د. علي فتحي Dr. Ali Fathi

Call Website

د. علي فتحي Dr. Ali Fathi � مرحبًا بك في "قمة النجاح" - بوابتك نحو التميز المهني والشخصي! �

31/10/2026

الوعي في أوقات الصعاب .... 🤔🤔

الإنسان الواعي مش بيستسلم للظروف أو اللحظات الصعبة، بالعكس، بيزوّد سعيه أكتر، حتى لو ده كلّفه شوية حرمان أو ضغط.

المهم يكون هدفه واضح وأولوياته محددة، لأن الوصول للهدف أهم بكتير من الراحة المؤقتة. 💪

بس عايز أقولك حاجة مهمة: اللي بيصعّب الطريق مش دايمًا الظروف، ساعات بيبقى الناس اللي حوالينا.⛓️‍💥

زميل بيضيّع وقته وبيضيّع وقتك معاه، أو شخص مش مُحفّز بيبطّئ خطواتك وبيطفّي حماسك. 🐢

علشان كده:
✅ صاحب ناس بتشجعك وبتنافسك منافسة شريفة
✅ ابعد عن اللي بيسحب من طاقتك ومحركاتك
✅ وكمان، كن انت الشخص المحفّز في دايرتك، وساعتها اللي حواليك يا يتحرك معاك يا يبعد من نفسه

اختار صحبتك بنفس حرصك على اختيار هدفك. 🎯

💬 قولي: مين الشخص اللي كان له أثر إيجابي في مسيرتك؟ ومين فيكم لاحظ إن البيئة غيّرت مساره؟

د. علي فتحي

#التحفيز #الصحبة #الوعي #الازمات

24/10/2026

منتشرة اليومين دول، وعايز أسمع رأيكم فيها 👇

تلاقي الشركة طالبة وظيفة، وكاتبة المسمى الوظيفي بس، وخلاص.

وتلاقي الموظف متقدم للوظيفة دي وهو مش عارف عنها حاجة: لا متطلباتها، ولا دوره فيها، ولا إيه المطلوب منه.

ولما تقعد مع الشركة تقولك: أنا طلبت وحددت الوصف المطلوب والمؤهلات كمان.

ولما تقعد مع الموظف يقولك: أنا معايا المؤهلات، ودور الشركة تدربني على اللي مطلوب مني علشان أشتغل.

طيب... ممكن أتقبل الكلام ده من حديث التخرج، لسه بيبدأ ومعذور.

لكن موظف خبرته فوق 20 سنة؟ يتقدم لوظيفة وهو مش فاهم دورها؟ 🤔

هنا بقى أنا معترض، وعندي أسئلة:

❓ هل المسمى الوظيفي من غير وصف وظيفي واضح يعتبر إعلان وظيفة أصلاً؟
❓ هل التدريب مسؤولية الشركة بالكامل، ولا للموظف دور إنه يسأل ويفهم قبل ما يتقدم!! لا وكمان يستعد؟
❓ الغلطة فين بالظبط: في الشركة، ولا في الموظف، ولا في الاتنين؟
❓ وإزاي نحلها؟

📢 المساحة مفتوحة للنقاش، وعايز أسمع تجربتكم: من جانب صاحب العمل، ومن جانب الموظف، ومن جانب الـ HR.

21/10/2026

لا تبحث عن وظيفة فقط … ابحث عن بيئة تنمو فيها.

#البحث #الوظيفة #البيئة #النمو

20/10/2026

كتير مننا بيصحى من النوم ويلاقي نفسه عايش اليوم بس علشان يعدي .. لا مرتاح ولا مبسوط. وفجأة بيسأل نفسه: هو أنا ليه مش حاسس بحاجة؟

الحقيقة إننا اتعودنا نقيس الانبساط بحاجات من بره: حاجة جديدة نشتريها، سفرية حلوة، خروجة مختلفة. ودي كلها حاجات لها قيمتها ومكانها، وللانبساط معايير تانية مهمة كمان. بس فيه معيار بنغفل عنه، وهو إن اليوم نفسه عدّى بخير.

يوم عدّى من غير ابتلاء ولا مشكلة ولا خبر وحش، دة في حد ذاته مش سهل، وهو نعمة من ربنا مش بنحس بقيمتها غير لما تتسحب مننا.

وفكّر كمان في اللي مكانك النهارده: ناس اليوم ده ما عدّاش عندهم. فقدوا حد عزيز، أو واقفين قدام مشكلة أكبر من طاقتهم ومش عارفين يواجهوها.

علشان كده، المرة الجاية اللي يعدّي عليك يوم بسلام، متستناش حاجة تانية تفرّحك. انبسط، وقول من قلبك: الحمد لله على النعمة.

