28/05/2026
نحس في الدنيا مش ماشية معايا و ملخبطة و متشتت و مضغوط و مش عارف كيف نتصرف ..
أرخي روحك ..
السبب أنها أمور مشتركة بين أفكار متراكمة و أشياء تحتفظ بها و أعمال تؤجلها لعدم ترتيبها و فرزها وهي المسببة لما تعاني منه :
ركز بالورقة والقلم ..
أكتب بدون ترتيب ..
- شن اللي معبي عقلك و تبي تنجزه ومش قادر تنجز منه شي ؟
- شن اللي مستهلك طاقتك اليومية ؟
- شن الحاجات اللي تقدر تغيرهن توا ؟
- القاعدة أنك تبدأ بتغيير اللي بين ايديك و تقدر عليهن و بأصغرهن عادي المهم تتحرك توا ..
- حول كل الكلام الفاضي من حياتك على قد ماتقدر ..أي شي زايد عندك في حوشك .. مكتبك .. شغلك .. مخزنك .. وخصوصاً اللي لك فترة طويلة ماستعملتش.. للعلم في حاجات بالسنوات و في حاجات لن يتم استعمالهن .. يا أما تبيعهن بأي ثمن .. أو تعطيهن لحد يستفيد منهن ( منها فكيت على روحك حمل و منها تحصل الأجر و البركة ) ..
- شوف حاجة فيها فايدة اتضيفها ليومك ( دينية .. رياضية .. مهارة شخصية .. أو معلومة تضيفها تفيدك في حياتك و شغلك ..
قلل من متابعة الأمور الفارغة من أخبار العالم والناس ، و دير شي خلي الناس أتابعه وتهتم بيه ولو فكرة صفحة بسيطة تكبر مع الوقت ..
- قلل من التفكير بدون فعل .. كلها في خاطرها أمور و أشياء تنجزها و هم عارفين مش حيصير شي .. أرمي كل الزوائد من عقلك ..
- قلل من زحمة الناس حولك و الاجتماعيات اللي سارقة وقتك اللي ستندم عليها يوم اتطيح و ماتنفعكش.. ركز في الاجتماعيات الأهم فقط ..
ماتحلش كل المشاكل و الحوسة مرة وحدة ( استلم كل مرة حاجة أبرم عليها ) .. خير ما تقعد مستمر في التخطيط و التفكير و التخيل بلا فعل .. و هذا من الأسباب المهمة اللي مسببتلك الضغط النفسي و الاكتئاب و التوتر و الخوف .
للعلم الكثير من الناس ليسوا عاجزين أو فاشلين ، لكن هم محمّلين عقولهم و أرواحهم أحمال زائدة .. لو خففوا منها واستثمروا وقتهم و مهاراتهم الشخصية بشكل أفضل ، سيخرجون من هذه الدائرة المميتة و المرهقة نفسياً و عقلياً و روحياً ولو بخطوات بسيطة فعّالة ..
ً
