03/06/2026
श्रीमान्को हत्या आरोपमा श्रीमतीसहित तीन जना पक्राउ
ढोरपाटन (बागलुङ) । बागलुङको जैमिनी नगरपालिकामा मजदुरी गर्दै आएका एक पुरुषको हत्या गरेको आरोपमा उनकी श्रीमतीसहित तीन जना पक्राउ परेका छन्। लमजुङको क्व्होलासोथार गाउँपालिका–६ निवासी ६२ वर्षीय देउबहादुर सार्कीको हत्या भएको घटनामा प्रहरीले २६ वर्षीया लक्ष्मी नेपाली, ३८ वर्षीय रामआकाश विश्वकर्मा र ५६ वर्षीय आसपुरे कामीलाई नियन्त्रणमा लिएको जनाएको छ।
जिल्ला प्रहरी कार्यालय बागलुङका अनुसार मृतकसहित चारै जना जैमिनी नगरपालिका–१० राङखानी हाडीकोट क्षेत्रमा मजदुरी गर्दै आएका थिए। सोमबार बिहान मदिरा सेवनपछि सामान्य विवाद चर्किँदा सार्कीमाथि ढुङ्गा प्रहार गरिएको र घटनास्थलमै उनको ज्यान गएको प्रारम्भिक अनुसन्धानबाट खुलेको छ।
प्रहरीले जंगलमा शव फेला परेको सूचना पाएलगत्तै अनुसन्धान थालेको थियो। घटनामा संलग्न रहेको आरोपमा तीनै जनालाई सोही रात गाउँबाट नियन्त्रणमा लिइएको प्रहरीको भनाइ छ। जिल्ला अदालत बागलुङबाट म्याद थप गरी घटनाबारे थप अनुसन्धान भइरहेको प्रहरीले जनाएको छ। प्रारम्भिक अनुसन्धानका क्रममा मृतक र उनकी श्रीमतीबीच पहिलेदेखि नै बेला–बेलामा विवाद हुने गरेको तथ्य पनि खुलेको बताइएको छ।
