06/12/2025
Warna offbeat Stories...
2025.12.06
සෝෂල් මීඩියා මෙ(හො)රු
මෙරු කියන්නේ හිටි ගමන් සක්රිය වෙන අත් තටු දෙකක් තියෙන පියාඹලා යන්න හැකියාව තියෙන පුංචි කෘමි ජාතියක්. එහෙම ජීවීන් කොටසක් ඉන්නවද උන් කොහේද ඉන්නේ කින්ද මන්ද මුකුත් හිතාගන්නත් බැරි වෙන්න මුන් හිටපු ගමන් පොළොවෙන් උඩට එනවා. ඊට පස්සේ හරිම කෙටි කාලයකින් කොහේ හරි හැපිලා තටු විතරක් ඉතුරු කරලා අතුරුදන්වෙලා යනවා.
මහ වැස්සක්, සුළි කුණාටුවක්, සුනාමියක්, භූමි කම්පාවක්, නාය යාමක් වගේ මහපොළොවත් කම්පා වෙන ස්වභාවික විපතකදි එළි බහින සෝෂල් මීඩියා ඇක්ටිවිටීස්ල නැත්නම් සමහර කන්ටෙන්ට් ක්රියේටර්ස්ලා කියන්නෙත් මෙන්න මේ මෙරු වගේ මරු ජාතියක්.
මෑත කාලීනව රටට සිද්ධ වුණු විපත් ගාණනාවකදිම මේ කන්ටෙන්ට් ක්රියේටර්ස්ලා ගේ ජීවන චක්රය ක්රියාත්මක වුණේ එකම විදියකට. ස්වභාවික විපතක් වෙන්නම ඕන නැහැ. දේශපාලනමය වශයෙන් සංවේදී මිනිස්සු දහස් ගණනින් එකතු වුණු තැන්වලත් මේ අය මතු වුණා. පොදු ජන ජීවිතයට ඉතාම සංවේදී ඕනෑම කාරණාවකදි ඒ තැන්වලට බැහැලා ග්රවුන්ඩ් එක අල්ලගන්න එයාලා වැඩ කළා. කැමරාවක් මයික් එකක් එක්ක එයාලා ඒ තැන් ආක්රමණය කළා.
මෙයාලා නිතරම ඇල්ලුවේ මිනිස්සුන්ට ගොඩක් සංවේදී තැන්. අපේ මිනිස්සුන්ව ඉමෝෂනල් කරන හැටි මේ අය හොඳට දැනගෙන හිටියා. අදාළ තැන්වලට ගිහින් ලයිව් වීඩියෝස් කිහිපයක් කළ ගමන් එයාලගේ ෆෑන් බේස් එක මෙයාලා වටේ පොදි ගැහුණා.මේ අය ලේ මස් ඇට නහර තියෙන සාමාන්ය මිනිස්සු කියන එකත් අමතක වුණා. දේවත්වයට පවා ඇන්දුවා.
එයාලා දේවාභරණ ඇඳගෙනම අපිව අන්දනවා කියලා මිනිස්සුන්ට තේරුණෙත් නෑ. තේරුණද දන්නෙත් නෑ. හැබැයි වරින් වර දිගටම සිද්ධ වුණේ එකම දේ. මුහුණු ටිකක් වෙනස් වුණා එච්චරයි. මේ ගංවතුරෙ වෙන මූණු ටිකක්. සමහර විට කලින් අයට ආපහු වතුරෙ බහින්න ඕන නැති තරමට ටිකට් එක ඇදෙන්න ඇති.
මේපාර එළියට ආව ඩෙම් පසන්ගේ සහනාධාරවල හොර බිල් කියන්නේ අපි ඒ ඇන්දුන එකේ උච්චතම මොහොත. මෙච්චර කාලයකට කිසිම කන්ටෙන්ට් ක්රියේටර් කෙනෙක් ඔය වගේ බිල් පිටින් එළියට දැම්මෙ නැහැ මතක ඇති විදියට. ඒකෙන් හොඳටම තේරෙනවා මේකා ගංවතුරකට බැහැලම නෑ කියලා. කිරි කෝඩුවා වතුරට බැස්ස ගමන් නාගත්තේ ඒකයි. මේ සිද්ධියෙන් අපි තේරුම් ගන්න ඕන එකම දේ ඩෙම් මේ වැඩේට ආධුනිකයෙක් කියන එක විතරයි.
ඩෙම් පසන් වගේ නෑ අරයා..එයා සුපිරියට කළා..මෙන්න නියම දෙවිවරු..ගංවතුරෙනුත් ගසා කෑවෙ නෑ වගේ සිතුවිලි එන්නේ ඔයා කවදාවත් ව්යසනයකින් ගසා කන මානසිකත්වයක කෙනෙක් නොවන නිසා විතරයි.ඒත් ඔයා නොහිතුවට අනිත් අය මේ වැඩේට ඔස්තාර්ලා. ඒ කියන්නේ ගංවතුර,සුළි කුණාටු කාපර්ලා. අහුනොවෙන්න ගේම ගහනවා. ඕව විගණනය වෙන්න තැනක් නැහැ කියලා ඔස්තාර්ලා දන්නවා. අපිට කියන්න බැහැ අවංකවම චේතනාවෙන් වැඩේට බැස්ස එකම එක කන්ටෙන්ට් ක්රියේටර් කෙනෙක්වත් නැහැ කියලා. ඇති..ඒත් එහෙම රෙකමන්ඩ් කරන්න තරම් කිසිම සහතිකයක් අපට නැහැ.
