15/01/2022
INFO.- ຢາກບອກ | EP160: ຍ້ອນເປັນໄວໜຸ່ມ ຈຶ່ງເຈັບປວດ.
“ຍ້ອນເປັນໄວໜຸ່ມ ຈຶ່ງເຈັບປວດ” ເປັນປຶ້ມທີ່ຂຽນໂດຍທ່ານ ຄິມຣັນໂດ ເຊິ່ງຜູ້ຂຽນໜັງສືເຫຼັ້ມນີ້ໄດ້ຖ່າຍທອດເເນວຄິດ ເເລະ ປະສົບການໃນຊ່ວງໄວໜຸ່ມຂອງຊີວິດລາວໃຫ້ກັບຜູ້ອ່ານ, ໜັງສືເຫຼັ້ມນີ້ກໍເປັນອີກເຫຼັ້ມທີ່ໃຫ້ຂໍ້ຄິດອີ່ຫຍັງຫຼາຍໆຢ່າງໂດຍສະເພາະເເມ່ນໃນກຸ່ມໄວໜຸ່ມທີ່ກຳລັງສຶກສາຢູ່ມະຫາວິທະຍາໄລ ເເຕ່ບໍ່ວ່າຈະເປັນຮຸ່ນໃດກໍສາມາດອ່ານໄດ້ ເຊິ່ງອາດຈະໄດ້ຮັບຂໍ້ຄິດ ເເລະ ມູມມອງທີ່ເເຕກຕ່າງກັນໄປເພື່ອເອົາໄປປັບໃຊ້ໃນຊີວິດຂອງຜູ້ອ່ານເອງ.
ໂດຍເລີ່ມຕົ້ນເລີຍ ໜັງສືເຫຼັ້ມນີ້ໃຊ້ການປຽບທຽບໂມງເວລາກັບຊ່ວງອາຍຸຊອງຄົນເຮົາ ໂດຍສູງສຸດຢູ່ທີ່ອາຍຸ 80 ປີ ເຊິ່ງໃນປຶ້ມຫົວນີ້ໄດ້ປຽບທຽບໄວ້ປະມານວ່າ:
ຖ້າຕອນນີ້ອາຍຸເຈົ້າ 20 ປີ ເວລາຊີວິດຂອງເຈົ້າຢູ່ທີ່ 6 ໂມງເຊົ້າ ພະອາທິດຈະຂຶ້ນພໍດີ.
ຖ້າຕອນນີ້ອາຍຸເຈົ້າ 30 ປີ ເວລາຊີວິດຂອງເຈົ້າຢູ່ທີ່ 9 ໂມງເຊົ້າ ເປັນເວລາຂອງການເຮັດວຽກ.
ຖ້າຕອນນີ້ເຈົ້າອາຍຸ 40 ປີ ເວລາຊີວິດຂອງເຈົ້າຈະເປັນຕອນທ່ຽງ ເຊິ່ງເປັນຊ່ວງເວລາສັ້ນໆກ່ອນຈະກັບໄປສູ້ຊີວິດອີກຄັ້ງ.
ຖ້າຕອນນີ້ເຈົ້າອາຍຸ 60 ປີ ເວລາຊີວິດຂອງເຈົ້າຢູ່ທີ່ 6 ໂມງເເລງ ເປັນຊ່ວງເວລາທີ່ພະອາທິດກຳລັງຈະຕົກ ເເລະ ເປັນຊ່ວງເວລາເລີກວຽກ.
