Money and Business

16/06/2026

មនុស្សជាច្រើនជ្រើសរើសភាពស្ងៀមស្ងាត់ ឬមិនហ៊ានធ្វើអ្វីថ្មី ដោយសារតែភាពភ័យខ្លាចចំពោះពាក្យថា «បរាជ័យ»។ ប៉ុន្តែតាមពិតទៅ ការបរាជ័យមិនមែនជាចំណុចបញ្ចប់នៃដំណើរនោះទេ តែវាគឺជា «គ្រូ» ដែលល្អបំផុតដែលមកបង្រៀនយើងឱ្យស្គាល់ពីរបៀបដើរឱ្យបានត្រឹមត្រូវជាងមុន។ 💪

1. ការសាកល្បងធ្វើអ្វីមួយ ហើយមិនទទួលបានលទ្ធផលដូចការរំពឹងទុក មិនមែនជាការខាតបង់ឡើយ។ វាគឺជាការរៀនសូត្រពីកំហុស ដើម្បីឱ្យការចាប់ផ្តើមលើកក្រោយមានភាពចាស់ទុំ និងភាពជាក់លាក់ជាងមុន។ ចូរចងចាំថា ភាពជោគជ័យមិនមែនជារឿងចៃដន្យទេ វាគឺជាការប្រមូលផ្តុំនៃបទពិសោធន៍ដែលកើតចេញពីការសាកល្បងរាប់មិនអស់។

2. កុំបារម្ភថានឹងត្រូវចាប់ផ្តើមពីសូន្យ។ ការចាប់ផ្តើមម្តងទៀត មិនមែនមានន័យថាអ្នកត្រឡប់ទៅកន្លែងចាស់នោះទេ ប៉ុន្តែអ្នកកំពុងចាប់ផ្តើមជាមួយនឹង «បទពិសោធន៍» ដែលអ្នកមិនធ្លាប់មានពីមុនមក។ មិនថាលទ្ធផលនឹងទៅជាយ៉ាងណា ការហ៊ានសាកល្បងគឺជាជ័យជម្នះដ៏ធំធេងមួយរួចទៅហើយលើភាពភ័យខ្លាចក្នុងចិត្តខ្លួនឯង។

3. ជីវិតគឺជាដំណើរដ៏វែងឆ្ងាយមួយ។ បើដួល ចូរងើបឈរ បើខុស ចូររៀន ហើយបើនៅមានកម្លាំង ចូរចាប់ផ្តើមម្តងទៀតដោយស្នាមញញឹម។ គ្មាននរណាម្នាក់ជោគជ័យដោយមិនធ្លាប់បរាជ័យនោះទេ មានតែអ្នកដែលហ៊ានចាប់ផ្តើមម្តងហើយម្តងទៀតប៉ុណ្ណោះ ទើបអាចសម្រេចដល់គោលដៅចុងក្រោយបាន។

#សង្គមថ្មី

04/06/2026

💵១. កុំទិញរបស់ដើម្បីមើលទៅដូចអ្នកមានការបង់រំលស់ទូរស័ព្ទថ្លៃគ្រាន់តែជាសំបកក្រៅ។
អ្នកមានពិតប្រាកដ វាស់វែងលើចំណេះដឹង និងសន្តិភាពផ្លូវចិត្ត។

២. ឈប់ទិញអីវ៉ាន់តាមអារម្មណ៍ ពេលហត់នឿយ ឬខឹង កុំទិញរបស់អនឡាញដើម្បីកំដរអារម្មណ៍។ ត្រូវទុកពេល ២៤ ម៉ោងឱ្យខួរក្បាលគិតសិន។

៣. ប្រយ័ត្នពាក្យថា របស់ហ្នឹងត្រូវតែមាន បើទិញរបស់តាមតែការផ្សាយពាណិជ្ជកម្មញុះញង់ ថ្ងៃក្រោយអ្នកនឹងត្រូវលក់របស់ដែលចាំបាច់ក្នុងជីវិត។

