17/09/2024
"جشنِ ظہورِ نُورﷺ "
جو زُجاجِ حُسن و جمال ہے ، جو سراجِ اوج و کمال ہے
جو علاجِ کرب و مَلال ہے ، اُسی خوب تر کا ظہور ہے
جو اَلَست سُن کے بَلیٰ کہے، سَرِ عرش حمدِ خداﷻ کرے
جو حضورِ حق میں رہا کرے ، اُسی خوش سِیَر کا ظہور ہے
جو طَرَب کرے گا مَلال کو ، جو گُہَر کرے گا سِفال کو
جو سخی کرے گا بلالؓ کو ، اُسی شاه گر کا ظہور ہے
جسے "قَد راٰی" کی لِقا ملی , جسے "مَا طَغٰی" کی بَقا ملی
جسے شانِ اوجِ دَنٰی ملی, اُسی حق نِگَر کا ظہور ہے
جو ازل سے پیکرِ جُود ہے ، جو لَئیقِ عِزِّ دُرُود ہے
جو دلیلِ ذاتِ ودود ﷻ ہے ، اُسی بَہرَہ وَر کا ظہور ہے
ہے چمن چمن تری دلکشی ، ہے دَمن دَمن تری روشنی
ہے وطن وطن جو خوشی خوشی یہ شہِ بشرﷺ کا ظہور ہے