කන්ටෙන්ට් ක්රියේටර් කෙනෙක් කියන්නේ මිනිස්සු පොළඹවන්න පුළුවන් බලයක් තියෙනව කියන එක. ඇත්ත මේ වෙලාවේ එයාලට කරන්න පුළුවන් ගොඩක් දේවල් තියෙනවා. ඔවුන්ට පුළුවන් මිනිස්සුන්ට උදව් කරන්න ඇඟේ කිසිම කැත කුණක් නොගෑවෙන විදියට. හොඳට හිතල බලන්න රජය නම් කරපු අරමුදල ගැන මෙන්ෂන් කරලා මිනිස්සුන්ට උදව් කරන්න කිව්වෙ කීයෙන් කීයද? ඩෙම් පසන් රජයේ අරමුදල් තිබෙන බව දැක්කෙ නෑලු. එච්චරවත් සෙන්ස් එකක් නැති මිනිහෙක්ට බිලක් බැලන්ස් කරගන්න බැරි වුණ එකේ ලොකු පුදුමයකුත් නැහැ. හදිසි ව්යසනයකදී රටක් විදියට සහන අරමුදලක් ආරම්භ කරන බව ඔය පකීර්ලා නොදැන ඉන්න නම් කොහෙත්ම විදියක් නැහැ.
බෙල්ල කඩාගෙන, ඇස් රතු කරගෙන, නින්දක් නැතිව සහනාධාරවල මැස්සෝවගේ වහලා ඉන්නවනම් සැක කරන්න එපා..අඩුම දේවත්වයට උස්සන්නෙ නැතිව ඉන්න.
මොකද ආධාරයක් කියන්නේ මිනිස්සු ගස්වලින් කඩලා වීසි කරන ඒව නෙවෙයි. මනුස්සයෙක් එවන හැම වතුර බෝතලේකටම, හාල් මල්ලකටම,බිස්කට් පැකට් එකකටම,හැම රුපියලකම වටිනකමක් තියෙනවා. මහා විශාල හැඟීමක් තියෙනවා. කන්න ගත්ත හාල් කොට්ටේ ඇතුළේ හුණ්ඩුව එක්කම එවපු වර්ගයේ දෙවිවරු වගේ මිනිස්සුත් ඉඳලා තිබුණ කියන එක අමතක කරන්න එපා.
දෙරණේ චතුර කියනවා අඩුම ඒ බිස්කට් එකක් මේසෙට ආවට කන්න හිත් දුන්නෙ නැහැ කියලා. ඒකට තමයි මනුස්සයෙක්ගේ හෘද සාක්ෂිය කියන්නේ. හෘද සාක්ෂියක් තියෙන මනුස්සයෙක්ට මේ වගේ මොහොතක අබ ඇටයක දෙයක් ගසාගෙන කන්න බැහැ. විජේරාම කමියුනිටි කිචන් එක මෙතැනදි හැම පැත්තෙන්ම ඉස්සරහින් හිටියා. ලුණුකැටයකට පවා එතැන රෙකෝඩ්ස් තියෙනවා ඔවුන් කියපු විදියට.
ඉතින් හොඳට ඇස් දෙක පිහිදලා බලන්න, ඔයා ඩොනේට් කළේ හරිම තැනටද කියලා. ඔයා ඩොනේට් කරපු කන්ටෙන්ට් ක්රියේටර් ආපාදාවෙනුත් ගසා කන එකක් නෑ කියන්න ඔයාට තියෙන සහතිකය මොකක්ද? නිකමට හිතුවද ඔයා පිරිසිදු හදවතින් හිතලා දෙන්න හදපු දේ ඔයාට ඕනම කෙනාගෙ අතට ගියාද කියලා?
මේ කියන්නේ නිදි මරාගෙන, කෑමක් බීමක් නැතිව අසරණ වුණු මිනිස්සු වෙනුවෙන් අවංක චේතනාවෙන් ඉස්සරහට ආව ඇත්ත මිනිස්සු ගැන නෙවෙයි.
අපි අපේ මිනිස්සුන්ට අපේ අත දෙන්න ඕන වෙලාව තමයි මේ. රජය හෝ ඒ සඳහා සුදුසුකම් ලබපු ආයතනයකට, ඇත්ත හැඟීමෙන් විනිවිදභාවයෙන් වැඩ කරන කණ්ඩායමක් හරහා ඔයාගේ පරිත්යාගය කරන්න පරිස්සම් වෙන්න.
දුන් දේ සුවඳ වෙන්නේ අපි දුන්නු දේ හරිම තැනට ගියොත් විතරයි. දුන් දේ කාගේ හරි සාක්කුවකට, ගිණුමකට ගියොත් ඒකෙන් හමන සුවඳ දරාගන්න පුළුවන් නිල මැස්සන්ට විතරයි. උණුවෙන හදවතක් තිබුණ පළියට ආයේ ආයේ ඇන්දෙන්න එපා. මෙරු එකපාර උඩට ඇවිත් වෙච්චි දෙයක් නැති වෙන්නම අතුරුදන් වෙනවා.
❤️
