15/03/2023
قواعد النجاح معروفة ومش محتاجة إختراع
بس خليني أفكرك بيها بردو علشان متقولش إني مقولتلكش :)
التوكل على الله ودي مش هنعتبرها من ضمن النقاط بتاعتنا لإن ده أمر مفروغ منه.
أولاً وضوح الرؤية :
عمرك ما هتحقق نجاح بدون رؤية واضحة إنت مقررها وعارف أبعادها كويس.
يعني كلمة عايز أنجح وانت مش عارف إنت عايز تنجح في إيه بالظبط عمرك ما هتنجح.
ثانياً الإستمرار :
وأقصد بيه هنا هو إنك تبدأ في حاجة وتمشي فيها شوية فتيجي فكرة تانية في دماغك فتوقف اللي انت مشيت فيه وتبدأ في الجديد وهكذا ولو انت الشخص ده بنسبة 99% إنت مكملتش ولا فكرة فيهم لحد دلوقتي.
وحالياً واقف ومش فاهم إنت واصل للمعضلة دي ليه.
قررت تبدأ في حاجة كمل فيهااااا ولما تكمل للآخر إبقى إبدأ في حاجة تانية زي مانت عايز.
ثالثاً لا تسوف:
أكبر عدو لأي بني آدم في الدنيا هو التسويف ..
بكرة هبقا أكمل .. شوية كدة وهبدأ
وبكرة يجر بعده وللأسف يصبح التسويف عادة عندك متقدرش تتخلص منها فتوقفلك حياتك بالكامل.
إتحرك علشان الناس كلها لو مبطلتش تسويف هتتقدم عنك وانت هتفضل ورا وصدقني هتزعل أوي من ده وهتزعل المسؤولين منك.
رابعاً التعلم:
مش عيب إنك تتعلم حتى لو في سن كبير خالص على فكرة، العيب هو العند في إنك عارف كل حاجة .. التعلم المستمر هو اللي هيخليك كل يوم نسخة أفضل من نسخة اليوم اللي قبله.
خامساً تنظيم الوقت:
الدقيقة اللي بتروح منك مش هتعرف ترجعها تاني أبداً فخليها متروحش على الفاضي، فمتخليش وقتك كله حاجة واحدة بس .. خصص وقت لشغلك ووقت لعبادتك ووقت لراحتك النفسية ووقت لبيتك وعيلتك.
سادساً الإلتزام:
والإلتزام هو والتسويف أعداء .. الإنضباط والإلتزام اليومي بخطواتك اللي حاطتها لنفسك هو اللي هيوصلك للنجاح مش أي حاجة تانية.
سابعاً التخطيط المسبق ليومك:
حاول كل يوم قبل ما تنام تبقى عارف انت هتعمل إيه بكرة وده من أهم عوامل تنظيم الوقت.
سادساً المعافرة:
في طريقك لو نفذت النقط اللي فوق دي فانت بنسبة كبيرة ماشي كويس .. ولكن مش معنى إنك ماشي كويس إن مفيش مشاكل هتقابلك ..
أكيد هتقابلك مشاكل وخلي النظرية دي قدام عنيك دايماً
"تقبل المشكلة لإنها بتعلمك حاجة مش هتتعلمها غير بيها"
وكمل ودايماً عينك على الحلول مش على المشكلة نفسها ..
وتأكد إنك هتوصل لهدفك رغم المشاكل اللي ممكن تقابلك.
سابعاً إنت مش الأهم:
تخيل لو انت عايش لوحدك تماماً ملكش أصدقاء ولا تعرف مين أهلك ولا عندك أسرة وبيت وأطفال
حياتك هيكون ليها معنى إزاي؟
مش هيفرق معاك حاجة ولا هيفرق معاك نجاح ولا غيره..
فانت مش أهم حد في حياتك لإنك لو الأهم كنت وانت لوحدك كدة سعيت للنجاح
أهلك وبيتك وأولادك أهم منك فاختار تخلي الأهم منك مبسوطين ومطمنين
بس كدة