ເຊິ່ງເອົາອີ່ຫຼີກະບໍ່ຄ່ອຍເຫັນນຳປານໃດໃນຈຸດນີ້ ເພາະຄິດວ່າອາຍຸ ເເລະ ເວລາຂອງເເຕ່ລະຄົນນັ້ນບໍ່ເທົ່າກັນ, ເເຕ່ຈຸດທີ່ຜູ້ຂຽນພະຍາຍາມຈະສື່ຫຼັກໆກໍຄື ສຳຫຼັບໄວໜຸ່ມທີ່ຫາກໍຮຽນຈົບ ຫຼື ຈົບມາໄດ້ບໍ່ດົນ ເຮົາບໍ່ຈຳເປັນຕ້ອງຟ້າວປະສົບຜົນສຳເລັດປານນັ້ນກໍໄດ້ ເພາະຄືທີ່ຮູ້ກັນວ່າປັດຈຸບັນໃນໂລກເຮົານັ້ນ Social Media ຫຼື ສື່ສັງຄົມອອນລາຍມີອິດທິພົນຫຼາຍຕໍ່ຊີວິດຂອງເຮົາ ເຊິ່ງເຮົາຈະເຫັນໄວໜຸ່ມຫຼາຍໆຄົນປະສົບຜົນສຳເລັດຕັ້ງເເຕ່ຊ່ວງອາຍຸ 20 ປາຍຕົ້ນໆ (ປະສົບຜົນສຳເລັດທີ່ນີ້ໝາຍເຖິງ “ລວຍ”) ເລີຍເປັນປັດໄຈໃຫ້ໄວໜຸ່ມຫຼາຍໆຄົນຖືກຜັກດັນທີ່ຈະປະສົບຜົນສຳເລັດ, ເເຕ່ຄຳຖາມທີ່ອາຈານ ຄິມ ຫຼື ຜູ້ຂຽນຢາກຈະສື່ອອກມານັ້ນກໍຄື ການປະສົບຜົນສຳເລັດຂອງເເຕ່ລະຄົນມັນບໍ່ຄືກັນ ທີ່ສຳຄັນກໍຄື “ປະສົບຜົນສຳເລັດໃນອຸດົມຄະຕິຂອງເຈົ້າເປັນເເບບໃດ”
“ຈົ່ງມີຈຸດໝາຍທີ່ຊັດເຈນ ເເຕ່ບໍ່ຟ້າວເກີນໄປ ເພາະໃນຊີວິດໜຶ່ງ ບໍ່ມີຊ່ວງອາຍຸໃດທີ່ໄວເກີນໄປ ຫຼື ຊ້າເກີນໄປ” ແມ່ນເເຕ່ດອກໄມ້ຍັງມີເວລາທີ່ເບັ່ງບານ ເເລະ ສວຍງາມທີ່ສຸດຕ່າງລະດູການ ເເລະ ຕ່າງເວລາກັນໄປ.
ອັນທີ່ຈິງ ເຮົາສາມາດເຂົ້າໃຈເລື່ອງຂອງດອກໄມ້ໄດ້ຢ່າງງ່າຍດາຍ ເເຕ່ຊີວິດເເທ້ຄົນສ່ວນໃຫຍ່ພັດກັບມີຄວາມຄິດທີ່ວ່າ ດອກໄມ້ໃດທີ່ເບັ່ງບານກ່ອນຄືດອກໄມ້ທີ່ງົດງາມທີ່ສຸດ.
• ອີກປະເດັນ ເເລະ ຄວາມຄິດອື່ນໆທີ່ຢາກຈັບມາບອກກໍຄື:
*ໃນຍຸກນີ້ໃບປະກາດບໍ່ສາມາດເປັນໂຕກາລັນຕີຄວາມສຳເລັດໃນຊີວິດເຈົ້າໄດ້ອີກເເລ້ວ, ຢ່າຄິດວ່າການຮຽນຕໍ່ມະຫາວິທະຍາໄລຈະຊ່ວຍເເກ້ໄຂເລື່ອງວຽກງານ (ເເຕ່ໃນຄວາມຄິດສ່ວນໂຕຄິດວ່າ ຖ້າຫາກຍັງມີໂອກາດກໍຍັງຄິດວ່າການຮຽນເປັນສິ່ງທີ່ຈຳເປັນຫຼາຍຕໍ່ໂຕເຮົາ ຍິ່ງຖ້າໄດ້ຮຽນໃນສິ່ງທີ່ມັກກໍແຮ່ງຈະເປັນການເພີ່ມສັກກະຍາພາບໃຫ້ເຮົາໄດ້ຫຼາຍ).