៤. លុយរកពិបាក កុំចំណាយងាយៗ អ្នកត្រូវធ្វើការឈឺខ្នង ៨ ម៉ោង ទម្រាំបានលុយ តែពេលចាយត្រឹម ៥ នាទីរត់បាត់អស់។ ចូរឱ្យតម្លៃញើសឈាមខ្លួនឯង។

៥. កុំអួតហ៊ឺហាលង់ខ្លួនក្នុងបំណុល ជិះឡានទំនើបហូបអាហារថ្លៃដើម្បីតែអួតគេ តែត្រូវដេកសម្រក់ទឹកភ្នែកឱបបំណុល គឺមិនសមទាល់តែសោះ។

៦. បើមិនទិញ ក៏មិនស្លាប់ដែរ មុននឹងទិញកាបូបថ្លៃ ត្រូវសួរខ្លួនឯងថា បើអត់វា តើខ្ញុំស្លាប់ទេ? បើមិនស្លាប់ កុំទើបទិញ។

៧. លុយសន្សំ គឺជាសេរីភាព លុយសន្សំជួយឱ្យអ្នកមានអំណាចនិយាយពាក្យថា ទេ ចំពោះការងារដែលជិះជាន់ និងជាខ្នើយទ្រាប់ខ្នងពេលមានហានិភ័យ។

៨. កុំឱ្យបំណុលគ្រប់គ្រងជីវិត បំណុលប្រើប្រាស់ឥតប្រយោជន៍ គឺដូចជាការលក់ពេលវេលានៅថ្ងៃអនាគតរបស់អ្នកទៅឱ្យគេ។

៩. ចំណូលកើន វិន័យត្រូវតែកើន មនុស្សភាគច្រើនធ្លាក់ក្នុងអន្ទាក់ប្រាក់ខែកើន ចំណាយកើន។ បើវិន័យមិនឡើងតាម អ្នកនឹងនៅតែជាទាសករលុយ។

១០. ចំណាយមិនគិត ជីវិតរលាយ គ្មានអ្នកណាក្រព្រោះការសន្សំសំចៃទេ តែភាពក្រីក្រនៅពេលចាស់ជរា គឺគួរឱ្យខ្លាចបំផុតព្រោះគ្មានកម្លាំងរកលុយវិញ។

១១. របស់ Sale មិនមែនចំណេញជានិច្ចទេ បើរបស់នោះអ្នកមិនចាំបាច់ប្រើផង ទោះបញ្ចុះតម្លៃ ៥០% ក៏អ្នកខាតលុយពេញៗដែរ។

១២. កុំប្រកួតប្រជែងភាពមានបាន គេទិញវីឡា ទិញឡាន ជារឿងរបស់គេ។ រស់ក្នុងផ្ទះតូចតែគេងលក់ស្រួល ប្រសើរជាងរស់ក្នុងផ្ទះធំតែដេកភ័យព្រួយ។

១៣. រូបមន្ត ៥០-៣០-២០ បានលុយត្រូវដកសន្សំមុន
ដក ២០% សន្សំ/វិនិយោគភ្លាមៗ

៥០% ចំណាយចាំបាច់ដូចជា ផ្ទះ ម្ហូប ទឹកភ្លើង

៣០% ចំណាយផ្ទាល់ខ្លួន ដើរកម្សាន្ត

១៤. គ្រប់គ្រងលុយបាន គឺគ្រប់គ្រងវាសនាបាន។ ភាពធូរស្រាលកើតចេញពីការដឹងច្បាស់ថា លុយរបស់អ្នកគ្រប់រៀលកំពុងទៅណា និងដឹងថាខ្លួនឯងមានសុវត្ថិភាព។

