04/03/2026
នាព្រឹកថ្ងៃទី៤ ខែមីនា ឆ្នាំ២០២៦ ក្រុមការងារអង្គការខាណា រួមជាមួយនឹងក្រុមអ្នកស្រាវជ្រាវពីសាកលវិទ្យាល័យសុីដនីនៃប្រទេសអូស្រ្តាលី និងក្រុមនិសិ្សតហាត់ការមកពីសាកលវិទ្យាល័យធូរ៉ូកាលីហ្វញ៉ា សហរដ្ឋអាមរិក បានធ្វើទស្សនិច្ចសិក្សានៅមន្ទីរពេទ្យ មិត្តភាពកម្ពុជា-ចិន ត្បូងឃ្មុំ នឹងបានជួបពិភាក្សាជាមួយលោកប្រធានមន្ទីរពេទ្យ និងក្រុមគ្រូពេទ្យផ្នែកជំងឺឆ្លង ដើម្បីសិក្សាស្វែងយល់ពីលទ្ធភាពក្នុងការអនុវត្តនីតិវិធីវេជ្ជសាស្រ្តបូមយកសំណាកពី Lymph Node ក្នុងចំណោមអ្នកដែលបានធ្វើរោគវិនិច្ឆ័យថាមានរបេងកូនកណ្តុរ ដើម្បីបញ្ជូនទៅធ្វើតេស្ត រកមេរោគរបេងបន្តទៀតនៅវិទ្យាស្ថានប៉ាស្ទ័រ រាជធានីភ្នំពេញ។ នេះជាផ្នែកសិក្សាស្រាវជ្រាវមួយ ក្រោមគម្រោង SHIFT-TB ដែលគាំទ្រថវិកាដោយ Expertise France។ លទ្ធផលនៃកិច្ចប្រជុំ គឺទទួលបានផ្លែផ្កាល្អ ដោយលោកប្រធានមន្ទីរពេទ្យ បង្ហាញនូវការគាំទ្រពេញទំហឹង និងរីករាយក្នុងការបញ្ជូនក្រុមគ្រូពេទ្យ មកទទួលការបណ្តុះបណ្តាលនៅភ្នំពេញ ដើម្បីចូលរួមចំណែកក្នុងការអនុវត្តការសិក្សានេះផងដែរ។
នាពេលរសៀលថ្ងៃដដែល ក្រុមការងារក៏បានបន្តទស្សនកិច្ចសិក្សាលើកម្មវិធីស្រាវជ្រាវរបេងទូទាំងសហគមន៍ដែលគម្រោងកំពុងតែបានអនុវត្ត នៅក្នុងទីតាំងវត្តពោធិព្រឹក្ស ភូមិគោកស្រុក ឃុំគោកស្រុក ក្នុងស្រុកប្រតិបត្តិតំបែរ ដើម្បីស្វែងយល់ពីរបៀបដែលគម្រោងកំពុងអនុវត្ត ក៏ដូចជាផ្តិតយករូបភាព និងវីដេអូ បង្ហាញពីសកម្មភាពស្រាវជ្រាវរបេងក្នុងសហគមន៍ដ៏មានអត្ថន័យនេះទុកជាឯកសារ។
