17/07/2022
لاهل #نابلس 😍😍😍
شو يعني أنك من نابلس؟
يعني:
تشوف هاد البيت طابخ ملوخية.. وهاد البيت عم يقلي بيتنجان... وريحة الخيار يعني سلطه... والسمك شارح حالو لحالو... ودبح البطيخة فضيحة..
في نابلس... كان القمر فيها بالصيف يعني كزدورة على منتزه جمال عبدالناصر... وكل عرس يعني تلبيسه... وكتب الكتاب ملبس..
نابلس... اللي منها أمي اللي كانت تقول: "يا أمي غسلوا وجهكم لأنكم ما بتعرفوا مين بيبوسوا وكنسوا بيتكم ما بتعرفوا مين بدوسوه"
وابوي يقول: "جارك أخاك...اذا ما شاف وجك بيشوف قفاك"
نابلس اللي لما بيندق فيها باب الدار كنا نتحزر بين بعضنا مين وبنقول: ياترى مين إجانا؟
هي نقرة جارتنا سريعة وقصيرة...
هاي دقة عمتي ناعمة وخفيفه...
هاي خبطة ابن الجيران ببوز البوط ع الباب..
هاي خشخشة المفاتيح..هاد بابا عم ينادي يا الله..يا الله حتى اذا عنا نسوان يتغطوا...
انا من مدينة الكنافة والحلو الطيب وملبس القضامة والطمرية
مدينة الصابون والعطارة
انا من مدينة التمر الهندي وعرق السوس والقمر الدين
مدينة الحمص والفول عافطار رمضان.. واصابيع البوبو يا خيار ... وخضرة يا لوزة الجبل..
نابلس.. مدينة كل شي بيصير فيها بيستاهل يكون خبريه... ولدت القطه... فتحت الفلة... زهرت الياسمينة... مدينه حتى حبال الغسيل بتحكي قصص وملاقط الغسيل بتنقل رسايل ونشر الغسيل عنا منشان ما ينقال عن الست عفشة وكركوبة...
في نابلس ما احلا لمة شعبان وفرحة الاخوات والخلان ...
في نابلس كان بيت الجيران أول باب بندقه لما بنخلص خبز او بدنا ليمونه... وأول بيت بنزوره في العيد لناخد أول عيدية
والبيت يلي بيتحمل ولدنتنا وقت ندق على السقاطة وبنهرب. .ومنرش على عتبته مي لما بدنا نشطف الحوش أو الحارة
بيت الجيران يل بنوقف قدامه لنوصل صحن طبيخ من شغل امنا عشان يذوقوه معنا برمضان...
في نابلس كان بعد الإفطار برمضان سوق نازل... قناديل وفتاش وطرمس وبليله...
في حارتنا ما كان في قطه جعانه وكلاب الشوارع كانت شبعانه...
في بيتنا كان متل كل بيت في البلد القديمة...
فلة ودالية واضاليه وقرطاسيه وليمونة...... وبكل مطبخ مرتبان مكدوس وتنكة جبنة ونملية فيها الزيت والزعتر...
في نابلس وبحارات بلدتها القديمة كانت الشتوية غير يا عيني على ايامها كانت الصوبا ولهبها ويلا كانون النار بيقمر بالخبزات وكاسة الشاي وشوي الكستنا...
في نابلس وبحاراتنا القديمة كانت الغيرة تشتعل بس حد يلطش اختنا أو بطلع عليها كانوا كل بنات الحارة أخواتنا وشبابها إخوتنا...
نسيت أخبركم... أنه بعد كل مشوار على المنتزة بنروح نتحمم قبل ما نطلع على التخت لأن الشراشف نظيفة ووجوه المخدات مغيرين ... واذا غلط واحد فينا وفات باواعي الطشه كانت أمي تقيم قيامتنا ...
عمار يا نابلس🇵🇸❤😍