១៥. ប្រយ័ត្នការលេចធ្លាយលុយតូចៗ ថ្លៃទឹកក្រឡុក បារី ចាក់ឆ្នោត បន្តិចបន្តួចអាចធ្វើឱ្យហិនហោចបាន។ ទូកមួយអាចលិចបាន ត្រឹមតែព្រោះប្រហោងតូចមួយ។

១៦. កុំទិញការទទួលស្គាល់ពីអ្នកដទៃ មនុស្សដែលស្រលាញ់អ្នកព្រោះឡានល្អ គេស្រលាញ់លុយអ្នកទេ។ ចូរវិនិយោគលើសមត្ថភាពពិតប្រាកដ។

១៧. ចង់បានក្តីសុខភ្លាមៗ សម្លាប់អនាគត ការសម្រេចចិត្តមិនទិញរបស់មិនចាំបាច់នៅថ្ងៃនេះ គឺជារង្វាន់ដ៏ធំសម្រាប់ខ្លួនឯងនៅ ៥ ទៅ ១០ ឆ្នាំខាងមុខ។

១៨. កុំទិញរបស់ដើម្បីបំពេញភាពអផ្សុក ភាពទទេស្អាតក្នុងចិត្ត ត្រូវបំពេញដោយក្តីស្រលាញ់ ការរៀនសូត្រ និងការបង្កើតតម្លៃ មិនមែនគំនរអីវ៉ាន់ទេ។

១៩. មិនបង្កើតបំណុលផ្តេសផ្តាស គឺអ្នកពូកែណាស់ទៅហើយ ក្នុងសម័យកម្ចីងាយៗ បើអ្នករស់គ្មានបំណុលប្រើប្រាស់ អ្នកដើរលឿនជាងមនុស្ស ៨០% ទៅហើយ។

២០. ស្ថេរភាពកើតពីវិន័យ មិនមែនទំហំលុយ រកបាន ១០,០០០,០០០៛ ក្នុងមួយខែ ក៏នៅតែវិលវល់ បើអ្នកនៅតែចាយអស់ពីកាបូប។

28/05/2026

28/05/2026

ពាក្យចាស់ពោលថា ស៊ូលំបាកមុន ស្រណុកក្រោយ។ ខាងក្រោមនេះជា រឿង៧​ យ៉ាងដែលយើងគួរធ្វើដើម្បីស្រណុកខ្លួននៅថ្ងៃអនាគត។

30/04/2026

30/04/2026

💸 កុំមើលរំលងការកត់ត្រាចំណូល-ចំណាយ
តែធ្លាប់ដឹងអត់ថាបើចាយវាយគ្មានការកត់ត្រាបានត្រឹមត្រូវ យើងគ្មានថ្ងៃអាចដឹងបានទេ ថាស្ថានភាពលុយកាសយើងខៀវ ឬក្រហម
ព្រោះថាស្ថានភាពលុយកាសយើងល្អឬអាក្រក់ វាអាស្រ័យលើតួលេខជាក់ស្តែង មិនមែនការស្រមើស្រម័យនោះទេ (មិនកត់ម៉េចនឹងដឹង)។
💸 អ្នកខ្លះពូកែរកលុយណាស់ តែពីមួយខែទៅមួយខែមិនដែលសល់លុយជាប់ខ្លួន និងមានលុយសន្សំដូចគេទេ ហើយសំខាន់មិនដឹងថាខ្លួនឯងចាយលើអ្វីខ្លះទៀត។
ពេលខ្លះចូលចិត្តគិតថា ចាយតែបន្តិចបន្តួចគ្មានទៅអស់អីច្រើនណាស់ណាទេ តែអ៊េតមីនចង់ប្រាប់ថា ការចាយវាយបន្តិចបន្តួចហ្នឹងហើយគ្រោះថ្នាក់ជាងគេ បើចង់ដឹង សាកកត់ហើយបូកមើលទៅដឹងហើយ។
កុំភ្លេចថា សុខភាពលុយដែលល្អគឺចាប់ផ្តើមពីការកត់ត្រាចំណូល-ចំណាយនេះហើយ!

