06/03/2026
منگلا ڈیم کی تعمیر 1967ء میں مکمل ہوئی، جسے بنے ہوئے آج تقریباً 58 سال سے زائد عرصہ گزر چکا ہے۔ اس ڈیم کی تعمیر کے وقت میرپور اور اس کے گرد و نواح کے لاکھوں لوگوں کے گھر، کاروبار، کھیت، بستیاں اور قبرستان پانی کی نذر ہو گئے۔ ایک پوری تاریخ اور بے شمار یادیں اس پانی کے نیچے دفن ہو گئیں، جنہیں وقت کے ساتھ بہت حد تک بھلا دیا گیا۔
مگر بھور ڈڈیال (میرپور) کے مقام پر موجود یہ تاریخی مسجد آج بھی اپنی اصل حالت میں قائم ہے۔ جب ڈیم کا پانی بڑھتا ہے تو یہ مسجد پانی میں چھپ جاتی ہے اور جب پانی کم ہوتا ہے تو دوبارہ اسی شان کے ساتھ ظاہر ہو جاتی ہے۔
یہ مسجد میرپور، جموں و کشمیر کے علاقے بھور ڈڈیال میں واقع ہے اور مقامی لوگوں کے لیے تاریخی، ثقافتی اور روحانی اہمیت رکھتی ہے۔
تقریباً چھ دہائیاں گزرنے کے باوجود اور برسوں پانی میں رہنے کے باوجود اس مسجد کی مضبوط تعمیر اور قدیم طرزِ تعمیر آج بھی دیکھنے والوں کو حیران کر دیتی ہے۔ یہ مسجد میرپور کی تاریخ، صبر اور اسلامی ورثے کی ایک زندہ مثال ہے جو وقت کے ہر امتحان کے بعد بھی قائم ہے۔
