12/05/2021
ផឹកស៊ីក្នុងវង់ជាមួយគ្នា ដោយសារទាស់ពាក្យសម្ដី បុរសពីរនាក់ បានទៅយកពូថៅ និងយកកាំបិតខ្វែវ មកកាប់គ្នា ធ្វើឱ្យគូទំនាស់(កាប់តបវិញ បណ្ដាលរងរបួស ជាច្រើនកន្លែង រហូតដល់ស្លាប់ នៅពោធិ៍សាត់
ពោធិ៍សាត់ ៖ នៅយប់ថ្ងៃទី១0 ខែឧសភា ឆ្នាំ២០២១ នៅចំណុចព្រៃអណ្តូង ភូមិបាក់ត្រា ឃុំព្រងិល ស្រុកភ្នំក្រវាញ ខេត្តពោធិ៍សាត់។ បន្ទាប់មក នៅវេលាម៉ោង ២ រសៀល ថ្ងៃទី១១ ខែឧសភា នេះ ជនសង្ស័យ បានត្រូវសមត្ថកិច្ច តាមចាប់ខ្លួនបាន ពាក់ព័ន្ធករណីហិង្សា មានស្ថានទម្ងន់ទោស (កាប់បណ្តាលអោយស្លាប់) និងបានកំពុងកសាងសំណុំរឿង បញ្ជូនទៅតុលាការ ដើម្បីផ្តន្ទទោស តាមច្បាប់ ។
ហើយបុរសរងគ្រោះដល់ស្លាប់មាន ឈ្មោះ ហុន ទឿន អាយុ៣១ឆ្នាំ មុខរបរ កសិករ រស់នៅភូមិ ឃុំ កើតហេតុខាងលើ បានស្លាប់តាមផ្លូវ នៅពេលក្រុមគ្រួសារ បានដឹកមកមន្ទីរពេទ្យបង្អែក ខេត្តពោធិ៍សាត់។
ចំណែកជនសង្ស័យ ឈ្មោះ អិត រ័ត្ន អាយុ ៣២ ឆ្នាំ មានលំនៅក្នុងភូមិឃុំ កើតហេតុជាមួយគ្នា បានប្រព្រឹត្តអំពើហិង្សា ដោយកាប់គូទំនាស់សំដីរួចហើយ ក៏បានរត់គេចខ្លួនបាត់ ។
សមត្ថកិច្ចជំនាញ បានចុះពិនិត្យទីកន្លែង កើតហេតុភ្លាមជាក់ស្តែង ស្ថិតនៅចំណុចព្រៃអណ្តូង នៅលើដីភូមិ របស់ឈ្មោះ តើយ រុំ ឃើញមានបន្សល់នូវ វត្ថុតាងមួយចំនួន មានដូចជា មួកមួយ ពណ៌ខៀវលឿង ស្បែក ជើងផ្ទាត់ មួយចំហៀង មានប្រឡាក់ឈាម, ពិលកែវ ពណ៌ខ្មៅមួយ, កាំបិត ក កុក ដងឈើមួយ មានប្រឡាក់ជាប់ឈាម ។
ការពិនិត្យ ធ្វើកុសលវិច្ច័យស្នាមរបួសលើសាកសព សមត្ថកិច្ច បានបង្ហាញថា: បុរសរងគ្រោះ ស្លាប់ដោយសារតែមាន របួសធ្ងន់ធ្ងរ នៅច្រើនកន្លែង មានដូចជា របួសលើចិញ្ចើម ថ្ងាសខាងឆ្វេង ផុងលលាដដ៏ ក មានសភាពរឹង ស្មាខាងឆ្វេង ដាច់ឆ្អឹង ២ កន្លែង (ឆ្អឹងស្មា និងឆ្អឹងស្លាបប្រចៀវ) , របួសខ្នង ខាងឆ្វេង ពីកញ្ចឹង ក រហូតដល់ក្រោមក្លៀក ដល់ឆ្អឹងជំនី និងសួត, របួសចង្កេះខាងឆ្វេង ដាច់ឆ្អឹង ដល់តម្រងនោម ។
យោងតាមការពិនិត្យ ទីកន្លែងកើតហេតុ និងសាកសព គ្រូពេទ្យ និងសមត្ថកិច្ចជំនាញ បានសន្និដ្ឋានថា ជនរងគ្រោះ ឈ្មោះ ហុន ទឿន ស្លាប់អាចបណ្តាលមក ពីប៉ះទង្គិចនឹងវត្ថុរឹង មានមុខមុត និងមានទម្ងន់។ ជនរងគ្រោះស្លាប់លើសពី ១២ ម៉ោង ។ សាកសពបានប្រគល់អោយឪពុកបង្កើតសព ឈ្មោះ តឺយ លោម អាយុ ៦១ឆ្នាំ យកទៅធ្វើបុណ្យ តាមប្រពៃណី នៅវត្តបក្សីចាំក្រុង ហៅវត្តបាក់ត្រា។
ចំណែកជនសង្ស័យ ឈ្មោះ អិត រ័ត្ន បានប្រព្រឹត្តអំពើហិង្សា ដោយកាប់គូទំនាស់សំដីរួចហើយ ក៏បានរត់គេចខ្លួនបាត់ មកដល់ពេលនេះ សមត្ថកិច្ច បានចាប់ខ្លួនបាន នៅវេលាម៉ោង ២ រសៀល នាថ្ងៃទី១១ ឧសភានេះ ហើយជនសង្ស័យ ក៏មានស្នាមរបួស ២ កន្លែង ត្រូវដៃ។ សមត្ថកិច្ចជំនាញ បានរៀបចំសំណុំរឿង និងបញ្ជូនជនសង្ស័យ ចាត់ការតាមនីតិវិធីច្បាប់៕