20/09/2026
https://www.facebook.com/photo/?fbid=823321749833598&set=a.406392438193200
مثل هذا اليوم قبل سنه بالضبط انقبلت بالتسريع من بين 500 طالب تقريبا بكل انحاء العراق
اني ، #مسرع سنة 2022 بمعدل عبر ال 100 !
وهاي قصتي
كانت شروط التسريع هي ثلاث مراحل , الاولى بالخامس العلمي لازم نجيب درجات 96 بكل المواد بالكورسين وهذا الشي شويه صعب خصوصا اذا مدرستك متميزين ودراستك اصعب ومشدده اكثر من بقيه المدارس
الشرط الثاني هوه عبور امتحان الذكاء والتحصيلي الي تقريبا اصعب شي بيه نفسيا , اتذكر مريت بيه بحالات ومواقف نفسيه هوايه , الفارق بين امتحان التأهيل ( التحصيلي والذكاء ) والخامس هو تلث اسابيع
بهاي ال3 اسابيع يريدون منك تتحضر لأمتحان القدرات "الذكاء" وامتحان التحصيلي الي يشمل اربع مواد كيمياء وفيزيا ورياضيات واحياء
اسئله الذكاء جانت متوسطه تقريبا بس الطامه الكبرى هي بالتحصيلي
عدد الأسئله جدا هواي ونصهن الى اغلبهن جانن افكار خارجيه وجابولنه من الحذوفات ببعض المواد وجابو شغلات من سادس حسبما اتذكر
الوقت هو ساعتين تمتحن هاي الاربع مواد , جان وقت قليل كلش و وقت الذكاء كان 20 دقيقه و 20 سؤال
طلعنا من الاختبار وأني مأيس انو رسبت وبعد مراح اكمل تسريع واكمل سادس طبيعي حالي حال اي طالب نجح من الخامس
وراها ب اسبوعين جنت بمحاضره خصوصي احياء , وتتصل بيه والدتي وتكولي انت نجحت وتأهلت بالتسريع !! فرحه متنوصف لدرجه طلعه من القاعه سجدت شكر ورجعت للبيت كبل من الفرحه ,
زين شكد باقيلي وقت حته امتحن سادس دور ثاني ؟ كالو 40 الى 50 يوم هيج شي
الحك لو لا ؟ كلت لروحي خل اجرب مخسران شي , أذا فزت الحمد لله واذا خسرت الله دفع عني غير شي واكيد كلشي خير .
حطيت جدول وتوكلت على الله ودرست بكل ثانيه تمر باليوم ! الى ان وصلت لحد اريد استسلم ما اريد اكمل بعد انتهيت كدما جسدي وحالتي الصحية راحت
تخيل تدرس مواد طلاب تدرسها سنة او سنتين ! تدرسها ب فتره 46 يوم تقريبا
الحمد لله على كلشي , استمريت وكلت مبقه شي واخلص وبدت الامتحانات الوزاري
لان اني مسرع ف امتحان ورا امتحان وهالشي كلش ضغط نفسي فوك ما اني حالتي تعبت من ورا الدراسه المشدده
اكو امتحانات ما نمت بيها اتذكر مثل الاحياء رحت للامتحان ما نايم
يوم ورا يوم ورا يوم الى ان خلصت الحمد لله اخر امتحان الفرنسي
حسيت براحة مو طبيعيه وكلش كنت فخور بنفسي لان عبرت هالمرحله الي جنت اتمنى استسلم منها
بعدهل طلعت النتائج ولله الحمد , معدلي عبر ال 100 !!
علمتني هواي دروس هاي الرحلة اكبرها انو ماكو شي صعب على رب العالمين , الله يريد منك أن تبذل كل ما عندك وهوه راح ينطيك كلشي تريد
( كل التوفيق )
