09/08/2026
د سوداګرو اتحادیو د مسوولینو او د هلمند د سوداګرۍ او پانګونې خونې ترمنځ ناسته ترسره شوه.
یکشنبه، د زمري ۱۸مه، ۱۴۰۵
د هلمند د سوداګرۍ او پانګونې خونې او د سوداګرو بېلابېلو اتحادیو د مسوولانو ترمنځ د سوداګريزو ستونزو د شریکولو، د چارو لا ښه تنظیم او د همغږۍ پیاوړتیا په موخه ناسته وشوه.
په یاده ناسته کې د سوداګرۍ او پانګونې خونې سرپرست رئیس حاجي احمدشاه سیال، لومړۍ مرستیال، د شخړو د حل کمېسیون رئیس او د مدیره پلاوي پر غړو سربېره د سوداګرو بېلابېلو اتحادیو مسوولینو هم ګډون کړی و، چې پکې د شورمانو اتحادیې رئیس، د معاملاتو لارښوونې اتحادیې رئیس، د تېلو پلورونکو اتحادیې رئیس، د طبی درملو د کاروباريانو اتحادیې رئیس، د چرګانو روزونکو اتحادیې رئیس، د ټوکر کاروباريانو اتحادیې رئیس، د سبزيو کاروباريانو اتحادیې رئیس او د صرافانو اتحادیې مسوولین شامل وو.
د ناستې په جریان کي د سوداګرو او اتحادیو مسوولینو له لوري د خپلو کاري برخو اړوند ستونزې، غوښتنې او وړاندیزونه شریک شول. ګډونوالو د سوداګریزو چارو د ښه تنظیم، د سوداګرو ترمنځ د همغږۍ، د شته ستونزو د حل او د سوداګرۍ د لا پراختیا په اړه خپل نظرونه څرګند کړل.
د هلمند د سوداګرۍ او پانګونې خونې مشرتابه د سوداګرو او اتحادیو د مسوولینو خبري او وړاندیزونه واورېدل او د شته ستونزو د حل لپاره یې د لازمې همکارۍ او همغږۍ ډاډ ورکړ. همدارنګه پر دې ټینګار وشو، چې د سوداګرۍ خونې او د سوداګرو اتحادیو ترمنځ دوامداره اړیکي او ګډ کار کولای شي د سوداګرو ستونزې په ښه توګه حل او د کاروبارونو د ودې لپاره یې زمینه برابره کړي.
په پای کي ګډونوالو د ورته ناستو پر دوام ټینګار وکړ او ویې ویل، چې د سوداګرو د ستونزو حل او د سوداګریزو چارو د لا ښه والي لپاره به د اړوندو ادارو او اتحادیو ترمنځ ګډې هڅي دوام وکړي.