* ຢ່າຜູກຕິດໂຕເອງກັບກະເເສສັງຄົມຫຼາຍເກີນໄປຈົນເຮັດໃຫ້ເຮົາສູນເສຍຄວາມສາມາດ ເເລະ ຄວາມເປັນໂຕເອງ, ຄິດຫາວຽກທີ່ເຮົາມັກ ເເລະ ສາມາດເຮັດໄດ້ດີ ເພາະມັນຍັງມີອີກຫຼາກຫຼາຍອາຊີບທີ່ສາມາດສ້າງລາຍໄດ້ໃຫ້ເຮົາໄດ້.
* ບາງຄັ້ງ, ບັນຫາກໍບໍ່ໄດ້ຍາກ ຫຼື ເປັນຕາຢ້ານສະເໝີໄປ ແຕ່ພວກເຮົາພັດມັກຄິດໄປກ່ອນວ່າມັນຍາກຈົນເຮັດບໍ່ໄດ້, ເຮົາຕ້ອງລົງມື ແລະ ພະຍາຍາມຕໍ່ໄປ ເພາະ “ຮອດຈຸດໆໜຶ່ງຂອງຊີວິດ ພວກເຮົາຈະຮູ້ວ່າພວກເຮົາຄວນເຮັດແນວໃດ”. ໃນແງ່ຂອງຄວາມສໍາພັນກໍເຊັ່ນກັນ ຈົ່ງຮັກກໍຍ້ອນຮັກ ຢ່າຮັກພຽງແຕ່ເຮົາຮັກຕົວເອງ ແລະ ເມື່ອມີການແຂ່ງຂັນຫຼາຍຂຶ້ນບໍ່ວ່າຈະໃນເລື່ອງໃດ ໃຫ້ເຮົາຊອກຫາຂໍ້ມູນທີ່ດີສໍາລັບການຕັດສິນໃຈ ມັນດີກວ່າການເພີ້ຝັນຢ່າງດຽວ.
* ຄວາມສຳເລັດຈະເກີດຂຶ້ນໄດ້ຈາກການເຝິກຝົນ ເເລະ ປະຕິບັດຢູ່ທຸກມື້, ເຮັດຢ່າງຕໍ່ເນື່ອງ ໂດຍສະເພາະການຮຽນຮູ້ໃນປັດຈຸບັນ ເຮົາຈຳເປັນທີ່ຈະຕ້ອງຮູ້ກວ້າງໆຫຼາຍໆເລື່ອງ ເພື່ອນຳມາປັບໃຊ້ໃຫ້ເໝາະສົມ. ອີກສິ່ງສຳຄັນທີ່ປຶ້ມເວົ້າເຖິງກໍຄື ຄວາມສຳພັນລະຫວ່າງຄົນຮອບຂ້າງ ເພາະເຮົາຈຳເປັນຕ້ອງຮຽນຮູ້ທີ່ຈະຢູ່ກັບຜູ້ອື່ນ ເຊິ່ງການປັບເພື່ອການຮຽນຮູ້ຈຶ່ງເປັນເລື່ອງທີ່ສຳຄັນຫຼາຍບໍ່ວ່າຈະຕອນໃດກໍຕາມ.
* ຖ້າເຈົ້າກຳລັງຮູ້ສຶກລຳບາກ ໃຫ້ເຈົ້າລອງເບິ່ງຄົນທີ່ດ້ອຍກວ່າ, ເເຕ່ຖ້າຢາກພັດທະນາໂຕເອງ ໃຫ້ເຈົ້າເບິ່ງຄົນທີ່ເກັ່ງກວ່າຫຼື ເໜືອກວ່າເຮົາ (ເໜືອທີ່ບໍ່ເເມ່ນພູມສາດ ເເຕ່ເເມ່ນຄວາມສາມາດ ເເລະ ປະສົບການ).
* ເສັ້ນທາງເເຫ່ງຄວາມສຸກຢູ່ທີ່ຄວາມຊາບຊຶ້ງໃນສິ່ງທີ່ເຈົ້າມີ ເຈົ້າອາດເມື່ອຍ, ທໍ້ຖອຍ ຫຼື ລຳບາກຈົນບໍ່ຢາກມີຊີວິດຢູ່ຕໍ່ ເເຕ່ອາດຈະມີໃຜບາງຄົນທີ່ຢາກມີຊີວິດເເບບເຈົ້າພຽງມື້ໜຶ່ງກໍຍັງດີ.
