08/01/2021
Joe Bidena lo hmuah ve nan...
*MAURUANGI A NI, BINGTAI-TÛKI A NI E...*
Mawng sawh dawm dawm...
Dr PC Biaksiama,
8 Jan 21, Zirtawpni.
Nghakhlel taka Tlumtea thlira kan lo thlir Donald Trumpa ni lo zawk, Joe Bidena chu mawngkawhur president ni tura buatsaih a lo ni ta maw! Amah lo hmuah nan kan Mizo thawnthu ṭhenkhat rilruah a lo lang zut zut mai!
Mauruangi, vai lalpa nupuia a han awm bik chu a nuhrawn chuan a itsîk em em a, Mauruangi hnenah chuan, 'Vawk ka talh ang che,' tiin an khuaa zin turin a chah a. A va zin chuan tui chhuan sovin a lo leih hlum a, a ruang chu daipâwnah an paih bo daih a. Mauruangi hruai leh tura va kalte hnenah, 'Hei hi Mauruangi chu a nih hi, hruai rawh u,' tiin ama fa chuam Bingtaii chu a lo theh chhuak a. Mo hruaite chuan tui lo em em chungin Bingtaii chu an zâwn haw ta a. Haw kawngah te chuan, "Mauruangi a ni lo, Bingtai-tûki a ni e...C### bingtai-tûki" tiin a mawng an sawh leh dawm ṭhin a. He kan Mizo thawnthu hian tun laia kan dinhmun hi a lo va hril lawk chiang em. Kan ngaihthlak zel chuan Saza-in Mauruangi chu a lo tidam leh a, pûk chhungah a pu Sazaa nau a awm ṭhin a, chuta ṭang chuan nau awm hla chul thei lo a lo piang a; "Hmanah chuan, hmanah chuan, vai lalpa nupuiah ka awm e; tunah chuan, tunah chuan, ka pu sazaa nau ka âwi e, Aiah i e, u âw êêê," a lo ti diai diai mai a. Chu nau awm hla a sak ri aṭang chuan amah zawngtu, a pasala chhiahhlawhte chuan an rawn hmu chhuak ta a, hlim takin an innei leh ta a. A nupui duplicate zawk Bingtaii chan erawh erawh chuan "maian chan" pawh a tluk leh tak lohzia chu sawi zui a ngai lo ve. Mauruangi thawnthu bakah, Raldâwna leh Tumchhingi te nupa kara Chawmnu lo tlâkzeh dan leh a tawpa Raldâwna'n a insualtir a, Tumchhingin Chawmnu chu ngûnhnâm hriam taka a fik hmawk thu te kha tukin ka zing tho chu a lo lang tlat mai!
Bumna tinreng leh vote rûk khawm hmanga dawtthu hmanga an tihtlin tak Joe Bidena chu vai lalpa nupuia awm turin Bingtaii chanvo a han luah ve dawn poh chu a ni a. Khawvel hi a letlingin a linglet zo ta a nih hi.
Lehlamah a khingpui Trumpa chuan a K*t dinglam thapui chakna hmang duh tlat lovin, a veikhawrna lam hlir a hmang a. A thawhpui tura a mi duhsak deuh deuhten Juda Iskariota iangin an phatsan zel si a, a tawpah phei chuan a chhang eitute ngeiin a tukkhum lamah hêm an thlak ta chawrh chawrh mai a, a Lalpa dungthûlin tihelna leh sawichhiatna tinreng nen, thiamthu reng reng nei lovin Krawsa khenbehna a tuar ve ta a ni.
America rama ringtute chauh ni lo, khawvel ram hrang hranga ringtute leh ṭawngṭai miten bâng lovin an ṭawngṭai a, keini Mizo kristiante zingah pawh ani anga kan ṭan tlan leh Lalpa hnena inthuruala kan ṭawngṭaisak ang hi lei mihring zingah tumah an la piang lo, an piang leh tawh lo vang. Tun ang dinhmun ṭha lo taka a awm hnu pawh hian rawngbawltu tam tak chuan an la pawm zam thei lo va, Pathian aw hretu mi tam takten an mithmuha thil thleng chu awih thei lovin, "Hei hi a tawpna a ni thei lo. Lalpa hian miracle hmangin tih tur a la nei," tiin an la beidawng thei lo. Heti taka Lalpa mite ṭawngṭaina hi a lothlâwnin a riral mai lo vang. Tumah dem an ngai lo, Pathian chet hun hi rinna leh beiseinain kan thlir reng dawn. Ka Chhandamtu chu a nung tih ka hria, a ni lo'm ni?
