09/04/2023
الطفل الحركى طفل talkative ( كثير الكلام ) ، اللى أحنا بنقول عليه رغااااى 😁
مشكلة الطفل الحركى أنه طفل بيتكلم كتير وهى ميزة وعيب .
عيوبها :
أن كتر الكلام بيعطله عن أى مهمة بيعملها ، يبتدى يقعد يذاكر يتكلم ، المهمة أو المذاكرة أو الواجب بياخدوا وقت طويل جدا بسبب الكلام .
بيقاطع أى حد بيتكلم عشان عاوز هو اللى يتكلم ومبيديش فرصة لأى حد يقول أى حاجة لأنه مبيفصلش ...
بيعيد ويزيد فى الكلام ويقول تفاصيل ملهاش لازمة فى الموضوع والرد اللى هيتقال فى كلمتين بيتقال فى موضوع بسبب كتر الكلام ...
بيقاطع مدرسينه عشان يقول حاجة ملهاش أى علاقة بموضوع الدرس ...
من كتر الأفكار اللى فى دماغه ومن كتر اللى عاوز يقوله بيتكلم بسرعة عشان يلحق يتكلم قبل ما حد يتكلم لدرجة أن ده ممكن يعمل له تهته ...
مميزاتهة:
أن الطفل بيحكى اللى بيحصل فبالتالى هيحكيلك اللى حصل بره معاه ولو حد كان ضايقه ..
هيفيده كتر الكلام فى مهارة ال presentation..
ممكن تشجعيه يذاكر من خلالها أنه هو اللى يشرح ليكى الدرس بعد ما تشرحيه له فيثبت الدرس فى عقله أو تقولى له تعالى أسجلك فيديو وأنت بتشرح الدرس فهيكون مبسوط أنه بيمارس حبه للكلام وهو فى الحقيقة بيتكلم ..
فيه وظايف كتير بتعتمد على قدرة الشخص على الكلام فلو الطفل أتعلم مهارات الإتصال والأقناع والتأثير فهتفيده لما يكبر فى الوظايف دى ..
طيب نعمل إيه عشان نحجم الرغى وميطلعش طفل رغاى الناس تزهق منه ؟
لما يقعد يذاكر أعملوا قواعد أننا مينفعش نتكلم فى كلام خارج موضوع الدرس وأول ما يبدأ يتكلم بعد ما تبتدوا فكريه بالقواعد ولو هيتكلم فى حدود موضوع الدرس ولكن معلومات هتخرجكم عن مهمتكم ردى ردود مغلقة مش ردود مفتوحة تسمح بالمناقشة أكتر ورجعى أنتباهه للدرس تانى ..
لو بيتكلم فى موضوع وبيعيد ويزيد فى نفس المعلومة نبيهيه أنه عاد المعلومة أكتر من مرة ( بأسلوب لائق ) عشان يتعلم ميكررش الكلام ( مرة فى مرة بالممارسة ) ..
لو هيقاطع حد أعتذرى بلباقة أنه ينتظر لحد ما اللى قدامه يكون جاهز يسمعه او يخلص كلامه وأشكريه وأثنى عليه لما ينتظر ..
وأخيرا أهو بيسليكى بدل ما أنتى قاعدة ساكتة ، صحيح بنبقى نفسنا نقول أسكتوا شوية أفصلوا ده التلاجة بتفصل 😁 ، بس هنعمل إيه ربنا يخليهم لينا 😍
