25/09/2026
فى مشكلات خيانة الزوج لزوجته بواجه نوعين من الزوجات .. حابة انك تلاقى حل لمشكلتك لو كنتى منهم ..
زوجة نوع اول بتفضل تنكر ان هى اهلمت فى نفسها و ان شخصيتها مش كانت سطحية كتير ولا حاجة .. و بتدى الف مبرر لان الزوج هو اللى غلط فقط و لوحده
فى حين ان لو فرضنا حتى ان هى كانت الطرف المعطاء المغدق بكل ما تملكه على زوجها وبيتها .. ده بحد ذاته خطأ منها و مش بتعرف نتيجته غير لما الزوج بيشعر انه حابب يلاقى كيانه فى علاقة تانية يكون فيها بيجرب شعور جديد و هو انه يبقى الطرف السعيد بالعطاء مش فقط المستمتع بالأخذ.
بتفضل سنين تقول انها بتحبه و متعلقة بيه
و لكن فى الحقيقة بعد كتير اقناع لها ان ده مش حب
و انه مجرد محاولات اثبات للذات انها تستحق ،
و ان هى مش معذبة الى هذه الدرجة من خيانته لها قد ما هى معذبة بأنها اتفاجأت بتفاقم عيوب شخصيتها اكتشف أخطاء كتير - حتى قبولها للاهانة او الاستغلال او عدم معرفتها على الأقل و ان كل. ده حصل بدون تعويض او تعهد جاد منه بعدم التكرار - قبولها و تخطيها ده بتكرار و استمرار خطأ جسيم فى حق العلاقة ..
و زوجة نوع تانى ... بحس بنجاح الخطة من واحنا فى بدايات الجلسات .. اللى بتقول ايوه انا غلطت .. انا اهملت نفسى قوى
ترتيب اولوياتى كان غلط
انا مدورتش على اى شيء يسعدنى لانى كنت يمكن مكسلة ادور على السعادة و مش فاضية من انشغالى بالاولاد
بتقول بمنتهى الثقة و الشفافية و برضو الحزن انها جربت احساس العلاقة الحميمية بينهم مؤخرا و كانت فى منتهى التسطح و الجمود العاطفى
بتقول مبقاش فارق معاه ايه هيزعلنى
بتحاول فعلا تلاقى نفسها لنفسها
مش علشان ترجع العلاقة او تصلحها و فاهمة ان اصلاحها لعيوبها و استعادة معانى مهمة لحياتها هو اللى هيخليها قادرة تسترد حقوقها و تكون فرصة لا تعوض بالنسبة لنفس الزوج اللى شافها بعد فترة مش مهمة
بتعترف ان فعلا هو مش بيحبها و عايش معاها علشان الاولاد او هو مش عايز برضو يخرب بيته و بيحاول يتمسك
بتكون منسجمة و سلسة جدا الزوجة دى فى خطة الرعاية ملتزمة ،
و مهتمة بالتفاصيل و بتسال اعمل ده ازاى
بتقول عيوبها الحقيقية و بتقول ناقصنى كذا .. بتلقيها كده فاهمة اللى فيها و مختصرة مسافات طويلة فى اتخاذ القرار
ااااه اااه من روعة اكتر شخصية بتكون رايحة للاستقرار
اللى بتقول انا فعلا مش شخصية انثوية
حاسة انى مش بعرف اكون أنثى
دى واحد عندها وعى بمشاكلها
و من النقطة دى بتوفر عليا مجهود كبير وحقيقى ممكن يمتد لسنة فى حال حد تانى اننا نحاول اقناعها بأن عندها مشكلة فعلا
لما تروحى لمرشد اسرى اديه فرصة يواجهك بعيوبك و نواقصك و اختلافك الجوهرى و اختلافك الظاهرى
متزعليش ابدا لما يقولك ان فى ريحة مش احسن شيء صادرة منك
او عندك رائحة فم كريهة
او ان مش لايق عليكى اسلوب الهزار ده لانه مش شبه شخصيتك
هو مش هينتقدك لفراغ و مش بيصدر احكام
هو بيحاول يبصرك بحاجات مش ملاحظاها انتى
علشان بعدها هيقولك حلول مقترحة قابلة للتجريب
عارفة مقولة (اعترف الإنكار مش هيفيدك) ..😄
دى كنز بداية خطة جديدة للاستمتاع باستقرار نفسى
على فكرة احيانا فى الوساطة الاسرية بتوافق الزوج ترجع للزوج بعد ما ردينا حقوقها و بمتهى الحيادية مع الزوج كمان
بنخليهم يرجعوا مقتنعين ان فينا عيوب غير قابلة للإصلاح
هى فقط عيوب قابلة للتكيف
و كل طرف فيها يغير أفكاره و اتجاهاته و معرفته السابقة عن شيء معين فى العلاقة.. بهدف رجوع امن
لما اتنين بيتطلقوا و اعترفوا بعيوبهم و نواقصهم واختلافهم
مش هيكونوا متضايقين من سير العلاقة الجديد بينهم
لما الراجل يعترف ان لزوجته فضل عليه فيما عنده من مال دلوقتى ولولا تدخلها فى امر ما مكنش بقى معاه فلوس
ولو الزوجة اعترفت ان كنت بقلل منه علشان خايفة يضيع منى مش علشان هو قليل قد ما علشان انا مكنتش مصدقة انى اتجوز حد زيه
لما تعترف كزوج ان فعلا انت عندك مشكلة معينة صحية
بدل ما تفضل تتهمها بالتقصير
و لما انتى كمان تعترفى انك نفسيا دايما مش مستعدة و اكيد هو إنسان و هيفرق معاه سلبا انك متأففة دايما و لمدة سنين من علاقتكم
هيفرق كتير فى حياتكم
