01/08/2026
Bu gün Dövlət Məşğulluq Agentliyinin yaradılmasından 35 il ötür!
Hər bir böyük uğurun arxasında doğru zamanda verilən qərarlar və dəstəkləyici addımlar dayanır. Mənim sahibkarlıq və peşəkar inkişaf yolumda Dövlət Məşğulluq Agentliyinin rolu xüsusilə əvəzsizdir.
2019-cu ilin çətin karantin dövründə Agentliyin Özünüməşğulluq proqramı çərçivəsində təmin edildiyim avadanlıqlarla ilk mərkəzimin təməlini qoydum. Bu dəstək mənə öz gücümə inanmaq və sahibkarlıq addımlarımı inamla atmaq üçün böyük təkan verdi.
Keçən il isə Agentliyin təşkil etdiyi İnsan Resursları (HR) mütəxəssisi üzrə təlimlərdə iştirak edərək imtahanı yüksək nəticə ilə bitirdim və dövlət nümunəli rəsmi sertifikat əldə etdim.
Bu gün isə qürurla qeyd edə bilərəm ki, həmin təməllər üzərində boy atan fəaliyyətim CHEMHRLAB MMC - İşədüzəltmə və Kadr İnkişafı Mərkəzi kimi formalaşdı. Artıq mən özüm də təsisçisi və rəhbəri olduğum mərkəz vasitəsilə kadrların inkişafına və əmək bazarında öz yerlərini tapmalarına töhfə verirəm.
Ölkəmizdə məşğulluğun artırılmasına, vətəndaşların potansiyalının reallaşdırılmasına və sahibkarlığın inkişafına xidmət edən Dövlət Məşğulluq Agentliyini 35 illik yubileyi münasibətilə samimi qəlbdən təbrik edir, Agentliyin bütün heyətinə gələcək fəaliyyətlərində daha böyük uğurlar arzulayıram! 👏
