02/06/2025
МОНГОЛЫН НӨХЦӨЛД МОТОР АРЧЛАХ ЗӨВЛӨГӨӨ.
Монголын нөхцөлд мотор арчлах зөвлөгөө.
Энэ сэдвээр ярихын өмнө автомашины мотор нь олон тооны метал эд ангиудаас бүрддэг бөгөөд хоорондоо үрэлцэж буй эд ангиудын гадаргуу нь тос тосолгоотой байх нь хүний биед ус ямар их хэрэгтэй байдаг шиг чухал зүйл гэдгийг сануулах нь зүйтэй байх.
Монголын нөхцөлд моторт элбэг тохиолддог эвдрэл гэмтлүүд болон эдэлгээ арчилгааны талаар ярихдаа хамгийн эмзэг гэгддэг Direct Injection, Электрон удирдлагат Хавхлагийн систем GDI, D4 мөн VVTiгэх мэт төрлийн моторууд дээр жишээлэн тайлбарлая.
Энэ төрлийн хөдөлгүүрүүдийг бусад энгийн хөдөлгүүрүүдтэй харьцуулахад Монголын нөхцөлд хар тугалагын агуулга өндөртэй бензин, шороо тоостой агаар, газар зүйн хувьд агаарын бага даралтын бүс гэх мэт шалтгаануудын улмаас дутуу шаталт үүсгэн ажилласнаар очлуур болон тосыг маш хурдан тортогтуулж харлуулдаг.
Гэтэл энэ төрлийн хөдөлгүүрүүдийн өндөр даралтын бензин насос, тосны хавлаг VVTi-OCV oil valve гэх мэт нэмэлт туслах эд ангиуд нь хөдөлгүүрийн тосоороо тослогдож ажилладаг бөгөөд маш нарийн (зазор) зай завсар бүхий эд ангиудаас бүрдсэн байдаг. Энэ эд ангиудын нарийн завсраар 0w40, 5w40 бүр дор хаяж 10w40 зэрэг шингэн чанартай тоснууд л чөлөөтэй урсан тослож элэгдлээс хамгаалахаар анхнаасаа тооцоологдсон байдаг. Гэтэл ихэнхи жолооч нар тортогтож харласан (дээрээс нь энгийн өтгөн чанарын) тосыг солилгүйгээр 5000-10000 км*(авто сервисүүдийн механикчидийн буруу зөвөлгөө!!!) явуулсанаас болж эдгээр моторын ажиллагааны гол зүрх нь болох эд ангиудаа (High Pressure Fuel Pump, Oil Control Valve) эвддэг. Мөн очлуур (свеча) дутуу шаталтаас болж хурдан тортогтож бохирдсоноор хөдөлгүүрийн доголдол улам ихэсч асалтад хүртэл нөлөөлж эхэлдэг. Харин свеча нь өөрөө тийм ч амар шатаж эвдэрдэг эд анги биш учир авто сервисүүдийн хэлсэн зоргоор үнэтэй свеча авч тавих нь буруу гэдгийг анхаарах хэрэгтэй.
Эдгээр асуудлыг шийдэх болон мотор зөв эдлэх аргууд:
- ОХУ-аас орж ирдэг А92 болон АИ95 бензин аль нь ч ялгаагүй төрөл бүрийн хольц агууламж ихтэй байдаг учраас хөдөлгүүрийн тосыг харалмагц нь сольж хэвших. /~3000-4000км/
- Автомашин үйлдвэрлэгчээс заасан зориулалтын тосыг хийх эсвэл 5w40 тосыг хийж байх. Энэхүү тос нь бараг бүх төрлийн /суудлын, бензин/ мотортой зохицож ажиллаж чаддаг.
- Свечаг хагас жилд нэг удаа буюу ид хүйтрэлийн өмнө хойно салгаж авч хүчтэй цэвэрлэгч бодис ашиглан тортгийг уусган цэвэрлэж байх. Зүлгүүрдэж болохгүй! Ингэвэл оч хаях хэсгийн гөлтгөр гадаргуу сэвтэснээр илүү хурдан бохирддог.
- Орчин үеийн автохимийн бүтээгдэхүүнүүдээс өөрийн машины хөдөлгүүрт тохирохыг оновчтой сонгон зааврын дагуу хэрэглэж байх. Жишээ нь: Октан ихэсгэгч /бензинтэй холидог/, Нано бүрээс үүсгэгч /хөдөлгүүрийн тостой холидог/ гэх мэт.
- Хүйтний улиралд машин асаасны дараа сайтар халааж байж /усны температурын зүү хөдөлж эхлэх/ хөдлөн явах. Яарсан үед сайн халааж амжаагүй бол маш зөөлөн хаазаар явах.
