18/08/2026
🛑 في منصة اتعملت اسمها Aqar Exit علشان كل اللي عنده عقار ومتعثر في اقساطه يبيعه بدون اوفر برايس انا شايف ان المنصة دي فضحت #السوق العقاري بصورة مخيفة.
أنا شايف إن نسبة ضخمة جدًا من الناس اللي اشترت #عقارات من بعد 2023 لبست في الحيطة حرفيًا.
بص على معظم الحاجات المعروضة للبيع دلوقتي…
صاحب #الوحدة غالبًا عايز يرجّع فلوسه اللي دفعها بس، من غير أوفر ولا مكسب كبير.
🛑 وطبعا معظم العارضين #مضاربين عقارات ولبسوا في الحيط .
ومع ذلك لما تقارنها بسعر الشركة، تلاقي إن شراء الوحدة من الشركة أحيانًا أحسن:
مقدم أقل + تقسيط أطول + نفس الوحدة تقريبًا.
🛑طيب هتبيع لمين؟
وهنا المشكلة.
🛑لأن #العقار اللي كان بيتباع على أساس إنك تشتريه النهارده وتبيعه بعد سنة أو سنتين بسعر أعلى، بقى محتاج تلاقي شخص مستعد يدفع أكتر من سعر الشركة نفسها.
وموضوع إن الوحدة عندك جاهزة أو هتستلم أسرع كان زمان ميزة قوية.
لكن مع التأخيرات وعدم الالتزام بمواعيد التسليم عند عدد كبير من المطورين، حتى النقطة دي بقت ميزة ضعيفه جدًا.
وده معناه إننا بدأنا ندخل في مرحلة خطيرة:
🛑المعروض بيزيد… والمشتري الحقيقي مش موجود اصلا .
والأخطر إن المشكلة مش بس في القاهرة.
بص على #الساحل الشمالي.
المعروض الحالي والمخطط له هناك ضخم جدًا، لدرجة تخليك تسأل:
إحنا بنبني لكل #المصريين وا #لعرب كام مرة؟
ومش محتاج أتكلم عن عشرات المشاريع…
🛑 كفاية أقولك إن بعض المدن الإماراتية الجديدة اللي بيتقال عنها إنها مدن متكاملة، مساحتها في بعض الحالات ضخمة جدًا مقارنة بمدن مصرية كاملة.
ومثال واضح: #مدينتي.
🛑 مدينتي بقالها حوالي 20 سنة، ولسه المدينة نفسها في مراحل مستمرة من التطوير والاستكمال والسكن.
وده يخليني أسأل سؤال بسيط:
لو كل سنة بنبني مدن ومشروعات أكبر من احتياج السوق الحقيقي…
🛑مين هيشتري كل ده؟
مش لازم ينهار مرة واحدة.لمن انهياره بيكون وراء بعض .
الكوارث #الاقتصادية أحيانًا بتبدأ بشكل أهدى من كده:
وحدات كتير للبيع
→ مبيعات أبطأ
→ إعادة بيع أصعب
→ تنافس بين المالك والشركة
→ خصومات
→ تقسيط أطول
→ ثم اكتشاف إن السعر اللي على الورق مش هو السعر اللي حد مستعد يدفعه فعلًا.
وده بالضبط اللي أنا شايف إننا بدأنا نشوفه.
المشكلة إن ناس كتير لسه بتبص على سعر الإعلان…
مش على #السعر اللي الوحدة ممكن تتباع بيه فعلًا.
وده فرق كبير جدًا.
🛑السوق العقاري مش بيقاس بعدد الأبراج اللي بتتبني…
🛑السوق بيتقاس بعدد الناس اللي عندها قدرة ورغبة حقيقية إنها تشتري.
والسؤال الأهم مش:
“العقار هيوصل لكام؟”
السؤال:
🛑“هتلاقي مين يشتريه منك بالسعر ده؟”