29/04/2026

💵 ហេតុអ្វីបានជាចំណូលកាន់តែច្រើន តែលុយសល់កាន់តែតិច?
ការពិតគឺ អ្នកប្រហែលជាកំពុងដើរថយក្រោយផ្នែកហិរញ្ញវត្ថុដោយមិនដឹងខ្លួន។

១. គ្មានលុយសន្សំ រស់នៅពេញដំបូលនៃចំណូល បើប្រាក់ខែចូលមក ហើយចេញទៅវិញអស់ៗជានិច្ច នោះមានន័យថា អ្នកគ្មានរបាំងការពារឡើយ។

គ្រាន់តែមានរឿងមិនរំពឹងទុកកើតឡើងបន្តិចបន្តួច ហិរញ្ញវត្ថុអ្នកនឹងដួលភ្លាម។

បុគ្គលិកម្នាក់រកចំណូលបាន ២,០០០,០០០៛ ក្នុង ១ ខែ។ ការចំណាយដូចជា ថ្លៃផ្ទះ ម្ហូបអាហារ និងការកម្សាន្តអស់ ២,០០០,០០០៛ ពេញ។

លទ្ធផលដើរថយក្រោយ ក្នុង ១ ឆ្នាំ គាត់សន្សំបាន ០៛ បើមានបញ្ហាសុខភាពត្រូវចំណាយ ៤០០,០០០៛ គាត់នឹងត្រូវទៅខ្ចីគេភ្លាម ដែលនេះហៅថា ការដើរថយក្រោយ។

២. បំណុលកើនឡើងជាលំដាប់ យកលុយអនាគតមកចាយ មិនថាបង់រំលស់សម្ភារៈ ឬខ្ចីបុល បើបំណុលមិនថយចុះ តែបែរកើនឡើង នោះអ្នកកំពុងចងជើងខ្លួនឯងកាន់តែតឹង។

អ្នកលក់អនឡាញម្នាក់ទិញទូរស័ព្ទស៊េរីថ្មីបង់រំលស់ ៤០០,០០០៛ ក្នុង ១ ខែ។ បើគាត់រកចំណូលបាន ៤,០០០,០០០៛ តែត្រូវបង់រំលស់ឡាន និងសម្ភារៈអស់ ២,៤០០,០០០៛ ស្មើនឹង ៦០%។

លទ្ធផលនៃការដើរថយក្រោយ គាត់សល់លុយសម្រាប់ចាយវាយ និងសន្សំត្រឹមតែ ៤០% ប៉ុណ្ណោះ។ បំណុលកាន់តែច្រើន ធ្វើឱ្យគាត់បាត់បង់សេរីភាពក្នុងការសម្រេចចិត្តរឿងធំៗ។

៣. ប្រើលុយព្យាបាលអារម្មណ៍ ភាពសប្បាយមួយពេល ស្ត្រេសក៏ទិញអីវ៉ាន់ ហត់ក៏ញ៉ាំរបស់ថ្លៃៗ ផ្តល់រង្វាន់ឱ្យខ្លួនឯងញឹកញាប់ពេក រហូតលុយក្លាយជាឧបករណ៍ព្យាបាលអារម្មណ៍ មិនមែនសម្រាប់សាងអនាគត។

រាល់ចុងសប្តាហ៍ ដើរញ៉ាំអី និងដើរលេងអស់ ២០០,០០០៛ ក្នុង ១ ខែអស់ ៨០០,០០០៛។

លទ្ធផលដើរថយក្រោយគឺ លុយ ៨០០,០០០៛ នេះបើយកទៅវិនិយោគក្នុងកម្រិត ៨% ក្នុង ១ ឆ្នាំ នោះក្នុង ១០ ឆ្នាំ អ្នកនឹងមានលុយជិត ១៥០,០០០,០០០៛។

