06/09/2026
कमिशनको चक्करमा अबोध शिशुको ज्यान: चालक मनोज यादवको क्रूरता र पालिकाको मौनताले निम्त्याएको ‘संस्थागत हत्या l
वीरगञ्ज (पर्सा) आपतकालीन उपचारका लागि दौडिनुपर्ने एम्बुलेन्स कमिशनको सौदाबाजीमा लाग्दा एक गम्भीर बिरामी शिशुको दर्दनाक मृत्यु भएको छ। नारायणी अस्पताल नजिकै हुँदाहुँदै एम्बुलेन्स चालक मनोज कुमार यादवले कमिशनको लोभमा दुई घण्टासम्म शहर घुमाएपछि शिशुको ज्यान गएको हो। यो घटनाले चालकको आपराधिक नियत मात्र होइन, स्थानीय पालिका र जनप्रतिनिधिहरूको चरम लाचारी, नियमनहीनता र मौनतालाई पनि नराम्ररी उदाङ्गो पारिदिएको छ। जीवन बचाउने यात्रा कसरी बन्यो ‘मृत्युको पासो’ प्राप्त समाचार अनुसार गम्भीर बिरामी परेका एक अबोध शिशुलाई आपतकालीन उपचारका लागि पर्साको प्रमुख सरकारी अस्पताल नारायणी अस्पताल लैजान खोजिएको थियो। अस्पताल नजिकै पुगिसक्दा पनि एम्बुलेन्स चालक मनोज यादवले "सरकारी अस्पतालमा डाक्टर र सेवा राम्रो छैन" भन्ने झुटा भ्रम फैलाउँदै मोटो कमिशन पाइने निजी आशाराम’ क्लिनिक लैजान लगातार दबाब दिइरहे।
निजी क्लिनिक र नर्सिङ होमहरूबाट मोटो कमिशन पाइने पूर्व-निर्धारित सेटिङका कारण चालकले बिरामी शिशु बोकेकै अवस्थामा दुई घण्टासम्म वीरगञ्ज शहरका सडकमा एम्बुलेन्स घुमाइरहे। उच्च आवाजमा बजिरहेको आपतकालीन सायरन बिरामीको जीवन बचाउने संकेत नभएर बिचौलिया व्यापारको सौदाबाजी बनिसकेको थियो। दुई घण्टासम्म उपचार नपाएर शिशुको सास रोकिन थालेपछि, चालक मनोज यादव आफ्नो गम्भीर अपराधबाट बच्न जिल्ला प्रशासन कार्यालय पर्साको परिसरभित्रै एम्बुलेन्स, मृत शिशु र उनका रुँदै गरेका आफन्तलाई छाडेर सुटुक्क फरार भए। पछि सुरक्षाकर्मी र अन्य व्यक्तिको सहयोगमा हेर्दा शिशुको ज्यान गइसकेको थियो। गल्ती कसको? चालकको आपराधिक नियत कि जनप्रतिनिधिको लाचारी?
यस क्रूर अपराधपछि अहिले वीरगञ्जमा गम्भीर प्रश्न खडा भएको छ। नागरिक समाज र पीडित पक्षको विश्लेषण अनुसार यो घटनामा चालक मनोज यादवको प्रत्यक्ष आपराधिक हात छ भने पालिका र स्थानीय जनप्रतिनिधिको संस्थागत गैरजिम्मेवारी उत्तिकै दोषी छ
