07/05/2024
HR: "Таны цалингийн хүлээлт хэд вэ? "
Ажил горилогч: 1 сарын 2.5 сая.
HR: Та уг нь яг манай хайж байгаа хүн байна, гэхдээ манай цалин 2.0 сая, үүнийгээ ч бид зар дээрээ дурдсан байгаа.
Ажил горилогч: За, 2.0 сая эхний ээлжид болно гэж бодож байна.
HR: Та хэзээ эхлэх боломжтой байгаа вэ?
Уг нь тус ажлын байрны цалингийн төсөв 3.5 сая бөгөөд HR цалинг хамаагүй багаар тогтоож чадсандаа, харин удирдлага компанийн зардлыг бууруулж чадсандаа баярлаж байсан ч, шинэ ажилтан хэсэг хугацааны дараа авч буй цалингийнхаа тэгш бус байдлыг хүссэн хүсээгүй мэдэж л тааржээ. Харин энэ үед чухам юу тохиох вэ? Ажилдаа урам зориг буурах, ажлын идэвхи буурах, цаашлаад сэтгэл ханамжгүй байдал үүссэн байна.
Хэсэг хугацааны дараа цалингаа нэмүүлэх хүсэлт тавин нэмүүлсэн ч, бусад ажилтнуудтайгаа цалингийн зэргийн хувьд зэрэгцэж чадаагүй тул, ажилтан ажлаа орхин, өөр компанийг сонгосон байна. Ажилтан авах үйл явц дахин эхэлж, ажлын байр эзгүйрсэн тул, ур чадварын gap үүсэн, байгууллагад хохирол учрах эрсдэл учирсан.
Эндээс харахад, компани өөрсдийн даган мөрдөх, зах зээлийн үндэслэл бүхий цалингийн системтэй, энэхүү систем нь ур чадварын хувьд ангилалтай, хамгийн гол нь энэхүү систем нь хүн бүрд ижил үйлчлэх ёстойг харуулж байна. Ажил горилогч ямар ч шалтгааны улмаас зах зээлээс бага цалин хүсэж болно, харин компанийн хүмүүний нөөц болох та хүн бүрд тэгш боломжийг олгон, ижил хандах нь бидний ажлын үндсэн хэсгийн нэг юм. Бага цалин хүссэнд нь бага, өндөр цалин хүссэнд нь өндөрийг өгөх байдал одоо ч олон компанид үйлчилсээр байгаа нь, бидний ажлыг улам төвөгтэй, ярвигтай болгосоор байгаа тул, ХН-ийн ахлах ажилтнууд ч анхааран, шат шатад нь оролцох нь зүйтэй юм.
Хамгийн сайн ур чадварыг татах үндэс нь, тэр хүний авах ёстой, эсвэл олон жилийн ур чадварыг нь үнэлсэн цалин байна гэдгийг санаарай.