*PARTE-I MUALCHIN THUCHAH: Donald J Trump*
(Hei hi Washington DC a cheng, Parteiin thlarau aṭanga a thu dawn a ziah a ni)
"Nang Donald Trumpa, sualnain a chim pil mek America-ah hian ‘Arsi êng tak angin i lo her chhuak a, miten an hriatthiam leh hriatthiam lohna che hian "I R
ropuina leh i hlutna pakhat mahin a tihniam chuang lo va... he k*m 4 chhung chauh hian Pathian Hnam thlante tan salchhuahna dar ri mawi ber chu lei leh Van hriat turin i rawn vua a... Thuthlung Hlui huna mi huaisen Josua leh Davida te sulhnu chhuiin Pathian tana hmun pawimawh ber Jerusalem khawpui chu Pathian hmingin i la lêt leh a.
Khawvel tana Nunna petu Isua meuh pawh kha an khengbet a, khawvelin a khenbeh vanga thiam loh chang zingah chuan nang leh mi thianghlim kal ta, Rome hun laia ennawm chhuah nana an tihhlum tak te , Pope hovin an hâl hlum tak te, tihduhdahna tuara têl so a an tihhlum tâkte nen ... Isua rualin chatuanin Arsi eng ber ber te in ni thung tawh ang...
I thawhrimna leh i tawrhna te leh thudik chu lei leh vanah ROHLU ber a ni fo vang, chatuan pawhin.
Eng chu thim zingah a lo eng a, mahse thimin Amah chu a hre lo.
Lei leh Van inkara hmun pawimawh ber, Pathian Khawpui Jerusalem leh Hmun thianghlim chu a chawimawi a, Diabola sa huat ber chu a khawih a, a tuar a, an khengbet a, dikna zawng zawng an hlihthlaksak a, sa ruak in an dah ta a ....
Baptist-tu Johana lu kha hmeichhe naupang mai mai in a ngen vanga tan mai a nihna chhan kha... Thlarau mi ropui ber ber te pawhin ‘Vanah chauh a chhânna kan hmu thei ang’ an ti thin a ni.
*Dikna a fam ta, Felna meuh pawh a tlawm ta ... Kalvary tlang hlimthla chu.*
*LALPA A CHE TAWH ZAWK DAWN.* Kan pu Trumpa an tihtlak tuarpuituten mimal taka min rawn tuarpui ve-na thu hi dawn sên loh khawp ka dawng a, a mak zawk hle. Mimal thil pawh a ni lova, kan Pa Ram Thil leh Setana indona a nih avanga ṭhahnemngai ṭheuh kan ni zawkin ka hria. Setana do ber Trumpuia ṭantu nih hahthlak zia hretute in ni ve thovin ka ring. An han titla ta hian mi a tihahdam ta sawt zawk a, nizan pawh ka mu tui em em mai zawk zu nia. Ṭang ṭoh renga awm ṭhin kha, tunah chuan kan hahchawl ta hlauh mai a ni lawm ni? Hahchawl thei lote tan tun hi hahchawlhna hun a ni zawk a; kan aiah Lalpa zawk a lo che tawh thung dawn, tih hi kan innghahna a ni ta.
*Rin tur zawng zawng Lalpan min pheh thlaksak zel si a.* A hma khan Voter mipuiin an chîm hum hum ṭhin a, mahse Setana hoten an vote an lo tichingpen vek si a. Court lamah an zualko a, mahse kan rinchhan tak Supreme Court thlengin thiam thu reng reng pek phalsak an ni si lo. Congress rorelnaah a thuneitu ber Chairman chu ama thawhpui bul ber, a tana ṭhahnemngai ber anga ngaih Vice President a ni a, kan lo thlamuanpui em em laiin a pu phatsantu lian ber a lo ni leh si a. Congress jt. Session-a vote laknaah tal a tling thei ang e, tih lahin ama party mi leh sate ngei chu amah paihthlatu zingah an tel duh tlat si a; a k*t an phuar sak a, a ke an pheh thluksak miau chuan din ngaihna rêng a awm ta lo a ni. Congress-in a khingpui pa tlinga an han puan khan White House a thawktu ṭhenkhatte ngei pawh an ṭîl ṭhen nual ta mai bawk a ni.
