15/08/2026
American Got Talent( AGT) Season-21
Burma ram inhnen, Thailand nunau k*m 16 mite cu audition ih “ Zombie( The Cranberries) hla cu amahin guitar tum cingih a sakmi ah 4 YES rori hmu in rocket vekin a hung lar zurzo! Ngaingaite ti ahcun golden buzzer ngah thei asi tuk nan pek dingmi a rak cem zo ruangah men a si.
Nene ih hmin ngai cu Rattikan “Praew”( Phuket, Thailand) asiih k*m 7 mi asi ihsin guitar a zir thawk. Ziangtin a talent neihmi a thawk ti asile a tlawngkainak ah tlawngta dang pawlin an an mai duhmi subject ciar an rak lak cio zo. Cutikah duhhril ding um loin art( music) subject lawng a tangih laklo theihlo in a lak. Cumi ihsin awnmawi lamah a thawkih a fehnak ding lamzin dik ah a feh thawk cu a si.Guitar tum a hun thiam ziarzo in hlasak a zir hngal. Guitar scale dik zet tei’ tum dan zirhtu a rak nei dah ko nan a tam sawn cu YouTube ihsin a zirhmi a si.
Guitar tum le hlasak mallai a hun thiam ihsin a pa ih khihhmuh khawkhansaknak vekin lamzin sirah an khua a ra tlawngtu, ramdangmi, tourist pawl cu mirang hla thawn awihnak( entertainment) a nei cih. A hla cover mi tete pawl hi leitlun ih lar bikbik le turu taktak pawlih hla an siih guitar tum har zetzet vek tla a tel nan mawi zetzet in a zutin a tum thei thluh a si. Nene uar um zetnak cu hlasa phahin baibah riai loih guitar a tum le zut thei mi hi a si.
A pa ih sim danah nauhak tlawngkai lai asi tikah, càn awl a neihmi( weekend) ah shopping mall hmai, lamzin zirih guitar tumih mi awihnak a neih le nikhat ah 200 baht a ngah thei le thla khat ah thawng khat hrawng a hun ngah thei ve dingih a tawk tuk ko si. Asinan zum aiin a thawknak ihsin zan khat ah paisa 3,000baht lai tla a hun ngah thei ih nauhak te asi lai nan paisa ting khat tiang lai a khawl thei si! a ti.
A Thai hmin ngai cu hmang nawn loin amah duhdawttu pakhatin a sullam letin “ Nene Royal” tiih kawh cu ramdangmi pawl hrangah a awlsam ding ruatih a hun hman soh vivonak a si. Cun amai hohanak in “Ozone band” a dinih nauhak k*m 15,13,12 mipa pawl thawn lamzin sir, shopping mall hmai le cafe dawr tivekah an tum hai ṭheu.
Mi neinung sungkua an si ve lo tikah duhsaktu in AGT zuamawknak ih tel dingih a ti tikah a pa in an neih thil zuarin vanzam ticket man le zuamawknak neih laiih câm nak hotel le eiin man pawl cu hacang rialin a tuah a si.
A vawihnih nak round ah AGT in video a tuahmi ( bass makturu ih tumnak, Muse hla- Hysteria) cu Live thlah hlanah mipi pawlih zoh le ngai thei dingah an thlah. Ahmaisa ta vek thotho in a hla tum le sakmi in mipi a tiangih ting tel thinlung a la vivo.
Cun a ram Siangpahrang fanu hnen ihsin sunlawihnak khal a dawng fawn.
Audition a ṭheh hnu, a lǎngte ih a ram a va kirsal tikah concert a tuahih mino pawl lawng siloin upa, nulepa pawl in thazang pekin an rak sunlawih thiam zet. Local TV channel pawl khalin kawmnak tete an rak neih sak culci hai. Government lamih hotu pawl tiangin an rak sunlawih thiam.
Concert a tuahnak ih T- shirt lilammi pakhat tla cu a ram paisa( baht) ting khat le hrekih lei saktu a nei!
Mirang ṭawng hmang YouTuber lam khalin nasa takin Reaction an tuah ve nasa hai.
Nene hi an ramih rock n’ roll hminthang zet Loso band hotupa, Sek, The Cranberries band le midangdang leitlunih musician hminthang ziangmawzah pawl khalin lawmpinak le thapeknak comment tete an tuah hai.
A pai saduhthlah a kim vivo ih AGT winner asi ding hi zum cio a si.
Kan ram innhnen le sisi, cun Asian mi le sisi, thiam tuk si, nauhakte le sisi cu thazang pekin vote theithei in vote cio sehla tiin kan sawmaw duh fawn a si.
Tuesday zan( Aug 18),8:00 PM( EST) ah Live thlahnak ah a tel thlang ding. NBC lole local channel le Peacock pawlah Live zoh a theih ding.
Amah vek mino talent nei ṭha, Chinmi lak ihsin suak ve hram seh….
