17/02/2026
MP Mohamed Abib Yusuf Barta facebook hadalkiisa kubayaanshay ? Waxaad arkayseen shalay, Soomaaliya oo daryeel Caafimaad u fidinaysa Xamse iyo Xuseen oo kamid ah dhallinyartii ciidanka Qaranku ku dhaawaceen 4-tii December magaalada Boorama ee xaaladdooda Caafimaad ay gabtay dowladdii ay u dhasheen ee Somaliland— Waa isla dowladdii ciidankeedu sida badheedhka ah u toogteen.
Waxa dadka oo dhan ogaayeen sidii loola dhaqmay dhallinyarada iyo waalidooda oo dayac xooggan kala kulmay Addis Ababa, xilli loogu qaaday in Caafimaadkooda lala tacaalo— Dhawaan ayay ahayd markii aanu cabashadooda bulshada u gudninay anaga oo fileynay in xukuumaddu tabashadooda ka jawaabto, balse markii ay dhegaha ka furaysatay, waxa ka faa'ideystay dowladda Soomaaliya oo u dirtay dalka Turkiga si loogu dabiibo.
Waxaan u mahad celinayaa Wasiir Ayuub Ismaaciil, oo garwaaqsaday in aanu wiilasha walaalihii ah dayaca ku daawan ee u gargaaro. sidoo kale, waxaan mar kale dhaliilayaa xubnaha gobolka u dhashay ee ku jira xukuumadda Madaxweyne Cirro oo fursad siiyay in waddan kale baanto ubadkooda ay dayaceen, kuwaas oo ay ahayd in ay Madaxweynaha u gudbiyaan haddii ay tahli-waayeen, balse ka gaabiyey.
Ugu dambayn, waa nasiib darro iyo gef labaad oo laga galay shacabka reer Boorama, intoodii ka badbaaday geerida 4-tii December, ee dhaawacyadu gaadheen oo xukuumaddu ka gaabisay kaalinteedii kaga aaddanayd daryeelka Caafimaadkooda.