ប៉ុន្តែការចាយតាមអារម្មណ៍ បានធ្វើឱ្យទ្រព្យសម្បត្តិមហាសាលនេះរលាយបាត់។

ដើម្បីឈប់ដើរថយក្រោយ អ្នកគួរអនុវត្តរូបមន្ត ៥០/៣០/២០ ៖

១. ការបែងចែកចំណូល ឧទាហរណ៍ចំណូល ៤,០០០,០០០៛ ៖

៥០% សម្រាប់តម្រូវការចាំបាច់ ២,០០០,០០០៛ ដូចជា ផ្ទះ, ម្ហូប, ទឹកភ្លើង

៣០% សម្រាប់តម្រូវការតាមអារម្មណ៍ ១,២០០,០០០៛ ទៅដើរលេង, កាហ្វេ, អ៊ីនធឺណិត

២០% សម្រាប់សន្សំ និងវិនិយោគ ៨០០,០០០៛ នេះជាដុំមាសរបស់អ្នក

២. ក្នុងរយៈពេល ៥ ឆ្នាំ បើអ្នកមានវិន័យសន្សំ ៨០០,០០០៛ រាល់ខែ៖

ឆ្នាំទី ១ អ្នកសល់លុយ ៩,៦០០,០០០៛

ឆ្នាំទី ៣ អ្នកសល់លុយ ២៨,៨០០,០០០៛ អាចចាប់ផ្តើមអាជីវកម្មតូចមួយបាន

ឆ្នាំទី ៥ អ្នកសល់លុយ ៤៨,០០០,០០០៛ មិនទាន់បូកបញ្ចូលការប្រាក់ ឬផលចំណេញពីការវិនិយោគ

លុយមិនសំខាន់ថាអ្នក រកបានប៉ុន្មានទេ តែសំខាន់ត្រង់ថា តើអ្នកចាត់ចែងវាដោយរបៀបណា។

ការរស់នៅឱ្យទាបជាងលទ្ធភាព និងការវិនិយោគលើខ្លួនឯង គឺជាការវិនិយោគដែលចំណេញ។

28/04/2026

💵 បំណុលអាចជាមធ្យោបាយដ៏ល្អមួយក្នុងការកែលម្អជីវភាពរស់នៅ ឬចាប់ផ្តើមអាជីវកម្ម ប៉ុន្តែវាក៏អាចក្លាយជា "អន្ទាក់បំណុល" ដែលទាញយើងឲ្យធ្លាក់ចូលក្នុងវដ្តមិនចេះចប់ដែរ។ នៅពេលណាដែលអ្នកត្រូវខ្ចីលុយថ្មី ដើម្បីសងលុយចាស់ នោះជីវិតហិរញ្ញវត្ថុរបស់អ្នកចាប់ផ្តើមបាត់បង់ការគ្រប់គ្រងហើយក្លាយជាបន្ទុកយ៉ាងធ្ងន់ធ្ងរ។

១. មូលហេតុដែលនាំឲ្យជាប់បំណុលវ័ណ្ឌក
បំណុលវ័ណ្ឌក គឺជាស្ថានភាពដែលការចំណាយសងបំណុលទាំងប្រាក់ដើម និងការប្រាក់ខ្ពស់ជាងសមត្ថភាពរកចំណូលរបស់អ្នក។ នេះកើតឡើងដោយសារកំហុសសំខាន់ៗ ៣ ដូចខាងក្រោម៖

ក. ការប្រាក់ខ្ពស់ពេក
ជាពិសេសការខ្ចីប្រាក់ក្រៅប្រព័ន្ធ ឬពីស្ថាប័នមួយចំនួនដែលមានអត្រាការប្រាក់ខ្ពស់ហួសហេតុពេក។ ការប្រាក់នេះអាចធ្វើឲ្យអ្នកសងតែការប្រាក់រាប់ខែ រាប់ឆ្នាំ ប៉ុន្តែមិនទាន់ដល់ប្រាក់ដើមសោះ។

