23/07/2021
"ဝါဆိုလပြည့် ဓမ္မစကြာအခါတော်နေ့"
ဝါဆိုလပြည့်နေ့ဟာ သန္ဓေ၊ တောထွက်၊ ဓမ္မစက်၊ တချက်ပြာဋိဟာ ဆိုသလို ဂေါတမမြတ်စွာဘုရား အလောင်းတော်ရဲ့ -
၁) တုသိတာနတ်ပြည်မှ သက်ဆင်း၍ လူ့ပြည်၌ ပဋိသန္ဓေတည်သောနေ့၊
၂) သူအို၊ သူနာ၊ သူသေ ရဟန်းဟူသော နိမိတ်ကြီးလေးပါးမြင်၍ တောထွက်တော်မူသောနေ့၊
၃) ဘုရားအဖြစ်သို့ရောက်ပြီးနောက် ဓမ္မစကြာတရားဦး ဟောတော်မူသောနေ့၊
၄) သာဝတ္ထိပြည် သရက်ဖြူပင်ရင်း၌ တိတ္တိများကို တန်းခိုးပြာဋိဟာ ပြသောနေ့တို့ ဖြစ်သောကြောင့် နေ့ထူးနေ့မြတ် နေ့တစ်နေ့ ဖြစ်ပါတယ်။
ဒါ့ပြင် ဝါဆိုလပြည့်နေ့ဟာ ဘုရားအဖြစ်ကို ဝန်ခံတော်မူသောနေ့လည်း ဖြစ်သလို တရားရတနာ စတင်ပေါ်ပေါက်ရာနေ့လည်း ဖြစ်ပါတယ်။
ဓမ္မစကြာတရားဦး ဟောတော်မူသောနေ့ဖြစ်သည့်အတွက်ကြောင့်လည်း ဓမ္မစကြာအခါတော်နေ့အဖြစ်လည်း သတ်မှတ်ခဲ့ကြပါတယ်။
ဒီလိုအခြေအနေဆိုးများကြားမှာ ဗုဒ္ဓမြတ်စွာရဲ့အဆုံးအမတွေကို မမေ့မလျှော့ပါနဲ့။ ဒါန၊ သီလ၊ ဘာဝနာကို တတ်နိုင်သလောက် ကြိုးစားကြလို့ တိုက်တွန်းပါရစေ။
ဒါန(၅)မျိုးရှိတဲ့အထဲ အခုကာလမှာ ကာလဒါနဖြစ်တဲ့ လိုအပ်သူများကို တတ်စွမ်းသမျှ ပေးကမ်းလှူတမ်းပြုခြင်းကို အထူးအားပေးလိုပြီး သီလအမျိုးမျိုးရှိတဲ့အထဲမှာ အနည်းဆုံး ၅ ပါးသီလကို ကျွန်တော်တို့တတွေ အမြဲတစေ လုံခြုံစွာထိန်းသိမ်းနိုင်ရင် အကောင်းဆုံးပါ။
ဘာဝနာအနေနဲ့လည်း အာနာပါနကမ္မဌာန်း၊ မေတ္တာဘာဝနာ အစရှိသည့် မိမိတို့အားသန်ရာ တစ်ခုခုကို နေ့စဉ်ပြုပေးပါ။ ဒီလိုပြုမူခြင်းကြောင့်လည်း အကျိုးကျေးဇူးများပြားလှပါတယ်။ အနည်းဆုံးရရှိမယ့်အကျိုးကျေးဇူးမှာတောင် ပြန့်လွင့်နေသောစိတ်ကို စုစည်းပေးသလို၊ လေဝင် လေထွက်ရှု့မှတ်ခြင်းကြောင့် ကျန်းမာရေးကို များစွာအထောက် အကူဖြစ်စေမှာ သေချာပါတယ်။
ဒါကြာင့် အခုလို ကပ်ဆိုက်နေတဲ့ ကာလဆိုးကြီးမှာ ဗုဒ္ဓမြတ်စွာရဲ့ အဆုံးအမတွေကို နာခံလိုက်နာရင်း ကျော်လွှားမယ်ဆို လက်ရှိပစ္စုပ္ပာန်မှာကြုံတွေ့နေရတဲ့ အခက်အခဲတွေကိုလည်း အထိုက်အလျှောက် ပြေလည်နိုင်သလို နောင်သံသရာအတွက်လည်း အကျိုးထူးတွေ ရရှိနိုင်မှာပါ။
မြန်မာပြည်သူပြည်သားအားလုံး ကြုံတွေ့နေရတဲ့ အခက်အခဲအကြပ်အတည်းများမှ အမြန်ဆုံး လွတ်မြောက်နိုင်ကြပါစေ🙏🙏🙏
#ဝါဆိုလပြည့်နေ့
