16/10/2026
د افغانستان د سوداګرۍ او پانګونې خونې د تېلو او ګازو ټانکلرونکو د تخصصي کمېټې میاشتنۍ ناسته ترسره شوه.
جمعه، د تلې ۲۴مه، ۱۴۰۵
د افغانستان د سوداګرۍ او پانګونې خونې د تېلو او ګازو ټانکلرونکو د تخصصي کمېټې میاشتنۍ ناسته د خونې مديره پلاوي د دارالانشاء رئیس ښاغلي الحاج ذبیحالله عمرخېل، د یادې کمېټې رئیس ښاغلي الحاج مسعود راحت او د کمېټې د غړو په ګډون ترسره شوه. په دې ناسته کې د تېلو او ګازو په سکټور کې د شته ستونزو، د مالیاتي چارو د تنظیم، د تېلو ټانکونو د معیاري کولو او د تخنیکي ستونزو حل په اړه خبرې وشوې.
د مجلس په پیل کې ښاغلي حاجي مسعود راحت د اجنډا په اړه د معلوماتو له وړاندې کولو وروسته د افغانستان د سوداګرۍ او پانګونې خونه د حکومت او خصوصي سکټور ترمنځ د اړیکو پل وباله. نوموړي د کمېټې له غړو وغوښتل، چې خپلې ستونزې او وړاندیزونه په مشخص ډول مطرح کړي، څو د رسمي لارو چارو له مخې د ستونزو بنسټیز حل او خلکو ته د خدمتونو وړاندې کولو بهیر د ښهوالي زمینه برابره شي.
ښاغلي راحت د افغانستان اسلامي امارت د مشرتابه هغه فرمان ته په اشارې، چې په ځانګړې توګه د حلقوي لويو لارو او د هېواد عمومي سړکونو په اوږدو کې د تېلو ټانکونو د عصري کولو او معیاري کولو په اړه صادر شوی ټینګار وکړ، چې د یادې لارښوونې له مخې د تېلو ټول ټانکونه مکلف دي، چې د خوندیتوب وسایلو د برابرولو ترڅنګ د مسافرو لپاره اړینې اسانتیاوې هم برابرې کړي. په دغو اسانتیاوو کې د نارینهوو او ښځو لپاره جلا جوماتونه او د اوداسه ځایونه هم شامل دي.
ورپسې د کمېټې غړو د ګازو د پلور په مرکزونو کې د مالیاتو توپیر او د ثابتې نرخنامې نشتوالي په اړه بحث او د نظرونو تبادله وکړه او په دې برخه کې یې د یوه منظم او اصولي مالیاتي سیسټم د تنظیم او پلي کېدو غوښتنه وکړه.
همدارنګه د هغو ځینو درنو ترازوګانو تخنیکي ستونزې هم د بحث بله موضوع وه، چې د ټانکر موټرو د وزن تثبیت لپاره کارول کېږي. د کمېټې غړو په دې برخه کې د شته ستونزو په اړه اندېښنه څرګنده کړه او د یادو ترازوګانو د تخنیکي نیمګړتیاوو پر وخت ارزونې او حل پر اړتیا یې ټینګار وکړ.
د ناستې په پای کې د تېلو او ګازو ټانکلرونکو د فعالیتونو اړوند نور موضوعات هم له تخنیکي اړخه وڅېړل شول او د کمېټې غړو د خپلو فعالیتونو ښهوالي او د شته ستونزو حل په موخه خپل نظرونه او وړاندیزونه وړاندې کړل.