ឧទាហរណ៍៖ បើអ្នកខ្ចី ៛ ២.០០០.០០០ ក្នុងអត្រាការប្រាក់ ៥% ក្នុងមួយខែ សម្រាប់កម្ចីក្រៅប្រព័ន្ធ អ្នកត្រូវបង់ការប្រាក់ ៛១០០.០០០ រៀងរាល់ខែ។ បើអ្នកមិនទាន់សងប្រាក់ដើមទេ ការប្រាក់រយៈពេល ១ ឆ្នាំគឺ ៛១.២០០.០០០ ដែលស្ទើរតែដល់ពាក់កណ្តាលប្រាក់ដើមទៅហើយ។

ខ. ខ្ចីដើម្បីប្រើប្រាស់ មិនមែនដើម្បីរកស៊ី
ការខ្ចីលុយមកទិញសម្ភារៈនិយមដែលបាត់បង់តម្លៃដូចជា ទូរសព្ទថ្លៃៗ ឬរថយន្តដែលលើសពីលទ្ធភាព ឬចំណាយលើពិធីការផ្សេងៗដែលមិនបង្កើតចំណូលមកវិញ គឺជាហេតុផលនាំឲ្យហានិភ័យខ្ពស់។ បំណុលទាំងនេះមិនជួយឲ្យអ្នកមានលទ្ធភាពសងឡើយ។

ឧទាហរណ៍៖ អ្នកខ្ចី ៛ ៤.០០០.០០០ ដើម្បីទិញគ្រឿងសម្ភារៈប្រើប្រាស់។ បើអ្នកមិនរកចំណូលបន្ថែមពីវាបានទេ រាល់ការបង់រំលស់ ៛២០០.០០០ ក្នុងមួយខែ គឺជាការកាត់បន្ថយប្រាក់ចំណូលប្រចាំខែរបស់អ្នកដោយផ្ទាល់តែម្តង។

គ. ការខ្ចីលុយបន្ថែមដើម្បីសងបំណុលចាស់
នេះ គឺជាកំហុសហិរញ្ញវត្ថុដ៏ធំបំផុត។ នៅពេលដែលអ្នកខ្ចីលុយពីកន្លែង "ក" ដើម្បីទៅសងកន្លែង "ខ" នោះវាគ្រាន់តែជាការពន្យារពេលបញ្ហាប៉ុណ្ណោះ ហើយក្នុងករណីច្រើនទៀត វាថែមទាំងបង្កើនទំហំបំណុល និងការប្រាក់សរុបឲ្យកាន់តែច្រើនថែមទៀត។ នេះជាសញ្ញាច្បាស់បំផុតថាហិរញ្ញវត្ថុរបស់អ្នកស្ថិតក្នុងស្ថានភាពវិបត្តិហើយ។

ឧទាហរណ៍៖ អ្នកជំពាក់គេ ៛ ១០.០០០.០០០ ដល់ពេលត្រូវសង ប៉ុន្តែអ្នកទៅខ្ចីពីកន្លែងថ្មីដែលមានការប្រាក់ខ្ពស់ជាង ២% ដើម្បីយកមកសងបំណុលចាស់។ ទំហំបំណុលនៅតែដដែល ប៉ុន្តែបន្ទុកការប្រាក់ប្រចាំខែរបស់អ្នកបានកើនឡើងដែលធ្វើឲ្យអ្នកកាន់តែពិបាកដកដង្ហើម។

