04/08/2025
اهم الاسئله عن قانون الايجار القديم 164لسنة 2025 بعد التصديق عليه من رئيس الجمهورية
مين المخاطب بالقانون الجديد؟
القانون بيطبق على الشقق والمحلات القديمة لو كان المستأجر شخص طبيعي، بشرط إن العقد كان قبل 1996 وخاضع للقانون 49 لسنة 1977 أو 136 لسنة 1981.
العقود الجديدة من بعد 1996 مالهاش علاقة بالقانون ده.
العقود هتخلص امتى؟
السكنية: بعد 7 سنين من سريان القانون
غير السكنية: بعد 5 سنين
وطبعًا ممكن الطرفين يتفقوا على الإنهاء قبل كده.
إزاي بيتحدد سعر الإيجار الجديد؟
لجان حصر بتقسم المناطق إلى:
متميزة
متوسطة
اقتصادية
على أساس الموقع والخدمات والبنية التحتية.
القيمة الإيجارية الجديدة للشقق؟
متميزة: 20 ضعف الإيجار القديم (حد أدنى 1000 جنيه)
متوسطة: 10 أضعاف (حد أدنى 400 جنيه)
اقتصادية: 10 أضعاف (حد أدنى 250 جنيه)
ومؤقتًا: كل الناس هتدفع 250 جنيه لحد انتهاء تصنيف المناطق.
والمحلات؟
الإيجار بيزيد 5 أضعاف مرة واحدة
وزيادة سنوية 15% على الكل، سكني وتجاري.
إمتى المالك يطرد المستأجر فورًا؟
لو:
الوحدة مقفولة سنة كاملة بدون سبب
أو المستأجر عنده شقة تانية
يقدر المالك يطلب من قاضي الأمور الوقتية طرد فوري.
هل في وحدة بديلة للمستأجر؟
آه، لو قدم إقرار بالإخلاء وتقدم بطلب، الدولة ممكن توفرله وحدة إيجار أو تمليك بشروط مجلس الوزراء.
إلغاء القوانين القديمة؟
هيتلغي:
قانون 49 لسنة 1977
قانون 136 لسنة 1981
بعد 7 سنين من سريان القانون الجديد.
القانون بيبدأ امتى؟
من يوم 5 أغسطس 2025، يعني بدأ رسميًا خلاص.
ومن اول سبتمبر الايجار هيبقي 250 لكل الواحدت السكنيه لحين انتهاء لجان الحصر من عملها وتحديد الاماكن المميزه والمتوسطة والاقتصادية وبعد كده يتم سداد فروق الاجره
