22/05/2026
ورلڈ بینک وفد کی میئر کراچی ،واٹر کارپوریشن اور کے ڈبلیو ایس ایس آئی پی کے حکام سے ملاقات
کراچی میں پانی و سیوریج کے منصوبوں پر پیش رفت اور مستقبل کی حکمتِ عملی پر تبادلۂ خیال
ورلڈ بینک کے وفد نے میئر کراچی بیرسٹر مرتضیٰ وہاب، کراچی واٹر اینڈ سیوریج کارپوریشن کے اعلیٰ حکام اور کراچی واٹر اینڈ سیوریج سروسز امپروومنٹ پروجیکٹ کے نمائندوں سے پلاننگ اینڈ ڈویلپمنٹ ڈیپارٹمنٹ میں ملاقات کی۔ ورلڈ بینک کے وفد میں ڈائریکٹر آپریشنزگیلیئس ڈراگیلس ،کنٹری ڈائریکٹربولورما آمگابازار ،ریجنل ڈائریکٹرمیسکیرم برہانے ،ٹاسک ٹیم لیڈر کے ڈبلیو ایس ایس آئی پی ٹیزیانا اسمتھ نے شرکت کی۔اس دوران کراچی میں پانی کی فراہمی، سیوریج نظام کی بہتری اور جاری ترقیاتی منصوبوں کی پیش رفت کا تفصیلی جائزہ لیا گیا۔ملاقات کے دوران شہریوں کو بہتر بنیادی سہولیات کی فراہمی، پانی و سیوریج کے انفراسٹرکچر کی اپ گریڈیشن، جاری ترقیاتی منصوبوں کی رفتار اور مستقبل کے مجوزہ اقدامات پر تفصیلی تبادلۂ خیال کیا گیا۔ شرکاء کی جانب سے مختلف تجاویز اور سوالات پیش کیے گئے جن پر جامع گفتگو کی گئی۔اس موقع پر اس عزم کا اعادہ کیا گیا کہ کراچی کے شہریوں کو جدید، مؤثر اور پائیدار پانی و سیوریج سہولیات کی فراہمی کے لیے ورلڈ بینک کے تعاون سے جاری منصوبوں کو مزید مؤثر انداز میں آگے بڑھایا جائے گا۔ اجلاس میں باہمی تعاون، مربوط حکمتِ عملی اور ادارہ جاتی اشتراک کو مزید فروغ دینے پر بھی اتفاق کیا گیا تاکہ شہر کے انفراسٹرکچر کو جدید تقاضوں سے ہم آہنگ بنایا جاسکے۔شرکاء نے اس بات پر زور دیا کہ پانی اور سیوریج کے شعبے میں جاری اصلاحاتی اقدامات کراچی کے شہریوں کے معیارِ زندگی میں بہتری اور شہری سہولیات کے استحکام میں اہم کردار ادا کریں گے۔
