09/03/2024
☆ Bandhigga Buugagga Bari ee 2024: Dheefo, Dhaliilo, iyo Talooyin
Markii ugu horraysay ee taariikhda waxaa lagu qabtay magaalada Boosaaso—caasimadda gobolka Bari—Bandhigga Buugagga Bari. Waxa uu socday bandhiggani laba maalmood oo kala ahaa Isniin iyo Talaado, Maarso 3-4. Sannadkan aynnu ku jirno (2024) dhacdadani waxa ay noqonaysaa 'dhacdadii ugu weynayd' ee ka dhacday degmada Boosaaso.
Maadaama bulshada ku nool Boosaaso ay ku liitaan akhriska, akhriskana laga faa'iido aqoomo, dhaqammo, iyo khibrado shakhsiga ogaalkiisa kor u qaadaya, Bandhigga Buugagga Bari kalkiisii kowaad waxaa halkudheg looga dhigay 'AKHRIS iyo OGAAL.' Labadii maalmood ee uu bandhiggu socday waxa ay dhegaysteen dadweynihii ka soo qayb galay fadhiyo lagu faallaynayay heerka akhris ee shacabkeenna; sida waalidku u kobcin karo awoodda akhris ee ubadka, laguna ababin karo akhriska iyaga oo yaryar; dadka baahiyaha gaarka ah qaba iyo caqabadaha ka haysta waxbarashada guud ahaan, akhriska gaar ahaan; kaalinta akhrisku ka qaadan karo soosaarista ardo jaamacadeed oo cilmibaadhis wanaagsan samayn kara; iyo sida loo tayayn karo naadiyada akhris ee haddeer jira, si loo abuuro degaan akhris oo dadka jeclaysiinaya, kuna dhiirrigalinaya akhriska.
Sida oo kale, labadii maalmood ee uu bandhiggu socday qorayaashii martida ahaa waxaa la siiyay fursado ay ku soo bandhigaan buugaggooda, kuna faahfaahiyaan sababihii ku dhaliyay in ay qoraan iyo mawduucyada ay ku saabsan yihiin iyo nuxurrada laga faa'iidayo. Waxaa kale oo iyana kanshooyin la siiyay shirkadaha dhiganayaasha daabaca, maktabadaha dhiganayaasha iibiya, iyo madallada dhiganayaasha turjuma. Waxaa xusid mudan oo aysan ahayn in laga tago bandhiggu intii uu socday in laga warramay khayraadka dalkeenna iyo in la gorfeeyay xaaladaha waaweyn ee eegga taagan (sida: damaca Itoobiya ee baddeenna).
In lagu naqdiyo waxaa ka wanaagsan in aad adigu isnaqdiso. Waayo, waxa aad xog tifaftiran ka haysaa shaqadii aad qabatay duruufihii ku hareeraysnaa oo dhan iyo qorshayaashii aad samaysay, kadibna waxa aad qiimayn kartaa wixii kuu fulay iyo wixii kaa xumaadayba. Halkan waxa aan doonayaa in aan ku soo gudbiyo—aniga oo kamid ah kooxdii ka shaqaynaysay qorshaynta, qaabaynta, iyo qabsoomidda —gorfayn qodobaysan oo ku saabsan Bandhigga Buugagga Bari.
● Dheefo:
1: Bandhigga Buugagga Bari waxaa maalgaliyay qaar kamid ah ganacsatada magaalada Boosaaso. Ma jirin hay'ad taageertay iyo garab laga helay Dawladda Buntilaan. Dhan kasta oo la dhugtaba waxa uu ahaa 'barnaamij iskutashi ah' oo ay gadaal ka riixayeen dhallinyaro quusan waayay oo ay ka go'nayd in Boosaaso lagu qabto bandhig buug.
2: Waxaa fursado badan oo wax-ku-ool ah la siiyay dadka reer Buntilaan guud ahaan, dadka reer Boosaaso gaar ahaan, haddii ay yihiin qorayaal iyo haddii ay yihiin aqoonyahan kalaba. Borograamyo badan oo lagu qabtay Buntilaan waxa ay si cad oo aan la fahmi karin isaga indhatireen waxgaradka ku nool Buntilaan. Bandhigga Buugagga Bari waxa uu ku guulaystay in uu reer Buntilaan baro in ay leeyihiin qorayaal iyo aqoonyahan badan, kuwaa oo si wanaagsan u fahansan wadciga nololeed iyo juqraafi-siyaasadeed ee ka jira degaankooda.
3: Labadii maalmood ee uu bandhiggu socday waxaa si qotadheer loo lafaguray bulshada ku nool Buntilaan (gaar ahaan Boosaaso) mustawahooda akhris iyo sida loo kobcin karo. Waxaa dadweynihii ka soo qayb galay bandhigga loo soo bandhigay habab kala duwan oo carruurtu inta ay yar yihiin lagu bari karo akhriska, laguna jeclaysiin karo—iyo qaabab kor loogu qaadi karo akhriska bulshada oo ay kamid yihiin naadiyada akhriska ee jira in la tayeeyo oo la dhiirrigaliyo; in maktabad akhris loo sameeyo dugsi kasta; in la abuuro fagaarayaal lagu gorfeeyo dhiganayaasha, laguna qabto doodaha bulsheed iyo siyaasadeed; iyo in la soo celceliyo oo la joogteeyo bandhigyada buugagga. Talooyinkaa waxaa ka faa'iidaystay dad badan oo u badan waalidiin, macallimiin, iyo dadka u dhaqdhaqaaqa arrimaha bulshada.
