10/09/2026
Agjenda e Gjelbër – sfidat dhe të arriturat në rajonet Lindje dhe Juglindje
AZHR Lindje organizoi tryezën e rrumbullakët “Agjenda e Gjelbër – sfidat dhe të arriturat në rajonet Lindje dhe Juglindje”, në kuadër të projektit “Agjenda e Gjelbër në rajonet Lindje dhe Juglindje”, financuar nga Ministria e Zhvillimit Rajonal (MZHR).
Në tryezë morën pjesë mbi 30 përfaqësues të komunave të rajoneve Lindje dhe Juglindje, institucioneve, organizatave të shoqërisë civile, si dhe ekspertë nga Kosova dhe Shqipëria.
Diskutimi u fokusua në sfidat dhe mundësitë për zbatimin e Agjendës së Gjelbër, shkëmbimin e praktikave të mira dhe forcimin e bashkëpunimit ndërmjet institucioneve, në funksion të një zhvillimi më të qëndrueshëm.
Gjatë tryezës u ndanë përvojat dhe rekomandimet e ekspertëve nga Co-PLAN, Tiranë, lidhur me tranzicionin e gjelbër, politikat klimatike dhe zhvillimin e qëndrueshëm. Po ashtu, përfaqësuesit e komunave prezantuan të arriturat, projektet e realizuara dhe sfidat me të cilat përballen në zbatimin e objektivave të Agjendës së Gjelbër.
Gjatë tryezës, Drejtoria e Zhvillimit Ekonomik i njoftoi të pranishmit se draft Strategjia e Zhvillimit Ekonomik Lokal 2026–2031 e cila pritet te aprovohet së shpejti në kuvend është në përputhje me objektivat e Agjendës së Gjelbër.
Strategjia parasheh një sërë iniciativash konkrete, si krijimin e Fondit Komunal Mjedisor, zhvillimin e ekonomisë qarkore, zbatimin e masave për efiçiencë të energjisë në objektet publike dhe banesat kolektive, si dhe projekte për zhvillimin dhe mbrojtjen e mjedisit.
Zbatimi i Agjendës së Gjelbër është përgjegjësi e brezit të sotëm ndaj brezave të ardhshëm. Në këtë drejtim, AZHR Lindje, në bashkëpunim me Ministrinë e Zhvillimit Rajonal dhe institucionet lokale, duhet të vazhdojë ta shtyjë përpara këtë koncept, duke e kthyer atë në projekte dhe veprime konkrete që kontribuojnë në një zhvillim më të qëndrueshëm.
Agjenda e Gjelbër është agjendë e së ardhmes, ndërsa përkushtimi ynë sot është investimi më i mirë për një të ardhme më të pastër, më të shëndetshme dhe më të qëndrueshme për brezat që vijnë.
