06/02/2026
Shock 鯨！ 🐋🩸全港首創「黑水虻 × 朗氏喙鯨」保育任務
月黑風高嘅夜晚，幾個黑影拖住一個血淋淋嘅袋，潛入我哋廠房。
「做嘢。」
喺慘白嘅燈光下，眾人打開個袋，拿出屍骸，一陣腥味撲鼻而黎。但佢哋面不改容，搬出一箱箱蠕動緊嘅黑水虻幼蟲，鋪天蓋地咁倒落去……
「要幾耐搞掂？」
「個半月。」
——————
放心，我哋唔喺拍恐佈電影! 上年四月，我哋喺執行緊一個前所未有的任務: 利用黑水虻技術，修復鯨魚骨骼標本。
袋入面嘅主角，係早前大澳不幸擱淺、全球極稀有嘅朗氏喙鯨 (Longman Beaked Whale)。 佢哋平時隱居喺印度洋同太平洋嘅深海水域，行蹤極之神祕，全世界目前只係紀錄過 7 個完整嘅骨骼標本。 最令人心痛嘅係，解剖發現佢胃部有一個一米長嘅帆布袋。
———————
呢次任務係 「鯨豚與海洋：STEAM學生大使計劃及鯨豚保育展覽」 (由環保及自然教育基金 ECF 資助) 嘅重要一環。 透過協作同展出朗氏喙鯨的標本,我哋希望推動鯨豚及海洋保育的議題, 並啟發下一代，用基于自然的解决方案 (nature based solutions)去解決環境問題.
我哋嘅專業團隊（Dr. Derek Ho , Prof. Scott Chui 同嘉銘）化身為「入殮師」， 利用黑水虻呢班「大自然清道夫」， 幫鯨魚清理軟組織，留住最完整嘅骨骼做標本。 過程非常艱巨，由處理鯨屍到倒入成箱嘅黑水虻幼蟲 ，絕對係一次官能與視覺嘅雙重震撼。
—————
將呢副骨修復成標本，係我哋送俾海洋嘅一份禮物。我哋好榮幸可以開拓生物科研嘅新高度，並用行動證明：原來由黑水虻帶動嘅『循環經濟』，一樣可以喺海洋保育上面扮演重要角色。
衷心感謝 Division of Science, Lingnan University 嶺南大學科學教研組 , The Hong Kong Polytechnic University - PolyU 、鯨豚生態研究所 (Cetacea Research Institute) 以及 Ocean Park Conservation Foundation, Hong Kong (OPCFHK) | 香港海洋公園保育基金 辦理呢個咁有意義嘅計劃。
#鯨豚與海洋 #川上生物科技 #環境及自然保育基金資助 #香港科研
