24/04/2026
Milli Məclisdə Heydər Əliyev irsinə həsr edilmiş konfrans keçirilib.
Milli Məclisin Regional məsələlər komitəsinin təşkilatçılığı ilə 23.04.2026-cı il tarixdə “Azərbaycanda regionların, yerli demokratiyanın və özünüidarəetmənin inkişafında Heydər Əliyev irsi” mövzusunda konfrans keçirilib.
Konfransda Azərbaycan Bələdiyyələrinin Milli Assosiasiyalarının nümayəndələri də iştirak edib.
Tədbiri açan komitə sədri Siyavuş Novruzov bildirib ki, Ulu Öndər Heydər Əliyevin dövlətçilik irsi Azərbaycanın bütün sahələrində olduğu kimi, regionların inkişafı, idarəetmənin təkmilləşdirilməsi və yerli özünüidarəetmə institutlarının formalaşdırılmasında da mühüm rol oynayıb. Qeyd edib ki, Ulu öndərin regionların sosial-iqtisadi inkişaf siyasəti bu gün cənab Prezident İlham Əliyevin rəhbərliyi ilə uğurla davam etdirilir.
Sonra Milli Məclis sədrinin müavini Ziyafət Əsgərov çıxışında vurğulayıb ki, Azərbaycan Respublikasında demokratik və hüquqi dövlət quruculuğu, müstəqil dövlət institutlarının formalaşdırılması, eləcə də yerli özünüidarəetmə və vətəndaş cəmiyyəti təsisatlarının yaranması məhz Ulu Öndərin adı ilə bağlıdır.
Sonra Milli Məclisin İqtisadi siyasət, sənaye və sahibkarlıq komitəsinin sədri Azər Əmiraslanov “Heydər Əliyev - Azərbaycanda regional inkişaf strategiyasının banisi” mövzusunda çıxış edib. O, bildirib ki, Ulu Öndər Heydər Əliyevin regional iqtisadi siyasət təcrübəsi bu gün də aktualdır.
Tədbirdə Ədliyyə Nazirliyinin Bələdiyyələrlə iş baş idarəsinin rəisi Elmin Həsənov “2026 – Şəhərsalma və Memarlıq İli: bələdiyyələr qarşısında duran vəzifələr” mövzusunda çıxış edib. Onun sözlərinə görə, cari ildə bələdiyyələr öz fəaliyyətlərinə yeni baxış formalaşdırmalı, şəhərsalma məsələlərinə birbaşa məsuliyyət sahəsi kimi yanaşmalıdırlar.
Sonra Azərbaycan Bələdiyyələrinin Milli Assosiasiyasının Bələdiyyələrin Onlayn Xidmət Mərkəzinin direktoru Adil Əhmədov “Rəqəmsal İnkişaf Konsepsiyası və bələdiyyələrin fəaliyyət istiqamətləri” mövzusunda çıxış edib. O, rəqəmsallaşmanın bələdiyyələrin fəaliyyətinə tətbiqi, bu sahədə əldə olunan nəticələr və qarşıda duran vəzifələr barədə ətraflı məlumat verib.
Müzakirələrdə Milli Məclisin deputatları Vüqar Bayramov, Aydın Hüseynov, Vasif Qafarov, Azərbaycan Şəhər Bələdiyyələrinin Milli Assosiasiyasının sədri Təmraz Tağıyev, Azərbaycan Qəsəbə Bələdiyyələrinin Milli Assosiasiyasının sədri Hümbət Hüseynov, Füzuli rayonu Horadiz bələdiyyəsinin sədri Tural Nəbiyev çıxış ediblər.
Daha sonra Milli Məclisin Regional məsələlər komitəsinin sədri Siyavuş Novruzov tədbirə yekun vuraraq konfransın səmərəli keçdiyini bildirib.
Tədbirdə Milli Məclisin deputatları Səttar Möhbalıyev, Elman Məmmədov, Aydın Mirzəzadə, Elşən Musayev, Məzahir Əfəndiyev, Arzuxan Əli-zadə, parlament Aparatının əməkdaşları, bələdiyyələrin milli assosiasiyalarının təmsilçiləri, şəhər və rayon bələdiyyələrin nümayəndələri və digər şəxslər iştirak ediblər.
Azərbaycan Bələdiyyələrinin Milli Assosiasiyaları
