24/06/2026
عايز تنجح في حياتك العملية:
أعرف إن النجاح مش بالدراع لأنها مش خناقة مع الدنيا، اللي هيتخانق مع الدنيا هتكسره بدري بدري
١- النجاح يعني استمرار في السعى، مهما واجّهت من تحديات اسعى، فشلت في شغل كمل سعي، الناس شايفاك ضعيف ومش فالح كمل سعي، المرتب قليل أو المكسب قليل كمل سعي وكأنك متبرمج على موجه واحدة وهي استمرار السعي..
ودي مش نصيحة مني دا كلام ربنا.. وَأَنْ لَيْسَ لِلإِنسَانِ إِلَّا مَا سَعَى
دي تجربة أي إنسان ناجح.
٢- الصبر:
يعني متستعجلش النتايج، خليك هادي ومطمن إن حقك مش هيضيع مهما إتأخر، مش علشان الدنيا عادلة لا خالص، لكن ربنا عدل وفتاح وهتشوف كرم الله وعطاءه بس أنت اصبر وأنت مطمن إن الفتح هيجي.
٣- إنشف:
يعني لما تضرب قول "أي" لكن خد نفس وكمل، متركنش تتحسر وتلوم الدنيا والناس، خد نفس وركز في طريقك وخلي الوجع هو الحافز اللي يخليك تجري لقدام فتحول الوجع لطاقة أمل.
٤- راعى اوى الناس:
خليك كويس مع الناس اوي، هتكسب ٩٥٪ من الناس، مش علشان كلهم كويسين لا ولكن ربنا هيلين القلوب الناس لك وهيقبوا مصدر للفتح والناس هتقويك أوى في ٥٪ مهم تبعد عنهم لأنهم مؤذيين وهتشوف الفرق لما يخرجوا من حياتك، وطول ما أنت كويس بجد مع الناس ربنا هيبعد عنك الناس المؤذية في الوقت المناسب.
٥- صدق ربنا:
إن هو والله الرزاق مش أنت ولا الناس، فاسعى وأنت مسنود ومرتاح، فاسعى بلا قلق وتوتر وخوف من المستقبل فتبقي كل طاقتك في السعى فتنجز اكثر.
وقتها هتعدي السنين عليك كل يوم في إنجاز جديد وكل يوم في أثر في عمارة الأرض وهتشوف فتح ربنا عليك.
على فكرة دا مش كلام دي رحلة ربع قرن ناس كثير عاشتها وسبقوك فبلاش تضيع وقتك في سكة وهمية
