19/09/2026
බලශක්ති අමාත්‍යාංශයෙන් නව නියෝග!
කොළඹ - 2026 සැප්තැම්බර්
ජාතික විදුලිබල ප්‍රතිපත්තිය යටතේ ජාලගත වහල මත සවිකරන සූර්ය බලශක්ති (on-grid rooftop solar PV) පද්ධති සඳහා වන සියලුම නව ගිවිසුම් සහ දැනට පවතින ගිවිසුම් දීර්ඝ කිරීම් 'Net Plus' ක්‍රමවේදය යටතේ පමණක් සිදු කළ යුතු බවට බලශක්ති අමාත්‍යාංශය විසින් විශේෂ නියෝගයක් නිකුත් කර තිබේ.
බලශක්ති අමාත්‍යාංශයේ වැඩබලන ලේකම් ජී. එම්. ආර්. ඩී. අපොන්සු මහතා විසින් විදුලිබල බෙදාහැරීමේ ලංකා (පුද්ගලික) සමාගමේ සභාපතිවරයා සහ ප්‍රධාන විධායක නිලධාරීවරයා වෙත මෙම නියෝග මාලාව යොමු කර ඇත. 2024 අංක 36 දරන ශ්‍රී ලංකා විදුලිබල පනතේ (සංශෝධිත) 29 (3) වගන්තියෙන් අමාත්‍යාංශය වෙත පැවරී ඇති බලතල අනුව මෙම පියවර ගෙන තිබේ.
මෙම නව නියෝගයේ ප්‍රධාන කරුණු මෙසේය:
'Net Plus' ක්‍රමය අනිවාර්ය කිරීම:
2026 මාර්තු 05 දින හෝ ඊට පසුව ඇති කරගන්නා ලද සියලුම නව ජාලගත වහල මත සවිකරන සූර්ය PV පද්ධති ගිවිසුම් "net plus" පදනම මත පමණක් විය යුතුය.
Net Metering සහ Net Accounting අත්හිටුවීම:
නව සම්බන්ධතා හෝ ගිවිසුම් දීර්ඝ කිරීම් සඳහා මෙතැන් සිට 'Net Metering' සහ 'Net Accounting' ක්‍රමවේදයන් ලබා නොදෙන අතර, දැනට පවතින ගිවිසුම් ඒවායේ කාලය අවසන් වන තෙක් පමණක් වෙනස්කමකින් තොරව ක්‍රියාත්මක වේ. ගිවිසුම් දීර්ඝ කිරීමේදී ඒවා ද 'Net Plus' ක්‍රමවේදයට පරිවර්තනය විය යුතුය.
ගිවිසුම් කාලය වසර 12කට සීමා කිරීම:
සූර්ය බලශක්තිය යනු පරිණත පුනර්ජනනීය බලශක්ති තාක්ෂණයක් බැවින්, එවැනි සියලුම ගිවිසුම් සහ ඒවායේ දීර්ඝ කිරීම් උපරිම වශයෙන් වසර දොළහකට (12) පමණක් සීමා වේ.
ස්මාර්ට් මීටර (Smart Meters) භාවිතය:
උත්පාදනය කෙරෙන බලශක්ති ප්‍රමාණය නිවැරදිව මැනීම සඳහා, බලපත්‍රලාභියාට (Licensee) දුරස්ථව සම්බන්ධ විය හැකි ස්මාර්ට් මීටරයක් (smart meter) සෑම පද්ධතියකටම සවි කිරීම අනිවාර්ය වේ.
ජාල අනුමැතීන් (Grid Clearances):
2026 සැප්තැම්බර් 11 දිනට පසුව ලබා දුන් ජාල අනුමැතීන් සඳහා මෙම නව නියෝගය වහාම අදාළ වේ. කෙසේ වෙතත්, ඊට පෙර අවසන් කරන ලද ගිවිසුම් හෝ ලබා දුන් අනුමැතීන් නැවත විවෘත නොකරන බව අමාත්‍යාංශය වැඩිදුරටත් අවධාරණය කරයි.
මෙම නියෝගයන්ට අනුකූල වන පරිදි අදාළ ආයතනවල අයදුම්පත්, වක්‍රලේඛ සහ අභ්‍යන්තර උපදෙස් කඩිනමින් සංශෝධනය කරන ලෙස ද දන්වා ඇත.