يمكن الراحة اللي بتدوّر عليها كانت موجودة من الأول، وإنت مش واخد بالك.

#الرضا #تأملات

17/10/2026

اوعى تستغرب لما تلاقي نفسك شغال وسط ناس شاطرة، عندهم استعداد للإبداع وأفكار جديدة ومبتكرة، ومع كده عمرك ما تسمع منهم فكرة واحدة.

والسبب مش إنهم خايفين، ولا إنهم ملقوش فرصة.🤔

السبب إنهم مش متعودين يبادروا.❗

اتعودوا إن أي حاجة لازم تيجي لهم في شكل طلب أو أمر، فبقوا مستنيين حد يدّيهم الإذن الأول،

وده الغريب بجد: الفكرة موجودة وجاهزة، لكنها واقفة على الباب مستنية حد يفتحه.🚪

إنت ماتعملش كده. عبّر عن نفسك، وامسك أي فرصة تيجي لك حتى لو مش مكتملة،

لأن الفرصة الناقصة اللي تتحرك عليها أحسن من الكاملة اللي تستناها. ⏳

خد بالك محدش هيطلب منك موهبتك، لإنك إنت المسؤول الوحيد عنها.

د. علي فتحي

17/10/2026

🤔 سؤال محتاج إجابة صادقة منكم...

لو اتخيرت بين الاتنين في شغلك أو حياتك، أنهي أهم؟

🏆 التقدير: حد يقولك "شكرا، تعبك مش رايح هدر"
🤝 التعاطف: حد يحس بيك ويفهم ظروفك من غير ما تشرح

فيه ناس بتقول إن التقدير هو الوقود اللي بيخليك تكمل وتبدع. وفيه ناس شايفة إن التعاطف هو اللي بيحسسك بالأمان وإنك مش لوحدك.

طب وإيه رأيك إنت؟
❓ هل التقدير مطلوب أكتر؟
❓ ولا التعاطف؟
❓ ولا الاتنين بنفس القدر؟
❓ ولا عندك رأي تاني خالص؟

اكتب لنا في التعليقات، وقولنا إيه اللي بيفرق معاك أكتر، وليه 👇💬

د. علي فتحي

#التقدير #التعاطف

15/10/2026

البيئة هي اللي بتصنع الأرجوز، بس تعال أعرف إزاي تكسر المسرح اللي عايش عليه....

الأرجوز بيعيش ويكبر في بيئة فيها:
✔ أهداف غامضة
✔ ترقية بالعلاقات
✔ تقييم من شخص واحد
✔ عقاب لأي اختلاف في الرأي
وبيهرب من بيئة فيها مؤشرات أداء معلنة، وتقييم، وشغل بيتقاس بنتيجته مش بحضوره.

يعني الأرجوز مش مشكلة موظف ... دي مشكلة نظام. 🏢

لو عايز تقضي عليه، متحاربوش.
غيّر المسرح اللي بيصفقله:
حوّل الكلام لمهام مكتوبة بأسماء ومواعيد، وكافئ اللي يعترض بمنطق، وقيّم الناس بنتيجتها مش بقربها.

وبعدها اسأل نفسك بصراحة: انت في شركة ولا في سيرك؟ 🎭

#الأجواز #مهام #الاداء

11/10/2026

مين هو الموظف الأرجوز وليه موجود؟

الموظف الأرجوز 🎭

مش بيشتغل... بيمثّل إنه شغال.

أول واحد يضحك على نكتة المدير، وآخر واحد يفتكر الـ deadline والالتزام بالمواعيد.

حافظ عيد ميلاد المدير ومزاجه الصبح أحسن من وصف وظيفته.

والمصيبة إن الأرجوز مش هو المشكلة.

هو بيطلع لفوق مش لأنه شاطر، لكن لأن فيه مدير محتاج جمهور يصقف ليه مش فريق يشتغل ويتعب.

المدير السوي بيدوّر على اللي يقوله "فيه مشكلة تعال نشتغل علي حلها".

المدير الناقص بيدوّر على كلمة "حاضر يا ريس"، وبيسمّيها ولاء وانتماء. 🎪

وأخطر حاجة في الأرجوز إنه عمره ما بيشوف نفسه أرجوز: بالعكس شايف أن "ده ذكاء اجتماعي." أو أن "الدنيا كده." لا وايه ده "أنا بنجّح المدير."

التبرير الأخير بيقنعه إنه شريك في النجاح، وهو في الحقيقة مجرد منافق في شكل مرآة. 🪞

#الارجوز #المدير #النفاق

Address

Cairo

Alerts

Be the first to know and let us send you an email when د. علي فتحي Dr. Ali Fathi posts news and promotions. Your email address will not be used for any other purpose, and you can unsubscribe at any time.

Shortcuts

Share