14/11/2022
Waan Qalin-Jabiyay, Shaqana ma hayo
Talooyin ku socda Ardayda soo qalin-jabisay balse aan Shaqo helin:
1. Marka koowaad ha niyad jabin, hana murugoon. Shaqo raadintu waxay rabtaa dadaal iyo dulqaad. Ha is oran maxaa kaa qaldan. Shaqo la’aantu waa badan tahay, keligaana ma aha.
2. Baro xirfado kale kuwaasoo aad si bilaash ah uga baran karto internet-ka sida YouTube kuna shaqaysan karto. Qasab ma aha wixi aad soo baratay kaliya inaad shaqo ku hesho. Waxaa jira bogag & Apps xirfado cusub laga baran karo oo ay ku jiraan Jaamacado caan ah.
3. Shaqo ayaad abuuri kartaa oo iskaa u shaqaysan kartaa sida ganacsi yar. Waxaa jira fursado badan oo lacag yar lagu bilaabi karo. Runtii dhalin badan ayaana samaysay oo hal abuur cusub soo kordhisay. Inaad cid u shaqayso keliya ma aha.
4. Isku day inaad si mutadawacnimo ama iskaa wax u qabso ah aad ugu adeegi karto Bulshada. Waxaa jira hawlo badan oo is-xilqaan iyo samafalnimo ah deegaan kasta. Waxaad ka helaysaa waaya aragnimo, firfircooni iyo inaad mashquul noqoto.
5. Ha ku dhicin dabinka ah inaad aaminto in shaqooyinku Garab la isku geeyo, qof wax soo bartay aan la rabin. Fikradaha negative-ka ah saamayn ayay kugu yeelanyaan, stress badan ayaadna ka qaadaysaa.
6. Si gaar ah u baro xirfadaha hadalka iyo isgaarsiinta, Xiriirka shaqo, qoraalka, Luuqada, Qorshe sameynta, Teknoolajiyada, xisaabaadka, wada-xaajoodka, Xallinta mushkiladaha, iwm. Tayada iyo awoodaada ayay xoojinayaan.
7. Ballaari shabakadaada - La saaxiib dadka wax ku oolka ah ee shaqeeya ama ganacsiga sare leh, fikrado cusub bay kugu biirin karaan, fursado ku siin karaan, talooyin iyo tilmaan aad ka heli kartaan.
8. Badi Aqriska Buugaagta. Isku day maalin kasta inaad wax aqriso, daawato muuqaalo dhiirigelin iyo aqoon kororsi aad ka helayso.
9. Ducada iyo talo saarada Alle marnaba ha ka tagin. Xusuusnow Alle ayaa bixiya risiqa, fududeeya shaqada, qofkana waafajiya talaabada saxda ah.
10. Ka fogow inaad qabatinto Fadhi-ku-dirir ama Reaction bixin samayso taasoo gadaal kuu celinaysa, nervous-na kaa dhigaysa.
Adigu wixi aad soo baratay miyaad ku shaqaysaa mise wax ka duwan?
Farah Cawaash
Halkan ka akhriso maqaalo dheeri ah
Www.fursadsimali.com