ដើម្បីជៀសវាងអន្ទាក់បំណុលវ័ណ្ឌក អ្នកត្រូវតែគ្រប់គ្រងការចំណាយរបស់ខ្លួនជាមុនសិន និងត្រូវប្រាកដថារាល់ការខ្ចីប្រាក់គឺដើម្បីវិនិយោគលើអ្វីដែលបង្កើតលំហូរសាច់ប្រាក់ត្រឡប់មកវិញ (Assets) មិនមែនដើម្បីចំណាយទៅលើអ្វីដែលធ្វើឲ្យលុយហូរចេញ (Liabilities) នោះទេ។

26/04/2026

សរុបរឿងលុយដែល​បានរៀននៅអាយុ ៣០+ ៖

១. ប្រាក់មិនស្រួលរក តែស្រួលចាយ
២. គ្រប់គ្រងទម្លាប់ចាយវាយត្រូវការការតាំងចិត្តខ្ពស់
៣. បើគ្មានការចាត់ចែងលុយឱ្យល្អ សន្សំ ១០ ឆ្នាំក៏មិនទៅមុខ
៤. ប្រភពចំណូលគួរមានលើសពីមួយទើបមិនមានហានិភ័យ
៥. វិនិយោគឥឡូវមិនពិបាក តែត្រូវការការរៀនសូត្រច្រើន
៦. ជាប់បំណុលធ្វើឲ្យវេទនាផ្លូវចិត្ត ផ្លូវកាយ
៧. លុយសន្សំជួយកាត់បន្ថយការខ្វល់ខ្វាយរឿងលុយ
៨. រកលុយសំខាន់ តែមិនសំខាន់ដូចសុខភាពទេ
៩. ចំណូលច្រើនមិនប្រាកដថាមិនមានបញ្ហាលុយកាស
១០. កុំប្រៀបធៀបចំណូលរ​បស់ខ្លួនឯងជាមួយអ្នកដទៃ
១១. គោលបំណងកត់ត្រាចំណូល-ចំណាយ គឺដើម្បីកាត់បន្ថយចំណាយ មិនមែនកត់ចោល
១២. រឿងលុយ គ្រួសារ គោលដៅជីវិត ជារឿងឯកជន បើគេមិនប្រាប់ កុំចង់ដឹង
១៣. វិន័យ ទម្លាប់ ការតាំងចិត្តជាធាតុផ្សំចាំបាច់ដើម្បីសន្សំបានជោគជ័យ
១៤. រស់នៅម្នាក់ឯង រកលុយចាយខ្លួនឯង ធ្វើឱ្យយើងរឹងមាំ
១៥. បើកាត់បន្ថយការប្រៀបធៀបនឹងអ្នកដ៏ទៃ អ្នកនឹងសល់លុយជាងមុន
១៦. កុំរំពឹងកូនចិញ្ចឹមពេលចាស់ ព្រោះវាមិនមែនជាទំនួលខុសត្រូវ
១៧. កុំគេចពីទំនួលខុសត្រូវ បើខ្លួនឯងជាអ្នកបង្ក ឧ៖ យកបំណុលឱ្យគេសងជំនួស
១៩. កុំហ៊ឺហារលើសសមត្ថភាព
២០. ប្រឹងតែរក តែមិនចេះទុកដាក់ = រលាយ
----------------------------

23/04/2026

💵 ទោះគ្មានលុយក្នុងដៃ កុំទាន់អស់សង្ឃឹម។ ពិតជាមានវិធីដោះស្រាយ មុននឹងលុយរត់មករកយើង យើងត្រូវប្រើដើមទុន ៣ យ៉ាងដែលមានស្រាប់ក្នុងខ្លួនគឺ ពេលវេលា កម្លាំង និងចំណេះដឹង ដើម្បីធាក់កង់ជីវិតឲ្យទៅមុខ។

ខាងក្រោមនេះ គឺជាផែនការបំប្លែងកម្លាំងឲ្យទៅជាលុយសល់ ១០០,០០០,០០០៛ ក្នុងរយៈពេល ៥ ឆ្នាំ៖