4: Akhyaartii ka soo qayb galay bandhigga waxa ay isku raaceen maktabad weyn oo rasmi ah in loo sameeyo magaalada Boosaaso. Waxa uu dadka hortooda ka ballanqaaday maayarka Boosaaso, Md. Cabdifataax Xaaji Shanle, in Dawladda Hoose ay dhisi doonto Rugta Akhriska ee Boosaaso, taa oo lagu wada farxay. Hadafkaa waxtarka ah si loogu sii dhawaado, qorayaashii bandhigga ka soo qayb galay waxa ay boqollaal buug ugu deeqeen maktabadda la samayn doono.
5: Maadaama dadweynihii bandhigga ka soo qayb galay ay Soomaali ahaayeen, barnaamijyadii baxay af Soomaali ayaa lagu soo wada gudbiyay, oo af qalaad waa laga ilaaliyay bandhigga sida ka dhacda meelaha qaar. Barnaamijyadaa waxaa daawaday, celcelis ahaan, 200,000 oo ruux, taa oo caddaynaysa ahmiyadda ay lahaayeen iyo sida wanaagsan ee looga faa'iidaystay warbaahinta. Bandhigga Buugagga Bari waxaa loo sameeyay jadwal wanaagsan oo si qurxoon uga turjumayay halkudhegga la qaatay.
● Dhaliilo:
1: Bandhigga Buugagga Bari waxaa lagu soo beegay xilli ay waxbarashadu socoto iyo maalmo la shaqeeyo. Dugsiyada qaar iyo jaamacadaha qaar xilligii bandhiggu socday imtixaan baa u socday. Dad badan oo Boosaaso iyo meelo kale ku nool oo jeclaa in ay bandhigga ka soo qayb galaan waxa ay caqabad badan kala kulmeen waqtiga bandhigga lagu soo aadiyay.
2: Borograamkan oo kale waa borograamyada ay waajib tahay in waqti badan la galiyo si wax badan looga fikiro, loogana fiirsado. Wax walba degdeg iyo caaddifad ah bandhiggani ha qabsoomo baa lagu qabtay. Taasi waxa ay keentay in la waayo wax badan oo uu bandhiggani u baahnaa oo bili lahaa.
3: Inkasta oo hoolkii bandhigga lagu qabtay ahaa hool caalami ah, haddana codbaahiyuhu waxa uu ahaa mid aad u liita. Si fiican la isuma maqlaynin, kaqaybgalahana mekrafoonno badan oo isku darsaday culays, foolxumo, iyo tayo la'aan baa loo wada dhiibayay. Taasina waxa ay sabab u noqotay in buuqu bato, barnaamijyadii oo socdana dadka qaar kamid ahi sheeko u gaar ah qabsadaan.
4: Waxaa hadlay dad badan oo aan qayb ka ahayn jadwalkii loo sameeyay bandhigga. Dadkii barnaamijka ka wada shaqaynayay oo guddiyo (kala shaqo ahaa) ka wada tirsanaa la isma barin, mana jirin xidhiidh wanaagsan oo ka dhexeeyay. Dhallinyaradii loo xilsaaray borotakoolka waxa ay ahaayeen kuwo shaqadoodii ku fashilmay. Iyada oo la sugayo dadku in ay soo bataan waxa ay sabab u noqotay waqti badani in uu lumo iyo waqti aan ku jirin jadwalkii loo sameeyay bandhigga in la soo kordhiyo. Wacyigalin badan oo waxtar ah lama samaynin.
5: Dadweynihii karaamada lahaa ee waqtigooda qaaliga ah u soo huray Bandhigga Buugagga Bari in ay dhiirrigaliyaan lagama qayb galin bandhigga. Lama siinin fursado badan oo ay wayddiimahooda, faallooyinkooda, iyo talooyinkooda hufnaanta leh ku soo gudbiyaan (marka laga tago dhawr qof oo kanshooyin kooban la siiyay). Taasi waxa ay dhalisay natiijo ah dadku in ay caajisaan iyo dareen ah dadka in loogu yeedhay oo keli ah in wax lagu shubo.
● Talooyin:
1: Waxa aan ku talinayaa 'Bari Book Fair' in lagu baddalo 'Bosaso Book Fair.'
2: Waxa aan ku talinayaa Bandhigga Buugagga Boosaaso in loo sameeyo guddi ka shaqeeya in la sii joogteeyo oo la sii horumariyo, kuwaa oo aqoon iyo khibrad qotadheer u leh sida loo agaasimo, loona maammulo bandhigyada buugagga, kuwaa oo leh meel loogu soo hagaagi karo iyo qaab loola xisaabtami karo.
3: Waxa aan ku talinayaa guddidaasi in ay Bandhigga Buugagga Boosaaso u raadiyaan taageerayaal badan iyo maaliyad badan—iyo in ay badiyaan tirada qorayaasha, turjumaannada, maktabadaha, shirkadaha, iyo aqoonyahannada kale ee ka soo qayb galaya bandhigga. Sida oo kale, waxa aan ku talinayaa maalmaha bandhigga in la badiyo oo ugu yaraan saddex maalmood laga dhigo.
4: Waxa aan ku talinayaa kahor munaasabadda Bandhigga Buugagga Bari in la bixiyo koorsooyin badan oo ku saabsan fahanka iyo noocyada akhriska, fahanka iyo noocyada qoraalka, naxwaha af Soomaaliga, astaamaha qoraalka, xeerarka shibbanayaasha labalaabma, habqoraalka curiska, iyo habqoraalka sheekada gaaban, iyo in la joogteeyo koorsooyinkaa oo bandhigga laga horraysiiyo kol kasta.
5: Waxa aan ku talinayaa sannad walba in la doorto halkudheg cusub, kaa oo xidhiidh weyn la leh mawduuca sannadkaa loogu baahida badan yahay, lagana baaraandego halkudhegga la xulanayo.
~~●~~
W/Q: Maxamed Samiik
