16/04/2026
أنا بطلب من فريقي 500 مكالمة يوميا ومع ذلك مفيش مبيعات!
لو الجملة دي انت قلتها قبل كدا، يبقى المشكلة مش في الفريق بس ,لكن فيك كمدير.
خليني أقولك موقف بيتكرر في شركات كتير:
مدير مبيعات حاطط Targets عالية,متابعه يوميًا، بيضغط على الفريق، والأرقام على الورق (شكلها كويس) لكن في الحقيقة مفيش بيع بيحصل.
ليه؟
لأنه ببساطه بيدير أرقام، مش بيدير منظومة.
تعال نرجع خطوة ورا، الإدارة مش Target وخلاص، الإدارة 4 وظائف أساسية:
1️⃣التخطيط
مش إنك تقول "عايزين نبيع أكتر", لكن تحدد:
هنبيع بكام؟ منين؟ وإزاي؟
مثال: تحديد عدد المكالمات او الاجتماعات المطلوبة يوميًا لتحقيق التارجت
وهنا لازم يكون الهدف اللي بحطه SMART
S:specific يعني هدف محدد وواضح, مثلا مطلوب عدد 4 زيارات في اليوم.
M: Measurable قابل للقياس, عشان اقدر اقيس النتيجه.
A:Achievable قابل للتطبيق, يعني مطلبش من الموظف 300 اجتماع في اليوم.
R: Relevant يكون مربوط بالهدف الاكبر, مثل عمل 4 زيارات بحيث نقفل منهم بيعه بقيمه 10 مليون, فدا هيأدي اننا نوصل لهدفنا الاكبر.
لكن مينفعش احط هدف للموظف غير مربوط بالهدف الاكبر, زي مثلا, إنه يحقق عدد مكالمات كبير يوميًا بدون تحديد جودة المكالمات أو تحويلها لزيارات فعلية.
T: Time bound يكون الهدف محطوط اطار زمني لانجازة
يعني مطلوب من الموظف انه يبيع ب 15 مليون جنيه في الشهر او في ال 3 شهور, المهم يكون فيه اطار زمني.
يلا ناخد مثال عن❌ الفشل في وضع هدف SMART عشان نتجنب الخطا دا كمديرين
مدير مبيعات قال لفريقه: (عايز كل واحد يحقق 500 مكالمة في اليوم)
ظاهريًا ده هدف واضح وقابل للقياس لكن الحقيقة إنه غلط
مش Relevant:
المكالمات الكتير من غير جودة أو تحويل لزيارات مش هتزود المبيعات.
مش Achievable:
الرقم مبالغ فيه وهيأثر على جودة الأداء.
مش Time-bound بشكل صحيح:
مفيش ربط بزمن لتحقيق نتيجة فعلية (مبيعات)
والغلطه الكبيره هنا انه ركز على Activity مش نتيجة حقيقية اللي هي البيع,
والنتيجه هنا الفريق هيجري ورا الرقم, مكالمات سريعة، بدون تأهيل، بدون إقناع.
وفي الآخر؟ مفيش صفقات حقيقية.
✅التصحيح:
الهدف يكون:
(تنفيذ 150 مكالمة يوميًا بجودة عالية، ينتج عنها 40 مكالمة فعالة، و8 زيارات، بهدف تحقيق 2 عملية بيع أسبوعيًا)
كدا انا وضحت بشكل مبسط الوظيفه الادارية رقم واحد وهي التخطيط,
نيجي للوظيفه الادارة رقم 2 وهي التنظيم.
2️⃣التنظيم:
مش إن كل واحد يشتغل وخلاص
لكن توزيع واضح: مين مسؤول عن إيه
مثال: في فريق الاتش ار موظف مسئول عن التعيينات وموظف اخر مسئول عن المرتبات.
غياب التنظيم = شغل كتير و نتيجة ضعيفة
3️⃣الوظيفه الادارية رقم 3: التوجيه
مش إنك تتابع بس, لكن تساعد فريقك يشتغل صح.
مثال: مراجعه مكالمات الكول سنتر وتصحيح الأخطاء واعطاء النصائح مش مجرد لوم.
الهدف من التوجيه هو مضاعفة الأداء مش لوم.
4️⃣والوظيفه الرابعه: الرقابة:
مش إنك تستنى آخر الشهر عشان تدور على النتيجه, لكن تتابع يوم بيوم.
مثال: متابعة الـ Calls والـ Follow-ups و حجم البيع اللي تم تحقيقه قبل ما الشهر يخلص ومنوصلش لحاجه.
المشكلة إن في مدراء كتير بيركزوا على "الرقابة" وينسوا باقي الادوار والنتيجة بتكون ضغط على الفريق و حجج و أعذار ونتائج ضعيفة.
الإدارة مش ضغط على الفريق, الإدارة نظام يقود الي النتائج بشكل طبيعي.
وده الفرق بين مدير بيجري ورا الناس, ومدير بيقود منظومة بتكسب.
فدايما انت كمدير فكر كدا:
1-خطط
2-نظم ووزع التاسكات
3-وجه وساعد وصحح
4-راقب واتأكد انك ماشي في اتجاه الهدف.
