03/09/2026
ရေဘေးသင့်သူတွေကို ဆွေမျိုးတွေလို မေတ္တာထားတာကြောင့် ရှိမဖြစ်လိုအပ်တဲ့ပစ္စည်းတွေကို ဒုတိယအကြိမ်လှူဒါန်းမယ့် ဦးခင်လှိုင်
လူရွှင်တော်၊ သရုပ်ဆောင် ဦးခင်လှိုင်က အခုလတ်တလောမှာလည်း ရေဘေးဒဏ်ကို ခံစားနေရတဲ့ လေးမျက်နှာမြို့ကို ဒုတိယအကြိမ်သွားလှူဖို့အတွက် ပြင်ဆင်နေပါပြီ။ မိုးရွာတာ မရပ်သွားသေးတဲ့အပြင် ရေကလည်း မကျသေးတာကြောင့် သွားလို့ရသလောက်ထိသွားပြီး ကူညီပေးမှာဖြစ်ပါတယ်။ ပထမတစ်ခေါက် လှူဒါန်းပြီးသွားပြီဆိုပေမယ့် ရေဘေးသင့်သူတွေရဲ့ လိုအပ်ချက်တွေကို မျက်ကွယ်မပြုနိုင်တာကြောင့် ဒုတိယအကြိမ် ထပ်မံ သွားရောက်တော့မှာပါ။
ဒီတစ်ခေါက်မှာတော့ အလှူပစ္စည်းတွေကို အရင်ကထက် ပိုပြီး ပြည့်ပြည့်စုံစုံ ပြင်ဆင်ထားတယ်လို့ ဆိုပါတယ်။ ဒီတစ်ခေါက် လှူမယ့် ပစ္စည်းတွေက တော်တော်များပြီး အခြေခံ စားသောက်ကုန်တွေ၊ ဆေးဝါးတွေအပြင် ရေဘေးသင့်ဒေသတွေမှာ အလိုအပ်ဆုံး ဖြစ်နေတဲ့ ဆိုလာမီးသီးတွေကိုပါ ထည့်သွင်းလှူဒါန်းသွားမှာ ဖြစ်ပါတယ်။ ရေကြီးတဲ့အချိန်မှာ လျှပ်စစ်မီးတွေ ပြတ်တောက်နေတတ်တာမို့ ညဘက်အမှောင်ထဲမှာ၊ ရေတွေကြားထဲမှာ ဒုက္ခရောက်နေမယ့်သူတွေအတွက် ဒီဆိုလာမီးသီးလေးတွေက အလင်းရောင်လေးတွေ ဖြစ်လာစေဖို့ပါ။
ဦးခင်လှိုင်ရဲ့ အလှူတွေမှာ အလှူရှင်နဲ့ အလှူခံဆိုတဲ့ ကွာဟမှု မရှိဘဲ ဒုက္ခရောက်နေသူတွေကို ကိုယ့်ရဲ့ ဆွေမျိုးရင်းချာတွေလို သဘောထားပြီး လှိုက်လှိုက်လှဲလှဲ ကူညီတတ်တာပါ။ ဆွေမျိုးတွေ ရေဘေးသင့်နေရင် ဘယ်လိုကူညီမလဲဆိုတဲ့ စိတ်မျိုးနဲ့ သူတို့ တကယ် လက်တွေ့မှာ လိုအပ်နေတဲ့ အရာတွေကို အသေးစိတ်ကအစ စဉ်းစားပြီး ဖြည့်ဆည်းပေးတာ ဖြစ်ပါတယ်။ ဒါကြောင့် ဦးခင်လှိုင်ရောက်လာတာကို လေးမျက်နှာမြို့မှာ နေထိုင်သူတွေက လှိုက်လှိုက်လှဲလှဲဝမ်းသာကြတာပါ။ ရင်ထဲက လာတဲ့ စေတနာ၊ ကိုယ်ချင်းစာတရားတွေကြောင့်လည်း ပရိသတ်တွေက သူ့ကိုအနုပညာရှင် တစ်ယောက်ထက် ပိုပြီး မိသားစုဝင်တစ်ယောက်လို ချစ်ခင်လေးစားနေကြတာ ဖြစ်ပါတယ်။ ရေဘေးသင့်သူတွေအတွက် လိုအပ်မယ့်အရာတွေကို အသေးစိတ်စီစဉ်ပြီးလှူဒါန်းပေးနေတဲ့ သူ့ရဲ့စိတ်ထားလေးကို ဘယ်လိုမြင်မိပါသလဲ။
#ခင်လှိုင်
#ရေဘေး
