22/04/2026
✍️✍️Kokang lamu ga hpe Miwa amyusha ni a lamu ga hku mu mada mat wa ai lam✍️✍️
✍️✍️Tsaban 18 ten ladaw hta Kokang lamu ga hta Balawng amyusha ni nga pra hkrat wa ai re. Balawng amyusha ni a lapran hta Wuhpung lahkawng ga garan nna shada da nhkrum n ra gasat gala hkrat ai lam ni nga ma ai. Maga mi de gaw Bugang Ai Htam rai n htawm maga mi de gaw Bugang Ai Soi rai nga ai. Bugang Ai Soi gaw miwa Mungdan, Chyinghkang mare na damya hpung ni hpe n gun gang nna Bugang Ai Htam hpe gasat ma ai. Bugang Ai Htam gaw Mungji Ga Maran Jaulung Duwa hpe n gun gang nna Bugang Ai Soi hpe gasat ma ai. Shingrai gasat hkrat ai hta Mungji Duwa hpe garum sa hpyi la ai Bugang Ai Htam gaw dang mat wa sai.
Shaning tsawmra ning na hkra shada da gasat hkrat ai majaw lahkawng maga na Bugang ni hte mare myitsu ni ram ram asak sum mat shajang ma ai. Shingrai majan hpang e, Bugang tang sharawt na Masha pyi n nga mat ai daram rai mat wa ai. Bugang Ai Htam gaw asak u gutgu wa sai re majaw, shi hpe garum na matu Bugang kaji ra wa sai re. Balawng amyusha ni kaw na Bugang tang sharawt na kadai n nga ai re majaw Miwa la, Yang Lu ngu ai wa hpe Bugang kaji Aya tang ya ma ai.
Yang Lu ngu ai wa gaw Balawng shada n gasat shi ai ten kaw na Kokang ga hta Miwa mung kaw na yu hkrat wa ai re. Dai Miwa la Yang Lu gaw Kokang ga hta hpaga ga, sum galaw, wa yaw rai nna ram ram ngamu ngamai wu ai. Dai re ai majaw majan gasat ai shaloi Bugang Ai Htam maga de lusha ni garum jaw ai lam ni nga ma ai. Shi Bugang kaji sha naw tai nga ai ten kaw na Miwa mung de na shi a jinghku kahpu kanau ni hpe shaga sha yu la nna Kokang lamu ga hta grai ngang Kang ai hku nga pra wa nga masai.
Dai hku rai nna Bugang Ai Htam si mat ai hpang gaw Yang Lu gaw Bugang tai wa masai.
✍️✍️Aten ladaw na wa ai hpang Miwa amyusha ni ngu ai Yang Lu a kahpu kanau aru arat ni kaw na mayat maya law htam wa masai. Dai hku law htam wa ai majaw Kokang lamu ga hta, Balawng amyu hta Miwa amyu ni grau law wa ai re. Balawng amyusha n kau mi gaw kaga de mat ma ai. Dai hku rai nna Kokang lamu ga gaw Miwa amyu ni law htam wa, n gun ja wa ai kaw na, Miwa ni a lamu ga hku nna chye na hkap la mat wa ai re.
Researched By Lamai Awng Seng
Date - 22.4.2026
Place - Mungbaw Wing Seng Mare