✔️ ប្រើដើមទុនពេលវេលា និងកម្លាំង បង្កើតចំណូលបន្ថែម
សម្រាប់អ្នកធ្វើការ ឬម្ចាស់អាជីវកម្មតូចតាច កុំពឹងលើចំណូលតែ ១ ផ្លូវ។

ប្រើពេលទំនេរ ៤ ម៉ោងក្រោយការងារ ដើម្បីរៀនជំនាញ ឬរកស៊ីបន្ថែម លក់ដូរអនឡាញ, រកការងារខាងក្រៅម៉ោង។

បង្កើតចំណូលបន្ថែមឲ្យបានត្រឹមតែ ១០,០០០៛ ក្នុង ១ ថ្ងៃ។

✔️The Power of 10,000៛, តើលុយ ១០,០០០៛ តូចតាចនេះ ក្លាយជាលុយរាប់លានដោយរបៀបណា?

ជំហានទី ១ សន្សំចំណូលបន្ថែម ១០,០០០៛ × ៣០ ថ្ងៃ = ៣០០,០០០៛ ក្នុង ១ ខែ

៣០០,០០០៛ × ១២ ខែ = ៣,៦០០,០០០៛ ក្នុង ១ ឆ្នាំ

ជំហានទី ២ ប្រើចំណេះដឹងទៅវិនិយោគ ដើម្បីទទួលបាន Compound Interest ។

យកលុយ ៣,៦០០,០០០៛ ទៅវិនិយោគ ទិញមាស, ដាក់សន្សំមានកាលកំណត់ ឬវិនិយោគអចលនទ្រព្យរួមគ្នា ដែលផ្ដល់ផលចំណេញ ១០% ក្នុង ១ ឆ្នាំ។

✔️ លទ្ធផលក្រោយអនុវត្ត ៥ ឆ្នាំ នៅពេលអ្នកធាក់កង់មិនឈប់ នេះជាអ្វីដែលអ្នកនឹងទទួលបាន។

- ឆ្នាំទី ១ អ្នកសល់លុយដើម ៣,៦០០,០០០៛ + ការប្រាក់ = ៣,៩៦០,០០០៛

- ឆ្នាំទី ៣ លុយសរុបនឹងកើនឡើងដល់ប្រហែល ១៣,០០០,០០០៛ ដោយសារការប្រាក់ត្រួតលើការប្រាក់

- ឆ្នាំទី ៥ បើអ្នកបង្កើនសមត្ថភាព ចំណេះដឹង រហូតអាចសន្សំបាន ១,៥០០,០០០៛ ក្នុង ១ ខែ

- ១,៥០០,០០០៛ × ១២ ខែ = ១៨,០០០,០០០៛ ក្នុង ១ ឆ្នាំ

បូករួមនឹងការប្រាក់ ១០% រយៈពេល ៥ ឆ្នាំ សរុបទាំងអស់អ្នកនឹងមានលុយក្នុងដៃប្រហែល ១១០,០០០,០០០៛

✔️តើអ្វីទៅដែលធ្វើឲ្យលទ្ធផលនេះខុសគ្នា?

- អ្នកមិនធ្វើសកម្មភាព រង់ចាំលុយធ្លាក់ពីមេឃ ៥ ឆ្នាំក្រោយសល់លុយសូន្យរៀល និងជំពាក់បំណុលគេ។

- អ្នកធាក់កង់ទៅមុខ ប្រើកម្លាំង និងចំណេះដឹងបន្តិចម្ដងៗ ៥ ឆ្នាំក្រោយក្លាយជាម្ចាស់លុយរាប់លាន។

ចូរកុំខ្លាចភាពក្រីក្រ តែត្រូវខ្លាចការដែលខ្លួនឯងគ្មានសកម្មភាព។
ចាប់ផ្ដើមប្រើពេលវេលារបស់អ្នកនៅថ្ងៃនេះ ដើម្បីកសាងទ្រព្យសម្បត្តិនៅថ្ងៃស្អែក។