31/10/2021
DOTr, NAG-AKO NGA INDI SUPORTADO SANG SCIENCE ANG PAGBUTANG SANG PLASTIC BARRIERS SA MGA PUVs GANI PWEDE INI NGA KAKASON
By: JoMaque | Oktubre 31, 2021, 10am
Aksyon Radyo Iloilo
Gin-ako sang Department of Transportation (DOTr) nga indi suportado sang science ang pagbutang sang plastic barriers sa mga public utility vehicles (PUVs).
Ini ang ginpahayag ni Assistant Transportation Secretary for road transport Mark Steven Pastor gani pwede na kakason suno sa iya ang mga plastic barriers.
“Drivers and operators can already remove them because there are no medical findings, based on our studies, that they can prevent the spread of COVID-19. Instead, the virus could stick to them,” ang pahayag ni Assistant Transportation Secretary for road transport Mark Steven Pastor.
Apang gin-athag sang DOTr nga kinahanglan gihapon ang istrikto nga implementasyon sang health safety measures sa tanan nga public transport.
Sang ginpasugtan ang mga jeepney kag bus nga magbiyahe sang sugod Hulyo 3, 2020 paagi sa amat-amat nga pagbukas liwat sang mga ruta sa bilog nga pungsod, naggamit sang plastic barriers ang mga PUV drivers sa ila mga units kag nag-comply sa 50-percent capacity rule sa public transport.
Setyembre sang nagligad nga tuig, gin-athag ni Land Transportation Franchising and Regulatory Board chief Martin Delgra nga wala sang official policy halin sa iya ahensya kag sa DOTr nga naga-require sa mga jeeps nga mag-install sang plastic barriers sa sulod sang salakyan.
Bisan ang Inter Agency Task Force suno sa iya ang wala man nagmandu nga maggamit sang plastic barriers. Pero wala niya gina-discourage ang mga jeepney drivers sa paggamit sini.
Una na ginrekomendar sang mga doktor nga kakason ang plastic barriers sa bangud wala man sang pulos kun wala sang physical distancing.
Agosto subong nga tuig, ginpahayag ni Philippine College of Physicians president Dr. Maricar Limpin nga posible nga magtapik ang virus sa plastic barrier kag mag-infect sa mga pasahero. -- with reports from Inquirer
