02/19/2023
برنامج العمالة الماهرة - إكسبرس إنتري
-- -- ---- -- -- ---- -- -- -- -- -- -- -- -- -- -- ---- -- -- -- -
حطينا بوست تفصيلي عن الكفالة الخاصة ، وراح نكمل حكي عن طرق الوصول إلى كندا بالتفصيل و نبدا اليوم بالبرنامج المذكور أعلاه، المقال مكتوب من قبل الاخ Alfadl a Hattab و هو استشاري هجرة معتمد و تم التنسيق معه قبل نشر المقال، في حال وجود استفسارات عامة (ليست حالات شخصية ) يرجى وضعها بالتعليقات
بسم الله نبدأ
قبل ما إدخل بالموضوع حابب وضح إنو الإكسبرس انتري هو نظام لإدارة 3 برامج هجرة، يعني هو بحد ذاته مانو برنامج هجرة، لكن أحد أكبر برامج الهجرة فيه وبنظام الهجرة الكندي بشكل عام هو برنامج العمالة الماهرة، يلي بيعتمد بشكل مباشر على مؤهلات الشخص، والبرنامج مفتوح دائماً ومالو علاقة بجنسية المتقدم أو ببرامج اللجوء، ومعظم المهاجرين يلي إجو على كندا إجو عن طريق هالبرنامج. رح نحكي بوقت لاحق عن برنامجين الهجرة التانيين الموجودين بالإكسبرس إنتري.
بالنسبة لبرنامج العمالة الماهرة، لحتى تكون مؤهل للبرنامج وتدخل بنظام الإكسبرس انتري لازم تحقق 67 نقطة ضمن معايير البرنامج، ولازم على الأقل يكون عندك درجة 6 بامتحان الايلتس جنرال، وشهادة دراسية، ومدخرات مالية. علماً انه هي المؤهلات مجرد البداية وما بتعني إنك مرشح قوي للبرنامج. الرابط التالي بيشرح المتطلبات الأساسية والنقاط بشكل مفصل:
https://www.canada.ca/en/immigration-refugees-citizenship/services/immigrate-canada/express-entry/eligibility/federal-skilled-workers.html
فإذا كنت مؤهل ببرنامج العمالة الماهرة بتدخل على نظام الإكسبرس انتري، وبيبدأ مشوار جديد وحسبة جديدة.. الرابط التالي بيحسبلك نقاطك:
http://www.cic.gc.ca/english/immigrate/skilled/crs-tool.asp
وإذا حابب تعرف كيف فيك ترفع نقاطك ممكن تتطلع على طريقة حساب النقاط على هالرابط:
https://www.canada.ca/en/immigration-refugees-citizenship/services/immigrate-canada/express-entry/eligibility/criteria-comprehensive-ranking-system/grid.html
تقريباً بتحتاج يكون عندك 440 نقطة لحتى يكون عندك فرصة جيدة بالبرنامج، أما إذا كان عندك أقل من 400 نقطة ففرصتك صعبة جداً، لكن إذا كنت قريب ممكن تقدر تعمل بعض الإضافات ترفعلك نقاطك.
برأيي، المرشح المثالي لبرنامج العمالة الماهرة هو شخص أعزب بعمر 20 إلى 29 سنة، يحمل شهادة ماستر، واجتاز امتحان آيلتس جنرال (أو ما يعادله) بدرجة 7 في مهارات الكتابة والقراءة والتحدث ودرجة 8 بالاستماع، ويحمل خبرة عملية سنة على الأقل. وإذا الشخص متزوج فزوجته بدو يكون عندها مؤهلات مشابهة (بناء على السيناريو المفترض هنا).
بتمنى إذا في أسئلة بالتعليقات تكون حول نفس الموضوع..
مصطلحات مستخدمة:
برنامج العمالة الماهرة Federal Skilled Worker - FSW
إكسبرس انتري Express Entry
آيلتس جنرال IELTS General
