22/07/2026
O‘zbekiston Respublikasi Energetika vazirligi huzuridagi Qayta tiklanuvchi energiya manbalari milliy ilmiy-tadqiqot institutida "O‘zbekiston–Xitoy qo‘shma ilmiy-tadqiqot laboratoriyasi" ning tantanali ochilish marosimi bo‘lib o‘tdi. Mazkur laboratoriya "Bir makon, bir yo‘l" tashabbusi doirasida O‘zbekiston va Xitoy o‘rtasida energetika sohasidagi ilmiy-texnik hamkorlikni rivojlantirish maqsadida tashkil etildi.
Tadbirda O‘zbekiston Respublikasi Energetika vazirining birinchi o'rinbosari Umid Maxmudovich Mamadaminov hamda Xitoy Xalq Respublikasining Ichki Mo‘g‘uliston Avtonom Rayoni Partiya qo‘mitasi kotibi o‘rinbosari Shi Guanghui, hamda ikki davlatning oliy ta’lim va ilmiy muassasalari vakillari ishtirok etdi. Tadbir davomida qo‘shma laboratoriyaning ramziy ochilish marosimi o‘tkazilib, ilmiy hamkorlikning istiqbolli yo‘nalishlari muhokama qilindi.
Qo‘shma laboratoriya doirasida quyosh, shamol va vodorod energetikasi hamda energiya saqlash texnologiyalari yo‘nalishlarida qo‘shma ilmiy tadqiqotlar olib borish, innovatsion ishlanmalarni yaratish, yuqori malakali mutaxassislarni tayyorlash hamda ilg‘or energetika texnologiyalarini O‘zbekiston va Markaziy Osiyoda joriy etish bo‘yicha hamkorlik amalga oshiriladi.