*HNAWL LEH PHATSAN.* Amah eptu Democrat-te chauh ni lo, a thawhpui, ama party Republican hotu lawkte nen phiarru-in, tih tlak tuma an beihrawna, amah lahin thapui tak tak - martial law puang thei reng chunga a puan duh si loh avangin amah phatsantuten an beihna chu a lo dawh ta ringawt mai a ni. Pathian remtihna a nih loh chuan martial law pawh kha innghahna tlak a ni ber lo thei bawk. Ni 6 nia Congress rorelna In lian Capitol Building, Trumpa supporter-ten an luhchilhnaah pawh khan, ama mi leh sate chu kristian ṭha, polite taka che an ni; mahse an zingah Antifa-ho bus load khat rawn inphur lutin, an rawn inphum ru a, Trumpa ho tihhmingchhiat nan a pawi khawih zawnga che te kha an ni tih an man chhuak leh tawh bawk.
*Nang lehzel maw, Brutus?* Rom lal Kaisara te zinga ropui leh hmingthang ber Julius Caesar-a kha, a khawnbawlte k*ta thi kha a ni a. Chung milian zinga a mi rin ber pakhat chu Brutus-a a ni. Kha Kaisara kha a rorelna inchhungah ngei a khawnbawl upa, a rin tak takten an beihrawn a, k*t an thlak tluar tluar mai a. A mi rin ber Brutus-a chuan a âwmah tak ngunhnâma a vih laia Caesar-a thi tur chuan mak ti takin, *"Brutus, nang lehzel pawh maw?"* (Et tu, Brute) a lo ti ṭawk ṭawk e, an ti alawm. Nimin mai a ni a, US Congress-ah chuan Constitution-in inthlan buai chungchang rel fel dan tur kawng hnih a nei a. Bidena tling zawk se, an tih chuan 1887 electoral vote chhiar dan Act hman theih a ni a. Trumpa tling zawk se an tih chuan 1804 dan, 12th Amendment hman theih a ni. Mahse, Trumpa chu ama Vice President ṭang lai leh tunah pawh a running-mate ngeiin a hnung lamah 1887 danin a vit (backstabbing) ve ta thawih mai a, *Nang lehzelin min vit ang maw, Mike Pence?* ("Et tu, Mike Pence?") a ti ve ta a ni.
*A bul ṭanna chauh a la ni e.* Thihna a awm phawt loh chuan thawhlehna a awm thei lo. Nimin tlaia min phone tute hnena ka thu lo hrilh ber chu: "Khawvel hi bo mahse Isua ka nei," tih hi a ni. A tira ṭawngṭaia ṭan la tura min kotu Lalpa khan a thu a la zûk lo, a thutiam a la sût hek lo. Trumpa hi a chak lutuk a, a thih phawt a, engmah tithei lova a awm phawt a ngai. Chu hun chu kan thleng chiah. Bible ah Miracle lian tham a thlen dawn reng rengin mihring lam lo innghahna zawng zawng a paih thla fai vek phawt ṭhin. Congress puihnaa tlin chuan Pathian a ropui dawn lo, chutiang bawkin thil dangte pawh a ni zel. Tichuan Lalpan hna a thawk thei tawh ang. Sorkar leh tur tana inbuatsaihna chu tluang takin kal rawh se; Trumpa pawhin a hnial tawh lo bawk; mahse US president 46-na tur tak tak hi, thil tenawm leh bumna zawng zawng pawisa lotu Congress thu nge van lam thu?- Tunah hian Van lam Court in ro a rel mek a ni tih i hria ang u. He court of heaven rorelnaah hian kristiante pawh hi eng ang ringtu nge kan nih min thliar hrang ṭan ta tlat a nia. USA ah pawh rawngbawltu ṭhenkhat an zâm tawh a, ṭhenkhat erawh chu an zâm teuh lo mai. Trumpa ngei pawhin lalṭhutthleng chu kian reng mahse a la tlâwm (concede) lo tih a lanna chu: "Bul kan ṭan chauh a ni," (It's just the beginning) a la ti thei a ni. Jaira fanu chu a thi nia hretute chuan an ṭah vak vak a, a la nung a ni tih hretu Isua chuan, "Ṭap suh u, a thi lo ve, a muhîl a ni zawk e," a ti a ni (Lk. 8:52). Tuna Congress-in Joe Bidena president-elect tia a puanna hian Pathian thilmak ropui a tihna tura dâl thei thil a thenfaina hmanrua mai a ni e. Ngawi ula, Lalpa ka ni tih hre rawh u" min ti a, tunah chuan mihring lama innghahna tur min lak kiansak vek ta bawk a, hahchawl chungin, Lalpa thu chauh i ngaichang tawh ang u.
