02/08/2026
MAGANAR AURE GA MATASHI ABU BIYU NE: KO A ZAUNA LAFIYA KO A RABU...
Da fatan zaku karanta sakon da idon basira.
Matashin da yake cike da ƙuruciya da buruka, duk auren da ba zai ƙara maka:
1. Nutsuwa
2. Kwanciyar hankali
3. Zaman lafiya
4. Tsari da kwarin gwiwar gina makoma
5. Kusanci ga Mahaliccinka
6. Rufin asiri da kare kwarjininka a idon duniya
To ka haƙura da wannan auren ka zauna Single ɗinka. Gara ka ci gaba da fafutukar neman halaskanka a matsayin gwauro, fiye da ka ɗauko wutar da zata ƙone duk wani ginin nasarar da ka fara yi a rayuwarka. Zama ba mata baya kisa, amma auren kuskure yana wargaza ƙwaƙwalwa ya kashe zuciya tun kafin gangar jiki ta mutu.
Ana aure ne don a samu nutsuwa, fahimtar juna, soyayya da ibada; muddin za'a rasa su, to ku haƙura ku yi wa juna fatan alkhairi.
Akwai maza da yawa waɗanda rashin dacen abokiyar rayuwa na aure yasa s**a rasa rayukansu, wasu kuma s**a wargaza rayuwarsu wanda har abada ba zai gyaru ba... A gefe guda kuma, akwai mazan da s**a zama manyan mutane, s**a kai matsayin da suke kai a yau, saboda kawai sun yi nasarar auro mace ta gari mai albarka, kyakkyawan tunani, da hangen nesa wadda ta zama silar tsayuwar su. Mace ta gari matakala ce ta hawa zuwa tudun mun tsira, yayin da macen da ba ta dace ba rami ce da zata bizne ka a raye.
Duk macen da ba zaka samu abubuwan da na lissafo a tattare da ita ba, ka haƙura da auren. Ba don komai ba, saboda aure ba kyautar sadaka ba ne ko abin kunya idan an rabu; wata yarjejeniya ce ta dindindin wadda zata shafi addininka, lafiyarka, aljihunka, da kuma ainihin makomar 'ya'yan da zaku haifa.
Wallahi da rayuwar aure da irin wasu matan a gidanka, gara ka yi rayuwa a gidan yari mafi tsauri a duniya.... Saboda a gidan yari gangar jikinka ce kawai a kulle, kana da ranar fita, amma a auren kuskure; tunaninka, darajarka, da ma'anar rayuwarka gaba ɗaya ne suke zama a sarƙe babu mafita.
Kada ka bari tsoron abin da mutane zasu ce ya jefa ka a sahun mazan da suke kuka a zuciya suna yi wa duniya murmushi. Ka yi zaɓi mai kyau wanda zai zama aljannarka a duniya kafin ta gobe ƙiyama.
ISHAQ UMAR Ahmad ✍️
