20/03/2026
Sikatuna-Sevilla via Cambuac Sur Road, gi-turn over na; P40-M nga kalsada magsilbing alternatibong rota sa Bohol
Gipangunahan ni Gobernador Erico Aris Aumentado ang pormal nga turn-over ceremony sa bag-ohay lang nahuman nga pagsemento sa Sikatuna-Sevilla via Cambuac Sur Road niadtong Marso 18, 2026. Ang maong proyekto, nga adunay contract cost nga ₱39.989 milyones ubos sa PRM Fund sa Kagamhanang Probinsyal, gilauman nga makahatag og mas hamugway nga byahe ug alternatibong agianan alang sa mga Bol-anon sa panahon sa kalamidad.
Ang maong sementadong bahin sa kalsada adunay gitas-on nga 1.6 kilometros ug gilapdon nga 6.10 metros, nga kabahin sa mas taas nga 9.50 kilometros nga Lagtangon-Lobgob Sikatuna Road ubos sa Tagbilaran-Corella-Sikatuna-Loboc (TCSL) network. Sumala ni Gobernador Aumentado, mahinungdanon kaayo ang maong rota isip "alternate route" kung adunay mga pagbaha, linog, o uban pang hulga sa probinsya nga makababag sa mga nag-unang dalan. Gipaboran usab kini ni Provincial Administrator Aster Caberte kinsa nagkanayon nga dako kini og tabang sa publiko aron mapadali ang dagan sa patigayon ug transportasyon.
Atol sa seremonya sa Barangay Lagtangan, Sevilla, gipahibalo usab sa Gobernador ang plano nila ni Mayor Emmanuel “Junnin” Caberte nga mangita og dugang ₱50 milyones nga pondo aron matiwas ang nahabiling 1.3 kilometros nga wala pa masemento. Kauban sa maong kalihokan sila si Vice Mayor Juliet Dano, Kapitana Heralda Cruzo sa Brgy. Lagtangan, ug ang mga opisyales gikan sa Provincial Engineering Office sa panguna ni OIC Engr. Evelyn Ayuban.
Gawas sa maong proyekto, giduso na usab ni Aumentado ngadto sa nasudnong kagamhanan ang listahan sa uban pang mga kritikal nga rota sa probinsya nga nagkinahanglan og dinaliang semento, lakip na ang mga kalsada sa Dagohoy, Buenavista, Pilar, Sierra Bullones, ug Ubay. Gitapos sa Gobernador ang iyang mensahe pinaagi sa pag-awhag sa katawhan nga magpabiling nagkahiusa ug mag-ampo, dungan ang pag-ingon nga ang mga lider instrumento lamang sa kahitas-an sa pagkab-ot sa mga damgo alang sa kalamboan sa Bohol.
| Jomer Pequit