* ເຖິງສັງຄົມ ເເລະ ພໍ່ເເມ່ ອາດຈະ “ຕີກອບ” ໃຫ້ເຮົາເປັນໄປຕາມບັນທັດຖານ ຫຼື ຄວາມຕ້ອງການຂອງສັງຄົມ. ເເຕ່ເຮົາກໍຕ້ອງຈື່ໄວ້ວ່າ “ເຮົາຄວນເປັນຄົນຕັດສິນໃຈຊີວິດເຮົາ ດ້ວຍໂຕຂອງເຮົາເອງ”.
“ຊີວິດຂອງເຮົາບໍ່ວ່າຈະຢູ່ໃນໄວໃດກໍມີການເຕີບໂຕ ເເລະ ຕ້ອງຮຽນຮູ້ບໍ່ມີວັນສິ້ນສຸດ ສິ່ງທີ່ໂຫດຮ້າຍກວ່າຄວາມຜິດພາດ ກໍຄືການບໍ່ລົງມືເຮັດອີ່ຫຍັງເລີຍ”
ສຸດທ້າຍເເລ້ວ, ໜັງສືເຫຼັ້ມນີ້ກໍຄົງເປັນອີກໜຶ່ງໃນຕົວເເປທີ່ຊ່ວຍໃຫ້ໄວໜຸ່ມທັງຫຼາຍໄດ້ໃຊ້ມັນເພື່ອຫາຄຳຕອບຂອງຊີວິດໂຕເອງໄດ້ຫຼາຍຂຶ້ນບໍ່ໜ້ອຍກໍຫຼາຍ. ສ່ວນໃຜທີ່ສົນໃຈກໍສາມາດຫາຊື້ໄດ້ຕາມຮ້ານຂາຍປຶ້ມທົ່ວໄປເລີຍ.
ເເລະນັ້ນກໍເປັນພຽງສ່ວນໜຶ່ງຂອງປຶ້ມທີ່ໄດ້ຈັບມາເລົ່າໃຫ້ທ່ານຟັງ ເເລະ ຄິດວ່າເປັນປຶ້ມທີ່ດີຫຼາຍສຳລັບໄວໝຸ່ມທຸກຄົນທີ່ກຳລັງດີ້ນຮົນເພື່ອໃຫ້ໂຕເອງເຕີບໂຕ ໂດຍມັນອາດຈະບໍ່ໄດ້ງ່າຍຢ່າງທີ່ຄິດ ເເຕ່ຈົ່ງຈື່ໄວ້ວ່າ “ຄວາມທຸກໃຈເປັນໝູ່ທີ່ເເທ້ຈິງຂອງການເຕີບໂຕ”.
ເເລ້ວເຈົ້າເດ!ຄວາມເຈັບປວດຂອງເຈົ້າໃນຕອນນີ້ເເມ່ນຫຍັງ?
Reference: “เพราะเป็นวัยรุ่นจึงเจ็บปวด” คิมรันโด เขียน
#ອິນໂຟຢາກບອກ
______
ຖ້າທ່ານຖືກໃຈບົດຄວາມຂອງພວກເຮົາ ກໍສາມາດອຸດໜຸນສິນຄ້າຈາກອິນໂຟບໍ່ວ່າຈະເປັນ ກະເປົາ ແລະ ຕຸກນ້ຳ ເພື່ອສະໜັບສະໜຸນຜົນງານຂອງນັກຂຽນ ແລະ ທີມງານອິນໂຟທຸກໆຄົນ.
ສຳລັບທ່ານໃດສົນໃຈສັ່ງຊື້ ສາມາດຕິດຕໍ່ສອບຖາມທີ່ Inbox ເພຈໄດ້ (ລາຍລະອຽດສິນຄ້າ ແລະ ລາຄາສາມາດເບິ່ງໄດ້ທີ່ https://rebrand.ly/infototebag)
_____
