12/09/2025
A yau idan kayi mamaki saboda ana yin gida a cikin kwanaki 3 da fasahar 3D Printing, ga wata sabuwar fasaha wacce zata iya warware matsala cikin second ɗaya wanda zai dauki computer na yau da ake amfani dasu shekaru dubu kafin su gama..
Wannan fasahar ita ake kira da Quantum Computing.
Mece ce Quantum Computing?
--Quantum Computing wata fasaha ce da aka gina akan ka’idar fasahar "Quantum Mechanics" wacce take kula da halayyar ƙwayoyin zarra (particles) a matakin ƙuruciya. Wannan fasaha tana amfani da qubits (Quantum bits) maimakon bits (0 da 1) na computer na yau.
--A computer namu na yau (Classical Computer), duk wasu bayanai suna zuwa a matsayin "0 ko 1" kawai, shine yaren da computer take ganewa. Amma a "Quantum Computer" qubit na iya zama "0 da 1" a lokaci guda saboda wani abu da ake kira "Superposition" dake tattare da fasahar, haka kuma qubits suna iya haɗuwa da juna a lokaci guda (entanglement) wanda ke sa su yin aiki cikin sauri fiye da kima.
--Bari muyi bayanin a fayyace, misali: Kamfanin Google sun samar da "Google Sycamore Quantum Computer (2019)" Wanda kamfanin Google ta gwada wannan Quantum Computer din wanda a lokacin ya warware wata matsala cikin second 200 kacal (minti 3 da daƙiƙu 20). Idan aka bai wa supercomputer na yau wannan matsalar, zai dauke shi shekaru 10,000 kafin ya gama, amma cikin minti 3 fasahar Quantum computer ta kammala shi.
--Wannan fasahar ta Quantum Computer zata taimaka sosai a bangaren samar da maganin cututtuka (Drug Discovery), Quantum Computer yana iya yin ƙididdiga cikin sauƙi don gano sabbin magunguna da s**a dace da ƙwayoyin cuta, wanda hakan zai kawo sauƙi wajen gano magani ga manyan cututtuka da suke da wahalar samun magani kamar irinsu cutar cancer, HIV, ko cutar COVID-19 da akayi fama da ita shekarun baya, cikin ɗan lokaci zai gano maganin su.
--Haka zalika a bangaren tsaron yanar gizo (Cybersecurity) Idan Quantum Computing ta kammala bayyana a duniya zata iya karya "Encryption" da muke amfani da shi wajen kare bayanan banki, WhatsApp, Facebook, email, da sauran bayanai. Wanda hakan zai iya zama hadari sosai amma kuma masana suna kokarin samar da sabbin hanyoyin tsaro da s**a dace da Quantum era. (Wato lokacin zamanin Quantum da ake shirin shiga).
Saboda saurin lissafi da Quantum Computers suke dashi zasu iya horar da fasahar Artificial Intelligence cikin karamin lokaci wanda hakan zai taimaka wajen ci gaban fasahohin robotics, self-driving cars, da fasahar likitanci.
Abin Mamaki, fasahar AI da muke gani yanzu a matsayin fasaha mai ban mamaki ashe akwai fasahar da zata iya zuwa har ta sha gabanta, ta zama malamar ta.. 😀
Yanzu ka zauna ka ɗan yi tunani idan kana da matsalar da zata dauki computer da muke amfani dasu yanzu shekaru dubu kafin su iya warware maka matsalar, sai kuma ace maka yau ga Quantum Computer zai warware maka wannan matsalar cikin second ɗaya.
Wannan shine dalilin da yasa masana suke cewa Quantum Computing fasaha ce da zata iya sauya duniya gaba ɗaya.
A takaice, Fasahar Quantum Computing tana da ban tsoro kuma tana da ban mamaki. Dalilin da yasa take da ban tsoro shine saboda zata iya karya tsaron da muka dogara da shi a yau. Ban mamakin da kuma take dashi shine saboda zata iya kawo mafita ga matsalolin da ba’a taba tunanin za’a iya magance su cikin sauri ba.
Tabbas, idan Fasahar 3D Printing tana iya kawo sauyi a gine-gine da bangaren lafiya, to Quantum Computing zata iya kawo sauyi mai ban mamaki a dukkan bangarorin rayuwar ɗan’adam, daga bangaren lafiya, tsaro, ilimi har zuwa tattalin arziki.
Allah yasa mu dace.
🖊Salisu Abdurrazak Saheel
