17/08/2026
قالولو: دراسة التربة بـ10 ملايين… قال غالية! 🤦♂️
نحكيلكم على قصة حقيقية، وكل واحد يحكم وحدو في الأخير…
مستثمر كان حاب ينجز جدار إسناد بتكلفة تقارب 200 مليون سنتيم.
قبل ما يبدأ، نصحناه يدير دراسة تربة باش نعرفوا طبيعة الأرض ونقدروا نحسبوا الجدار بطريقة صحيحة.
راح للمخبر…
الدراسة خرجتلو بحوالي 10 ملايين سنتيم.
قال:
"10 ملايين على دراسة؟! الجدار كامل ما يفوتش 200 مليون!"
ورفض.
قال: نبنيه وخلاص.
وبالفعل بناه…
لكن المشكل ما كانش غير في دراسة التربة، حتى تصريف المياه خلف الجدار ما تخدمش كما يلزم.
جات الأمطار 🌧️
المياه تجمعت…
الضغط زاد…
والجدار طاح.
وهنا تبدلت الحسبة كاملة:
الـ10 ملايين اللي شافهم غاليين في البداية، ولات أرخص حاجة في المشروع.
لأنو اليوم ما بقاش يحسب تكلفة دراسة التربة فقط…
لازم يحسب:
❌ جدار تهدم
❌ إعادة البناء
❌ يد عاملة
❌ مواد
❌ وقت ضايع
❌ وأضرار كان يقدر يتفاداها من البداية.
وهنا السؤال الحقيقي:
هل كانت دراسة التربة بـ10 ملايين غالية؟
ولا هو اللي خلّى الـ10 ملايين تولّي عليه أغلى؟
والأخطر من هذا…
علاش كي نكونو رايحين نشرو سيارة، نسقسو على كل تفصيلة فيها، وكي نكونو رايحين نصرفو مئات الملايين في البناء نقولو: "ديرها وخلاص"؟
الهندسة والخبرة ماشي مصاريف زايدة على المشروع…
هي المصاريف اللي تقدر تمنع عليك خسارة المشروع كامل.
ملاحظة الصورة غير حقيقة وهي محاكاة الذكاء الاصطناعي ...
