السنين
لم يكتب لهم التوفيق في مجال الكوزماتيكس
النوع الاول هما الدكاتره الشاطرين والمميزين
ايوه زي ما بقولك كده علشان شاطر قوي من يومه علشان كده تلاقيه مش متخيل انه لما يطلع بمنتج انه يكون مرطب بشره او غسول مثلا ... لأ طبعا هو يطلع بمنتج للتخلص من الوحمه الحنكوشيه القادمه من الحساسيه البوركينا فاسويه وطبعا دي محتاجه وقت وابحاث معمليه وشهادات دوليه وبيع دهب الوليه
ولما يوصل لمنتج نهائي بيكون قرب يفلس
ومتوقع ان البلد هتعمله تمثال من دهب
والملايين دي تحصيل حاصل
ولكن في الحقيقه ان عدد الناس في البلد اللي عندهم الوحمه البوركينا فاسويه قليلين وبالتالي سوق محدود جدا وصعب الوصول لهم في الاعلانات والاصعب ان علشان الابحاث والشهادات والفحوص الدوليه اصبح المنتج اغلى من مقدرة نص الجمهور ده اساسا
علشان كده نصيحتي للناس الشاطره جدا
بلاش تفكر في منتج عظيم يحل مشكله عظيمه
ومش لازم تفكر في منتج تاخد بيه جايزة نوبل
انا عايزك تفكر في حل عظيم لمشكله منتشره
حتى ولو كانت من وجهة نظرك مشكله تافهه
النوع الثاني هما اغلب اللي داخلين المجال ده
وهما بدون خبره فيه وكمان راس مالهم محدود
وعايز ينتج كميات صغيره وبالتالي غالبا بيروح
عند ناس اللي بنقول عليهم الشعبي او تحت بير السلم
ومنتج زي ده صعب يبني بيزنس
مهما كنت شاطر في الترويج والاعلانات
وهنا عايز اقول نقطه مهمه ...
الترويج والاعلانات وظيفتها الاساسيه هي انها تجيب العميل اول مره والبراند عمره ما هيقوم الا لما يكون العميل بيشتري منك اكثر من مره
واهم مسؤول عن النقطه دي هو جودة المنتج
جودة منتجك هي الاساس اللي يخلي العميل يرجعلك
وده اللي اتعلمناه على مدار السنين
وخد بالك لتغلط غلطة غيرك يا مسكين
